136
Abadantaa borohennataraa si ben abada
1 Wa Abadantaa šifa, zama a ga boori,
zama nga borohennataraa si ben abada.
2 Wa irkoyey Irkoy šifa,
zama nga borohennataraa si ben abada.
3 Wa koyey Koyoo šifa,
zama nga borohennataraa si ben abada.
4 Nga hinne no ma haya beeri kayfanteyaŋ tee,
zama nga borohennataraa si ben abada.
5 Nga ka beenaa tee nda lakkal,
zama nga borohennataraa si ben abada.
6 Nga ka laboo daaru harey boŋ,
zama nga borohennataraa si ben abada.
7 Nga ka haya beerey tee kaŋ ga gaay noo,
zama nga borohennataraa si ben abada.
8 A na waynaa tee a ma zaaroo gongu,
zama nga borohennataraa si ben abada.
9 A na handoo nda handarawey tee i ma cijinoo gongu,
zama nga borohennataraa si ben abada.
10 Nga ka Misira gunde jinawey kar kʼi wii,
zama nga borohennataraa si ben abada.
11 A na Izirayel borey fattandi i game,
zama nga borohennataraa si ben abada.
12 A nʼi fattandi nda kabe gaabante nda hini,
zama nga borohennataraa si ben abada.
13 Nga ka Kakaarey teekoo dunbu ihinka,
zama nga borohennataraa si ben abada.
14 Nga ka Izirayel borey deŋandi ka bisa teekoo gamoo ra,
zama nga borohennataraa si ben abada.
15 Nga ka Firawuuna nda nga wongu-izey
naŋ Kakaarey teekoo ra,
zama nga borohennataraa si ben abada.
16 Nga no ka nga jamaa gongu saajoo ra,
zama nga borohennataraa si ben abada.
17 Nga ka kokoy beeriyaŋ kar kʼi wii,
zama nga borohennataraa si ben abada.
18 Nga ka kokoy gaabanteyaŋ wii,
zama nga borohennataraa si ben abada.
19 A na Amor borey kokoyoo Sihoŋ wii,
zama nga borohennataraa si ben abada.
20 A na Bašaŋ gandaa kokoyoo Og wii,
zama nga borohennataraa si ben abada.
21 A na ngi gandawey noo Izirayel se sanda tubu,
zama nga borohennataraa si ben abada.
22 Kʼi tee tubu nga tamoo Izirayel se,
zama nga borohennataraa si ben abada.
23 Nga no ka hongu ir waatoo kaŋ ir cindi kaynandiyan ra,
zama nga borohennataraa si ben abada.
24 Nga no kʼir kaa ir nkuwawey kabey ra,
zama nga borohennataraa si ben abada.
25 Nga no ma hundikoyni kul noo ŋaayan,
zama nga borohennataraa si ben abada.
26 Wa beenaa Koyoo šifa,
zama nga borohennataraa si ben abada.