Abadantaa, ay ga ni cee, cahã kʼay faaba!

Haŋajer ya ne waati kaŋ ay ga ni cee!

2 Yala ay ŋaarayroo ma tee ma ne sanda dugu,

de ay kabey jeryanoo ma tee ma ne alaasaroo taasu sargaroo.

3 Abadantaa, ay miɲoo hawgay,

ay meetuwey lakkal.

4 Masi naŋ ay binoo ma šiiri ka koy haya laala here.

Ya sʼay boŋ noo dabari laalayaŋ se

boroyaŋ bande kaŋ ga šerretaray jaŋay tee.

Yala ya si ngi hoyandi ŋaayaney taba!

5 Nda boro šerrante nʼay kar, gomni no,

nda a kašeta ay ga, jii no kaŋ goo ay boŋoo ga.

Ay boŋoo si wanji a,

ay ŋaarayroo ga duu ifutu ga fondo.

6 Nda ngi alkaaley warrandi ka tondi fonku,

i ga haŋajer ay šenney se, zama šenni hennayaŋ no.

7 Sanda beerikaw kaŋ ga laboo zafa kʼa fay ihinka,

ir birey ga say-say alaahara miɲoo ga.

8 Abadantaa, ay Koyoo, ni here ay gʼay moɲey bere,

ni ga ay ga talfi,

masʼay hundoo naŋ buuyan se.

9 Ay hallasi kumsaa ra kaŋ i gʼa hirri ya ne,

nda borey kaŋ ga šerretaray jaŋay tee sankawey ra.

10 Yala boro laaley ma kaŋ cere bande ngi kumsawey ra,

ka gar agay, ay hun i ra.