Irkoy, ni kaŋ ay ga ni saabu, masi dangay!

2 Zama mee laaley nda mee zanbantey feeri ay ga,

i ga šelaŋ ay ga ka taari.

3 I gʼay kuubi kʼay bere nda konnaray šenniyaŋ,

i gʼay wongu bila addalil.

4 Ba kaŋ ay ga bagʼey, i gʼay gandu,

ka gar ay goo ma Irkoy ŋaaray.

5 I ga ihenna bana ya ne nda ifutu,

kʼay bajoo bana nda konnaray.

6 A kaŋandi boro futu kaboo ra

nkuway ma kay kabe gumaa ga!

7 Nda i gʼa ciiti, a ma zukandi,

yala nga ŋaarayroo ma bere ka tee zunubu!

8 Yala nga aloomuroo ma kacca,

goyoo kaŋ a gʼa tee ra, boro tana ma yee dogoo ra!

9 Yala nga izey ma tee alyatimyaŋ,

wandoo ma tee woy kaŋ kurɲoo buu!

10 Yala nga izey ma tee

yaara-yaarakawyaŋ, i ma fatta ngi hugu kayraa ra ka koy gariibu,

11 Yala garawkoyni ma gum nga kabehayaa kul ga,

yala yaw ma nga goyoo albahaa ŋaa!

12 Yala boro kul masi borohennataray cebe a se,

yala boro kul masi alhormo tee nga alyatimey se!

13 Yala nga hayroo ma halaci,

de nga maaɲoo ma tuusandi ka hun zamanoo kaŋ ga kaa ra!

14 Yala ngi baabey layboo ma hongandi Abadantaa jine,

de yala ɲaŋoo zunuboo masi tuusandi!

15 Yala waati kul layboo nda zunuboo ma bara Abadantaa jine,

Irkoy ma maaɲey derandi ka hun laboo ga,

16 zama aroo woo mana bay ka goy nda borohennataray,

zama a na talkaa, nda alfukaaroo torro,

nda boraa kaŋ binoo hasara hala nongu kaŋ ra a nʼi wii.

17 Dangayan ga kan a se, yala dangaa ma kaŋ a ga!

A si baa albarka gaarayan boro se, yala albarka gaarayan ma mooru a!

18 Danga ma tee a se sanda burmusu,

dangaroo ma huru a ra sanda hari,

sanda jii kaŋ goo nga birey ra.

19 Yala a ma tee a se darbay kaŋ goo jindoo ra,

sanda gamahaw kaŋ goo a ga waati kul.

20 Woo ti bagaa kaŋ nda Abadantaa ga agay nkuwawey bana,

nda borey kaŋ ga ifutu har ay ga!

21 Amma ni, Abadantaa, ay Koyoo,

goy henna tee ya ne ni maaɲoo sabbu se,

zama ni borohennataraa ga boori, ay hallasi!

22 Zama agay, talka ti agay, alfukaaru ti agay,

ay binoo hasara ay gundoo ra.

23 Ay ga koy sanda bii kaŋ kaŋ ka daaru ka koy,

i gʼay kokobu sanda ndoo.

24 Ay kanjey ga jijiri meehaw maaganda se,

ay gaahamoo ɲom farayan se.

25 Ay tee i se haarayhaya,

nda i nʼay guna i ga ngi boŋey zinji-zinji.

26 Abadantaa, ay Koyoo, ay faaba,

ay hallasi nda ni borohennataraa!

27 Yala i ma bay kaŋ ni kaboo no,

kaŋ ni, Abadantaa ka woo tee!

28 Ngi, i ga danga, amma ni, nʼga albarka daŋ.

Nda i tun, i ga haw,

agay, ni tamoo, ay ga ɲaali.

29 Yala agay iberey ma daabu nda kaynandiyan,

ngi haawoo mʼi daabu sanda burmusu!

30 Ay gʼay jindoo jer ka hanse ka Abadantaa saabu,

ay gʼa šifa jama ra,

31 zama a ga kay talkaa kabe gumaa ga

kʼa hallasi borey ra kaŋ gʼa ciiti.