3
Jesús riki Moisés xewina
1 Jaskara iken, nokon wetsabó, mato riki Diossen jonibo, jawenabo inon ixon mato katota ixonkaya, raana joni itan *Sacerdotebaon Koshiakin, ja Cristo Jesús shinankanwe, já ikonhaabo ixonra jaskara non jato yoiai.
2 Jesussenra jan ati ikábo, Dios senenhaxona iki, jaskara tee ati ja imaa ixon, ja Diossen xobonko teekin, Moiséssen aní keskáakinribi.
3 Ikaxbi Jesúskayara, ja Moisés akai bebonbires aniakin rabikanti imaa iki, ja xobo ayamakinbi, jan xoboaka jonires, kikinhakin rabionkanai keskáakin.
4 Jatíbi xobo riki westíora jonin aká, ikaxbi jatíbi nato neten já jawékibo riki, Diossen akábobires.
5 Moisésra iká iki, westíora yonoti ikax, ja Diossen xobonko teekin ja atibo senenhaai, jatian jawen teera iká iki, ja ramakaya Diossen yoiti jawékibo ikonkon onanna ixon, jato onanmati.
6 Ikaxbi Cristo riki, Diossen Bake ikax, ja Diossen xobomea teebo akin, ja atibo akonkin senenhai, ja iki noabo yoii iká, já ikonhakin jeneyamai raro shinanyaxon, ja bii kati jawékinin manatabo ikax.
Diossen yoiabo ninkáxonti
7 Jaskara kopíra ikai, Wishá meran Diossen jakon Shinan neskati:
“Rama netebi mato Diossen yoiai ninkáxon,
8 maton jointibo chorishayamakanwe,
jaskati yoitimakin akana iki, jain joni jayamainkoxon Dios tanakin.
9 Jainxonra ja chosko chonka baritia,
en tee akaibo oinxonbi, maton rekenbaon ea
tanakana iki.
10 Jaskara kopíra, jatoki sináxon en jato neskaa iki:
‘Jaton shinan meran benota keskábo ixonra, en jato eseabo ninkákashamakanai’, akin.
11 Jaskara kopíra, ikonbiresi sinatax ea ikoni neskata iki:
Matora jawetianbi jikitima iki, ja en mato jain tantimati mainko”, iki.
12 Jaskarabo, iken, koirameekanwe nokon wetsabo, jakonmabo ochati jointiabores ikaxa, ikonhakashamai ja jiria Diossibakeax, mato ochókanake.
13 Jaskáyamaikaya, netetiibi wetsabo betan eseanani, shinan koshikanwe, “ja rama netebi”, iki iká joi Wishá meran japariketian, jaskatax mato tsoabi ochan paranxon imaa, shinan jakonmaati yoitimakantima kopí.
14 Noabora moa Cristo betan iki, ikaxbira já ikonhakin peonontian iní keskatibi senenai kaman, noa jaki koshii jenéti yamake.
15 Jaskara yoiira ikai Wishá meran neskati:
“Rama netebi mato Diossen yoiai ninkaxon, maton jointibo chorishayamakanwe ja moatian yoitimatax ikáni keskatiribi”, iki.
16 ¿Jatian tsoaboki ikana iki, ja Diossen jato yoiai ninkataxbi jaki yoitimati? Jatíbi ja Egipto mainmea jato Moiséssen pikonibora ikana iki, jaskati yoitimai.
17 ¿Jatian tsoabokiribiki iká iki, ja chosko chonka baritia Dios sinati? Ja ochax, jain joni jayamainkoniax mawánibokira iká iki.
18 ¿Jatian tsoaboki ikonkon Diossen yoia iki, jain jato tantimati mainko jikimatima? Jatíbi ja jaki yoitimatabora aká iki.
19 Jatianra ikonkon non oinnai, ja Dios ikonhayamakana kopí, ja main jikiamakani.