1 Manʼti ir maaɲoo ga, Abadantaa, manʼti ir maaɲoo ga,

amma ni maaɲoo ga daržaa ma bara

ni borohennataraa nda ni laadirtaraa maaganda!

2 Macin se gandawey ga nee:

«Man ngi Koyoo?»

3 Ir Koyoo goo beenaa ra,

a ga haya kul tee kaŋ kan a se.

4 Ngi toorey manʼti kala nzorfu kaaray nda wura,

adamize kabe teegoy no.

5 I goo nda mee, amma i si hin ka šelaŋ,

i goo nda moo, amma i si hin ka dii,

6 i goo nda haŋa, amma i si hin ka maa,

i goo nda niine, amma i si hin ka maa haya hew.

7 I goo nda kabe, amma si hin ka tuku haya ga,

i goo nda cee, amma i si hin ka dira,

ba ŋuunuŋuunu si hun kormollawey ra.

8 Ngi nda borey kaŋ nʼi tee,

nda borey kul kaŋ ga naanay ey ga hima.

9 Izirayel, ni naanaa daŋ Abadantaa ra!

Nga ti ngi faabakaa nda ngi koraa.

10 Haruna hugoo borey, wa war naanaa daŋ Abadantaa ra!

Nga ti ngi faabakaa nda ngi koraa.

11 War kaŋ ga hunbur Abadantaa, wa war naanaa daŋ Abadantaa ra!

Nga ti ngi faabakaa nda ngi koraa.

12 Abadantaa ga hongu ir, a ga albarka daŋ,

a ga albarka daŋ Izirayel hugoo borey ra,

a ga albarka daŋ Haruna hugoo borey ra,

13 a ga albarka daŋ borey ra kaŋ ga hunbur Abadantaa,

ikaccu nda ibeeri.

14 Abadantaa ga war boobandi,

war nda war izey.

15 Abadantaa na albarka daŋ war ra,

nga kaŋ na beenaa nda laboo tee.

16 Beenaa manʼti kala Abadantaa beenaa,

amma a na laboo noo adamizey se.

17 Manʼti bukawey no ma Abadantaa saabu,

borey mo kaŋ koy alaahara sʼa saabu.

18 Amma ir, ir ga albarka daŋ Abadantaa se

za sohõ da hala abada.

Aleluya!