2 Ya Irkoy, ay binoo kanandi.

Darža no ya ne ya don ka ni saabu nda zaburyaŋ.

3 Tun, kurboo, tun, kuntijoo!

Ay ga alfazaroo tunandi.

4 Abadantaa, ay ga albarka daŋ ma ne jamawey ra,

ay ga don ma ne gandawey ra.

5 Zama ni borohennataraa ga jer ka bisa beenaa,

de ni laadirtaraa ga too hala duulawey do.

6 Ya Irkoy, ni boŋ jer beenaa se beene!

De ni daržaa ma bara laboo kul boŋ beene!

7 Ir hallasi nda ni kabe gumaa

hala ni baakey ma hun kabe ra, ay zaabi!

8 Irkoy goo nga nongu henanantaa ra, a šelaŋ ka nee:

«Ay ga zaame. Ay ga Šekem koyraa zamna,

ay ga Sukot gooroo neeši.

9 Agay wane Galad gandaa, agay wane Manase gandaa,

Efrayim gandaa ti ay guuru fuulaa,

Žuda gandaa ti ay boŋkoynitaray goboo.

10 Mowab gandaa ti canbu beeroo kaŋ ra ay ga ɲumay,

Edom gandaa ga ay gʼay taami calaa warra.

Filisti gandaa ga ay ga wongu wurru tee.»

11 May no ma koy nda agay koyra gaabantaa ra? May no mʼay ka koy hala Edom?

12 Ya Irkoy, manʼti ni no kʼir fur wala?

Ya Irkoy, manʼti ni no ka si yee ka koy ir bande wongu ra wala?

13 Ir faaba kʼir kaa ir torrokey kabey ra!

Zama adamize faabaa sii nda alfayda.

14 Irkoy bande ir ga haya beeriyaŋ tee,

nga no mʼir torrokey motti.