JOEL
Dioski yoiti ikánon ixon, itan akonkin jakonma jenekanon ixon Joelnin Israel jonibo yoia
1
Chanpon banábo ramia
1 Ea Petuelnin bake Joelra, nato joi Ibon yoia iki.
2 Nato jakonhakin ninkáshamankanwe joni koshibó,
jainxon matonribi ja main jaa jonibaon ninkakanwe.
¿Neskara jawéki ikaiki maton jawetianbi oinnama iki?
¿Jawetianbiki wetsatianbo, neskara jawéki ikai maton papabaon oinnama iki?
3 Nato joi maton bakebo yoikanwe,
abákanon jabaon jaton bakebobiribi yoikin,
jatianra jato pekao pikotaibo jabaonbiribi jato yoiti iki.
4 Judáin bexonra chanpobaon jatíbi pia iki:
wetsabaon texeara jatíribibaon bexon keyokin piá iki.
5 ¡Mato paennabo moa jishtenkanwe!
¡Ja vino xeaibo winikanwe,
wai ras axonra uva jenebobi mato bichinkanai!
6 Jainoax champobora koshi, itan ichabires sontárobo keská,
león xeta keskáyabo, itan león awinnin xenita xeta keskáyabo
nokon main jatíbiain janbiske.
7 Non uva waibora ramiake,
non higo waibora keyokin beshéake,
ja jiwibichibora keyokin bishkoke,
ja jiwi poyanbobira joxobaintiake.
8 Jawen biti joni mawáketian
ja biti iká ainbo winiai keskati, itan mekéti chopa saweax ikai keskatira,
9 Ibo ja meniti jawékibo, bero bimibobi yamaketian,
itan uva xeatibobi Ibon xobonko yamaketian,
sacerdote jonibo winiai.
10 Jawe banábira ja main moa yamake;
ja maibora moa jawebioma ikax onis iki,
trigora moa keyoke,
uva waibora moa choshi iki,
itan olivos jiwibora moa siwáke.
11 Mato wain teetaibo, itan uva banaibo
onisi winikanwe,
banábora moa keyóke,
jaskara ikaxa trigo, itan cebada moa tsekati yamake.
12 Uva waibora moa choshike
jainoax higo jiwibora moa keyóke.
Yobin jiwibo, wanin jiwi keskábo, manzana jiwiboribira moa choshike,
jainoax jatíbi wain banati jiwibo.
¡Jaskara kopíra jatíbi jonibo moa raroyamakanai!
13 Mato sacerdotebo, Dios menikin jainxon
jawéki menotiain teetaibo, xaxa chopa sawekanwe,
jaskáax chexakaati winikanwe,
maton Diossen xobonkora,
moa bimi berobi, uva xeatibi ja Dios meniti moa yamake.
14 Jonibo kenaxon ayunanti jato yoikanwe;
ja joni koshibo, itan jatíbi ja main jaa jonibo,
maton Ibo Diossen xobonko jato tsinkikanwe,
jaskáaxon Ibo yokakanwe.
15 ¡Jawe iresaipanon, Ibon
jaton jakonma aká jonibo yoixonti netera moa ochóma iki!
¡Jatíbi koshi Ibon onsá netera
noa keyoi joai!
16 Non oinkenbira, chanpon non yoábo keyokin pixon noa pitioma banémaa iki,
jatianra non Diossen xobonko moa raroti keyota iki.
17 Non banaa berobora oi beyamaitian mawáke,
trigora moa yamake,
itan jain bero tsamantibora koiranyamakana moa rinwimeebotanai.
18 ¡Wakabora jawékiakasi máan ikai!
Yankabiresa wakabaon pasto benai;
carnero tsamabora mawatai.
19 ¡Min akinnon ixonra en mia yokatai Ibó,
tsoa jonibi jain jaama mainmea xobi, itan ja mainmea niibora
bari xanan keyokin menoke!
20 ¡Weanbo tsosinketian,
itan bari xanan pastobo menoaitianra,
ináatima yoinabaonbi min akinnon ixon mia yokákanai!