1 Ja yosi joi akai joni koshi join notsinyamawe, min papabi akai keskáakin shinantaanankaya esewe, jatian ja bakeranonbo kikin min wetsabo akai keskáakin jato ikinwe.

2 Jatian ja yoxan joi akai ainbobo, min titabi akai keskáakin jato esewe, jatian ja xontakobo min kikin poibo akai keskáakin jato ikinwe, jawe jakonmabi ati shinanyamakin.

3 Ja benomaatabo ikax jan jato akinti rareboomabo jato akinwe.

4 Ikaxbi westíora benomaaya ainbo jawen bakebo, iamax jawen bababo jaxonra, jabaonparikaya jaton rarebobo akinkanti jake. Bake iketian koiranxon jan jato akinkatitai keskáribiakin, neskarara jakon iki itan Dios keenai keskáshamanribi iki.

5 Ja ikon jabicho baneta benomaayatonra, Dioskires manátaanan yaméyabi neten oracion meran yokákin jeneyamai.

6 Ikaxbi jan jawen shinan raromatibores akai benomaaya ainbora, jiriapari ikaxbi mawata keská iki.

7 Jaskara kopí neskatiboribi ikanti jato yoiwe, jaskatax tsonbi jan jato yoinkanti jawe jakonmabi yama ikanti kopí.

8 Jaweratonki ja wetsabo, itan jawen rarebobi jawékinin jato akinti shinanyamai, jara jan ikonha keskati jayamake, itan ja joi ikonhayamaibo bebonbires jakonma iki.

9 Ja benomaatabo akinnoxon jaton jane wishatiainkora, sokota chonka baritia winoabores itan westíora beneyabicho iká ainboboresibi ikanti jake,

10 Jainoax ikanti jake jakon jawéki aká kopibo jato onankanabo, jaton bakebo jakonhakin koiranxon aniaibo iká iken, jawen xobon bekanketian jato jakonhaxon biai iká kopí, jabé joi akaibo jato akinnai iká iketian, jainxon ja onitsapitaibo jato akinnai iká kopí, itan jatíbi meskó jakon jawékibo akai ainbo iká iketian.

11 Ikaxbi jato akinnoxon jaton jane wishatiainkora, ja benomaaya xontakobopari, min jaton jane wishatima iki, jabora jaton keenai shinanbaon jatoaresa, Cristo ikonhakin jenetaanan jakiribi benoti shinanyabo ikanai,

12 jatianra ja jaton yoinibo senenhayamai, jakonmabores akí iikanti atipanke.*Jakiribi benotima yoinixbi benoax jaskákanti yoiira ikai jaskati.

13 Jainoax chikish banetax ikanai, xobobotiibi boaantani, jaskati ikanai joishoko ninkatax keshai, jatíbiain jato betan niakaaxon atima joishokobobi jato yoii.

14 Jaskara kopíra ja xontako ikaxbi benomaatabo, jakiribi benokanti en jato yoiai, jaskati benotaanan bakeaax xobomeax jaton bake koirannaibobiribi ikanon ixon, jaskáaxon ja joi ayamaibaon jato jakonmaakin yoitima kopí.

15 Jatíribi benomaayabaonra moa Dios ikonhakin jenekana iki, jaskatira ja *Satanás keenai keskábores akí jakanabo ikanai.

16 Jawerato joi akai ainbaon rareboki benomaata iki, jara jawen rarebobaon akinti jake, ja joi akaibaonbicho jatíbi jato akinnai itima kopí, jaskaxon ja ikonkon rarebooma ikax, jan akinti yamaabobicho ja joi akaibaon jato akinkanti kopí.

17 Ja joi akaibo jato jakonhakin ikinai ancianobora, bebonbires jakonhakin shinanxon jawékininbo akinkanai iti jake, ja jaskaakanaibora iti jake, jakon joi jato yoiananbi ja joi jato axeaishamanbores.

18 Jaskara yoiira ikai Wishá meran neskati: “Trigo xememakin waka kenexyamakanwe abanon pikin”, iki. Jainxon yoiribiai: “Ja teetai joninra jawen kopí biti jake”, iki ixon.†Dt. 25.5; Lc. 10.7

19 Jainxon westíora *ancianonin jakonma aká yoikanaitian, rabékan iamaax kimishaxon onanxon yoikanaima iketian jato ikonhayamawe.

20 Ja ocha akín jeneyamaibo jatíbi ja joi akaibo tsinkixon, jato bebonxon jato notsinwe, abákanon min jato jaskáa ointaanan, rakéxon wetsabaon jaskara ochabo ashokoyamakin.

21 Ja Dios betan Jesucristo bebonxon, jainxon jawen katota ángelbo bebonxonra, neskákin min jato anon ixon en mia yoiai, jatíribibores axon wetsabo ayamai akin jato ayamawe.

22 Westíora joni Diossen tee akai iti janenoxon, akonkin jawen ikábo onanxonmabi ishtonbires min mekenman mamepasyamawe, jaskataxa mia jabébi ocha akai keská inake, miaribira jaskara jakonmainbo niakaati yamake.

23 Ja min poko meran isinai ixon onpaxbicho xeayamawe, ichama vinoribi xeawe.

24 Jatíribi joi akaibaon ocha akaibora onantibires non oinnai, ja akanaibo onanxon jato yoixonkanamabi, ikaxbi wetsatianra chinípari jishtiai non oinnai.‡Pablonra jakiribi tekikin yoii iitai ja v. 22 ikain yoia joi.

25 Jaskáribiira ja jatíribibaon jakon tee akaiboribi onantibires iki, jatian ja non oinyamai jawékibora jatíbitian joné iamai.