2 Abadantaa, ay feeri kʼay kaa boro laala ra,

ay dii ka hun boro futu ga.

3 I ga dabari laalayaŋ soolu ngi biney ra,

zaari kul wongu no i ga ceeci.

4 I ga ngi deeney kaanandi sanda gondi,

gandakarfu naaji bara miɲey ra.

5 Abadantaa, ay lakkal ya si kaŋ boro laala kaboo ra.

Ay dii ka hun boro futu ga

kaŋ gʼay kaŋyanoo miile.

6 Boro binebeeriyaŋ tugu ka kumsay hirri ya ne kʼay haw nda karfu,

i ga filijiyaŋ daŋ ya ne fondaa bande,

i ga sankay hirri ya ne.

7 Ay nee Abadantaa se: «Ni ti ay Koyoo!

Abadantaa, haŋajer ay suurandiyaney se.

8 Abadantaa, ay Koyoo, ay hallasiroo gaaboo,

nʼgʼay boŋoo daabu han kaŋ i na wongu jinay zaa.

9 Abadantaa, masi boro laala noo hayey kaŋ a gʼi wiri,

masi naŋ hayaa kaŋ a ga baa nga mʼa tee ma boori

hala a masi nga boŋ jer.»

10 Borey kaŋ gʼay kuubi kʼay bere,

yala bonaa kaŋ miɲey nʼa soolu ma gum i boŋ.

11 Yala denji ciray ma doorandi i boŋ,

yala Irkoy mʼi kaŋandi nuunaa ra,

guusu beeri ra kaŋ ra i si tun koyne.

12 Deene-kaana si tee haya laboo ga,

boro futu, bone si hun a bande.

13 Ay ga bay kaŋ Abadantaa ga ciiti boro se kaŋ ga taabi,

a ga farakoyney noo ngi cimoo.

14 Nda cimi, boro šerrantey ga ni maaɲoo šifa,

boro bine šerrantey ga kaa ka goro ni jinoo ra.