16
1 Banaciyîshidêkereza omucîmba omu ihêma Daudi àli agurheganyize. Okubundi barherekêra Nyamuzinda enterekêro z’okusingônolwa n’enterekêro z’omurhûla. 2 Erhi Daudi àyûsihâna ezo nterekêro, agisha olubaga oku izîno lya Nyakasane. 3 Cazînda agabira bene-Israheli ebiryo: ngasi mulume na ngasi mukazi bakazihâbwa omugati muburungusè, ecihimbi c’omugati gw’obununîrizi gwa mabo n’ecitumbura c’emizâbîbu myûmu.
Abaleviti bàyimba irenge lya Nyakasane
4 Daudi ahira abaleviti baguma b’okurhumikira embere z’omucîmba gwa Nyakasane, mpu bagashânize, bakuze banahè Nyakasane Nyamuzinda w’Israheli irenge. 5 Azafi akazibahabûla na Zakariya ye wakâgimurhabâla. Yeziyeli, Shemiramoti, Yehiyeli. Matitiya, Eliyabu, Benaya, Obedi-Edomu na Yaiyeli bakaziziha ennanga n’enzenze, naye Azafi akazivuza ebyûma by’omulinga bilongîre bwenêne. 6 Abadâhwa Benaya na Yaziyeli bakazibûha emishekera burhahusa embere z’omucîmba gwa Nyakasane. 7 Olwo lusiku Daudi yêne ye murhangiriza asinga Olwimbo lw’okukuza Nyakasane, aluhà Azafi mpu aluyimbe haguma na bene wâbo, baderhe, mpu*16, 7 Olwo lwimbo lushushire olulanga lwa 105; 96; 106.:
8 Mukuze Nyakasane, muyâlîze izîno lyâge;
muderhere ebijiro byâge by’enkwîra embere z’abantu.
9 Mumuyimbire, mudumûle oluzihwa embere zâge,
murharhamaga n’okuganîra ebirhangâzo byâge.
10 Izîno lyâge ly’irenge, lyo imerero ly’obukuze bwinyu,
bwo burhûlirize bw’emirhima y’abantu balongereza Nyakasane.
11 Muyêrekere emunda Nyakasane Ogala-byoshi ali,
mukaziyôrha mulongereza obusù bwâge.
12 Mukengêre ebisômerîne ajizire,
eby’okurhangâza n’okutwa emmanja kw’ekanwa kâge.
13 Binjikulu b’Israheli bo bâli barhumisi bâge,
bene Yakôbo bo bâli bîshogwa bâge.
14 Nyakasane yêne Nyamuzinda wîrhu;
Yêne ye mutwî w’emmanja w’igulu lyoshi.
15 Mukazikengera endagâno yâge ensiku zoshi,
Akanwa kâge kabà kimâna kuhika oku maburhwa cihumbi.
16 Kalya kanwa àfundikaga bo na Abrahamu,
erya ndahiro àlahiriraga Izaki.
17 Kalya agwîkaga kashuba irhegeko kuli Yakôbo,
kanabà ndagâno y’ensiku n’amango kuli Israheli.
18 Bulyâla aderha, erhi: Nakugabira ishwa lya Kanâni,
bishube byo binyu birugu by’omwîmo.
19 Amango bàciri banyi,
amango barhàli baciluga banabà bigolo eyo mwa bene.
20 Amango bakazâgijà babunga,
batwîka mwâmi bashige wundi.
21 Ci kwône ntâye Nyamuzinda àzigire abarhindibuza,
ciru banarhuma hajira abâmi abâna.
22 Mpu: Murhahîra mukahuma oku nshâgi zâni,
mpu: murhahîra mukashunga abalêbi bâni olûnu!
23 Mwe bantu b’igulu lyoshi, yimbiri Nyakasane,
mukazimanyîsa bwaca bwayira oku kuciza aciza.
24 Irenge lyâge muliganîre omu karhî k’ab’emahanga,
ebi àjizire by’okurhangâza mubimanyîse omu mashanja goshi.
25 Bulya Nyakasane ali mukulu, anakwânîne ajè irenge.
Akwânîne ayôbohwe kulusha abandi banyamuzinda boshi.
26 Bulyâla banyamuzinda w’abapagani linali ibumba,
Nyakasane yêhe ye wajiraga amalunga.
27 Obwâmi n’obumoleke bimushokolîre,
entebe yâge buhashe n’obulangashane buyirikwo.
28 Mwe bantu b’igulu lyoshi,
muyâlîze irenge lyâge n’obuhashe bwâge.
29 Yîshi muyâlîze irenge lyâge,
mulêrhe entûlo zinyu embere zâge.
Muyûnamire oku idaho embere za Nyakasane,
amango ayêrekana obwimâna bwâge.
30 Mujugume embere zâge, mwe bihugo mweshi,
igulu àlizibuhize mpu lirhagihuligana.
31 Amalunga gacîshinge, n’igulu lishembuke.
Baderhe omu mashanja goshi, mpu: Nyakasane ye Mwâmi!
32 Enyanja ekûnguze haguma n’ebimuli byoshi:
Amashwa gashagaluke haguma n’ebimuli byoshi.
33 Emirhi y’emuzirhu ebande orhuhababo rhw’omwîshingo
embere za Nyakasane, bulya ayîshitwira igulu olubanja.
34 Mukuze Nyakasane bulya ali mwinjà,
obuzigire bwâge buli bw’ensiku n’amango.
35 Mumuyâkûze, mpu: Nyamuzinda Mucunguzi wîrhu, orhucize,
orhulîkûze oku mashanja g’ihanga onarhushûbûze.
Hano rhukola rhwakukuza, rhwakaziderha Izîno lyâwe litagatîfu,
rhucîshingire okukugashâniza.
36 Ayâgirwe Nyakasane, Nyamuzinda w’Israheli,
mukazimuvuga omunkwa, ngasi mango.
N’endêko yoshi yàyakûza, mpu: Amen! Aleluya!
Mukuze Nyakasane!
37 Cazinda Daudi arhegeka Azafi na bene wâbo mpu babêre aha burhambi b’omucîmba gw’endagâno ya Nyakasane, bakazirhumikira embere ly’omucîmba ngasi lusiku nk’oku byanali birhegesirwe. 38 Agoshôla na Obedi-Edomu haguma na bene wâbo makumi gali ndarhu na munâni mpu bakazilanga emihango, haguma na Obedi-Edomu, mugala wa Yedutuni na Hosa. 39 Daudi aha amudâhwa Sadoki n’abandi badâhwa bene wâbo omukolo gw’okurhumikira e mbêre ly’ihêma lya Nyakasane oku ntondo ya Gabaoni, 40 mpu bakaziyôrha barherekêra Nyakasane enterekêro z’okusingônolwa oku luhêrero ngasi sêzi na bijingo, n’okuyûkiriza ngasi mikolo enayandisirwe omu irhegeko Nyakasane àhâga Israheli. 41 Bâli bo na Hemani, Yedutuni n’abandi bantu bâli bacîshozirwe kwâgo kwâgo mpu bakazikuza Nyakasane, bulya obuzigire bwâge buli bw’ensiku n’amango.
42 Hemani na Yedutuni bàgwêrhe omukolo gw’okubûha emishekera n’emijegereza n’ezindi nzihwa z’abazihi zanakagikolesibwa oku kununîsa enyimbo z’obugashânize. Bagala ba Yedutuni bâli balanzi ba mihango. 43 Cazînda ngasi muguma ashubira emwâge. Daudi naye ashubira emwâge agendisuhira ab’aha mwâge obwangà.