Abadantaa, nʼnʼay laasaabu, nʼgʼay bay.

2 Ni, nʼga bay waati kaŋ ay ga goro

nda waati kaŋ ay ga tun,

nongu mooro ra nʼgʼay lakkaloo bay.

3 Nʼga bay waati kaŋ ay ga dira nda waati kaŋ ay ga kani,

nʼgʼay fondawey kul bay.

4 Zama šennoo mana too ay deene boŋoo ga

kaŋ nga ne, Abadantaa, nʼgʼa bay.

5 Nʼgʼay kuubi kʼay bere nda jine here nda banda here,

de mo nʼga ni kaboo kanandi ay ga.

6 Bayray kayfantaa woo ga bisa agay,

a ga hanse ka bisa ay fahamaa.

7 Man ra ay ga koy hala ya mooru ni Hundoo?

Man ra ay ga zuru ka koy hala ya hun ni moɲey cire?

8 Nda ay žigi beenaa ra, ni goo no,

nda ay koy kani alaahara ra, no din mo ni goo no.

9 Nda ay na fata tee ka koy waynahunay here

ka koy goro teekoo boŋ faa ga,

10 no din mo ra ni kaboo gʼay gongu,

ni kabe gumaa gʼay dii.

11 Nda ay nee kaŋ kubaa mʼay daabu,

cijinoo ma bere ka tee gaay ay kuubi-ka-beraa ra.

12 Ba kubaa manʼti kubay ma ne,

cijinoo ga kaaray sanda zaaroo,

kubaa ga tee sanda gaayoo.

13 Ni no kʼay kuneheroo kul tee,

kʼay hanse ay ɲaa gundoo ra.

14 Ay ga ni šifa, zama nʼnʼay tee takari henna kayfante.

Ni teegoyey ga boŋhaw,

ay ga bay gumo.

15 Ay kunturoo mana tugu ma ne,

waatoo kaŋ ay teendi tuguyan ra,

waatoo kaŋ ay hansandi labu guusey ra.

16 Waatoo kaŋ ay ga tee baši, ni moɲey ga dii agay,

de mo ni tiiraa ra agay aloomuroo hinnaa kul hantumandi,

za ya na duu ba zaari foo.

17 Ya Irkoy, ni miilewey ga guusu!

Ngi hinnaa ga hanse ka boobo.

18 Nda ay nʼi kabu,

ngi hinnaa ga bisa labutaasi gurunbey.

Waati kaŋ ay tun, ay goo ni bande koyne.

19 Ya Irkoy, nda a gar ba ni mma boro laala wii!

Kuri munkey, wa hibi ay ga!

20 I ga šelaŋ ni ga nda carmay,

ni iberey ga ni maaɲoo cee nda dargayan.

21 Abadantaa, ay si hima ka konna borey kaŋ ga konna ni wala?

Ay si hima ka borey hesu kaŋ ga ni gandu wala?

22 Ay gʼi konnay hala konnay kaydogoo ga.

Iberiyaŋ no ya ne.

23 Ya Irkoy, ay laasaabu ka dii ay binoo.

Ay sii, hala ma dii ay lakkaloo.

24 Guna wala ay goo fondo laala ga,

mʼay gongu ka koy fondo abadantaa ga.