1 Ay ga baa Abadantaa,

zama a ga maa ay suurandiyanoo se.

2 A na nga haŋaa gaaru ya ne,

ay gʼa cee ay hunaroo kul ra.

3 Buuyan karfey didiji ay ga,

alaahara alhuzunoo nʼay dii,

ay dii zarabi nda binemarayyan.

4 Woo ga, ay na Abadantaa maaɲoo cee ka nee:

«Ay gʼa wiri ni ga, Abadantaa, mʼay hundoo hallasi!»

5 Abadantaa ga hinna, a ga šerre,

ir Koyoo ga tamalla.

6 Abadantaa ga boŋbiyey lakkal,

ay sahãa ben, a nʼay hallasi.

7 Ay hundoo, willi ni hunanzamoo ra,

zama Abadantaa na gomni tee ma ne.

8 Zama nʼnʼay hundoo hallasi buuyan ra,

nʼnʼay moɲey hallasi mundi ra,

nʼnʼay cewey hallasi katiyan ra.

9 Ay ga dira Abadantaa jine

hundikoyney laboo ga.

10 Ya nka naanay, woo se ay šelaŋ.

Agay, ay hanse ka zarabi.

11 Ay cahãyanoo ra, ay nee:

«Adamize kul ti taariharkaw.»

12 Taka foo nda ay ga Abadantaa bana

haya henney kul kaŋ a nʼi tee ya ne?

13 Ay ga hallasiroo potoo jer

ka Abadantaa maaɲoo cee.

14 Ay ga meefurey kaŋ ay nʼi zaa Abadantaa se kaa,

nga jamaa kul jine.

15 Abadantaa ganakey buuroo goo nda alkadar a do.

16 Ay gʼa wiri ni ga, Abadantaa!

Agay ti ni tamoo,

ni tamoo, ni koŋŋaa izʼaroo.

Nʼna karfey feeri kʼi kaa ay ga.

17 Ay ga albarka daŋyan sargari kaa ma ne,

ay ga Abadantaa maaɲoo cee.

18 Ay ga meefurey kaŋ ay nʼi zaa Abadantaa se kaa,

nga jamaa kul jine,

19 Abadantaa hugoo batumawey ra,

Žerizalem, ni game!

Aleluya!