1 Aleluya!

Wa Abadantaa maaɲoo saabu,

Wʼa saabu, Abadantaa tamey,

2 war kaŋ ga kay Abadantaa hugoo ra,

ir Koyoo hugoo batumawey ra!

3 Aleluya, zama Abadantaa ga boori.

Wa don maaɲoo ga, zama a ga boori.

4 Zama Abadantaa na Yakuba suuba nga boŋ se,

ka Izirayel suuba a ma tee nga kabe wanoo.

5 Agay, ay ga bay kaŋ Abadantaa ga beeri,

ir Koyoo bisa koyey kul.

6 Haya kul kaŋ kan Abadantaa se, a gʼa tee

beenaa ra nda laboo ga,

teekowey ra nda guusu beerey kul ra.

7 A ga duula tunandi ka hun laboo kanjey ga,

a ga ncirɲi zumandi ka meli tee,

a ga hewoo tunandi ka hun nga jisidogey ra.

8 A na Misira gunde jinawey wii,

za adamize hala adabba.

9 A na tammaasayaŋ nda kayfiyaŋ sanba

ni, Misira gandaa game,

Firawuuna nda nga tamey kul ga.

10 A na ganda booboyaŋ kar,

ka kokoy hinikoyniyaŋ wii kaŋyaŋ ti:

11 Amor borey kokoyoo Sihoŋ,

nda Bašaŋ gandaa kokoyoo Og,

nda Kanaŋ gandaa laamawey kul.

12 A na ngi gandaa tee tubuhaya,

a nʼa tee tubuhaya nga jamaa Izirayel se.

13 Abadantaa, ni maaɲoo ga bara hala abada!

Abadantaa, borey ga hongu ni maaɲoo zaman ka koy zaman!

14 Zama Abadantaa ga kaa ka nga jamaa ciiti,

a ga kaa ka hinna nga tamey ga.

15 Dumey jerey toorey manʼti kala nzorfu kaaray nda wura,

adamize kabe teegoy no.

16 I goo nda mee, amma i si hin ka šelaŋ,

i goo nda moo, amma i si hin ka dii,

17 i goo nda haŋa, amma i si hin ka maa,

hunsar sii miɲey ra.

18 Ngi nda borey kaŋ nʼi tee,

ngi nda borey kul kaŋ ga naanay ey ga hima.

19 Izirayel hugoo borey, wa albarka tee Abadantaa se!

Haruna hugoo borey, wa albarka tee Abadantaa se!

20 Lewi hugoo borey, wa albarka tee Abadantaa se!

War kaŋ ga hunbur Abadantaa, wa albarka tee Abadantaa se!

21 Albarka ma bara Abadantaa se ka hun Siyoŋ koyraa ra,

nga kaŋ si goro kala Žerizalem!

Aleluya!