104
Irkoy takahayey ma albarka daŋ a se
1 Ay hundoo, albarka tee Abadantaa se!
Abadantaa, ay Koyoo, nʼga hanse ka beeri,
beeray nda daržaa goo ni ga sanda bankaaray.
2 Nʼga annuura daŋ ni ga sanda darbay beeri,
nʼga beenaa daaru sanda kunta.
3 A ga nga hugu-izey cin sooraa ga harey boŋ*104.3 Šintinoo 1.7.,
a ga duulawey tee nga torkaa,
hewoo fatawey no ma kʼa dira.
4 A ga hewey tee nga dontokey,
a ga nuune deenewey tee nga goykey.
5 A ga laboo gorandi nga asaasoo ra,
abada a si ɲuuti.
6 Nʼna haroo kʼa daabu sanda darbay,
harey goo tondi hondey boŋ.
7 Ni zahã i ga, i ga zuru,
ni jiŋjiŋyanoo jindoo gʼi zurandi.
8 Tondi hondey tun, goorey yee ganda†104.8 Tondi hondey tun, goorey yee ganda, Ebere šenni ra, almaganaa faa ti I ga žigi tondi hondey ra ka zunbu goorey ra.,
ka koy nongoo here kaŋ nʼnʼa kayandi i se.
9 Nʼna kanje daŋ kaŋ ga harey masi bisa,
hala i masi kaa ka laboo daabu.
10 Nʼga hari hundogoo haroo sanba goorey ra
kaŋ ga zuru tondi hondey game.
11 I ga ganjihoogawey kul haŋandi,
ganji farkawey ga ngi jawoo kaa.
12 Beenaa cirawey ga goro harey jere
ka hẽe tuuri fitawey ra.
13 A goo sooraa hugu-izey ra beene a ga tondi hondey haŋandi,
laboo ga too nda nga teegoyey hayey.
14 A ga suboo zayandi adabbawey se,
nda dumarey kaŋ adamizey gʼi beeri,
ka ŋaayan kaataray laboo ra,
15 nda alaneb hari moora kaŋ ga adamize binoo ɲaalandi,
a ga ndum nerandi nda jii,
nda ŋaayan kaŋ ga adamize binoo noo gaabi.
16 Abadantaa tuurey kungu,
maanaa Libaŋ gandaa sedere tuurey kaŋ a nʼi duma.
17 No din ra cirawey ga ngi tejey tee,
alwaaliyaa hugoo ti sipres tuuri.
18 Tondi hondu beerey manʼti kala ganjihanciney wane,
tondey ti tondoo-ntabawey tugudogoo.
19 A na handoo tee ka waatoo kaa cere ra,
waynaa ga nga kaŋyanoo waatoo bay.
20 Nda ni kate kubaa, cijinoo too
kaŋ ra hawsaa adabbawey kul ga ziilam-ziilam.
21 Ganjihayla soogey ga booro ngi hamoo bande,
i ga ngi ŋaahayaa ceeci Irkoy ga.
22 Waynaa fatta, i koy
i ga kani ngi tugudogey ra.
23 Adamize ga fatta ka koy nga goydogoo ra,
a ga cindi nga goydogoo ra hala alaasaroo ra.
24 Abadantaa, ni teegoyey ga boobo!
Nʼnʼi kul tee nda lakkal,
laboo ga too nda hayey kaŋ nʼnʼi tee.
25 Teekoo ne kaŋ ga beeri a ga hay nongu kul here,
haya hunante kaŋ si kabandi goo a ra,
adabba kaccu nda ibeeri.
26 No din ra harihiyey ga dira,
nda hari dragoŋoo kaŋ nʼnʼa tee hala ma hooray a bande.
27 I kul naataa sii kala ni ra
hala ma ngi noo ngi ŋaahayaa nga waatoo ra.
28 Nʼgʼa noo i se, i gʼa kuuna,
nʼga ni kaboo feeri, i ga kungu nda gomni.
29 Nʼna ni ndumoo bere i se, i ga hunbur,
nʼna ngi hunsaroo dii, i ga dere
ka willi laboo ra.
30 Nʼga ni hundoo sanba, i ga takandi,
nʼga laboo taagandi.
31 Yala Abadantaa daržaa ma bara hala abada!
Yala Abadantaa ma ɲaali nda nga teegoyey!
32 A ga laboo guna, laboo ga jijiri,
a ga tuku tondi hondey ga, i ga dullu.
33 Kullihinne ay ga huna, ay ga don Abadantaa se,
kullihinne ay ga bara, ay ga don ay Koyoo se.
34 Yala ay miileyanoo ma kan a se!
Agay, ay ga ɲaali nda Abadantaa.
35 Yala zunubantey ma dere ka hun laboo ga,
yala boro laaley masi yee koyne ka bara!
Ay hundoo, albarka tee Abadantaa se!
Aleluya!