1 Okubundi Yûda anaciyumva badwîrhe baderha olwa Abaroma*8, 1 Abaroma barhegeka Abayahudi omu mwâka gwa 63 embere ly’okuburhwa kwa Yezu Kristu.: Oku babà bantu bazibu bajira emisî bwenêne; banacîyêrekane binjà oku bantu bashimbire enjira zâbo oku bânajire obwîra haguma na ngasi boshi bayishire emunda bali mpu bayumvanye n’oku bali bantu bagwêrhe emisî minene. 2 Bamuganîrira okuhimana kwâbo n’oku balwîsagya Abagalasiya n’oku babahimaga banabajira barhumisi bâbo. 3 Ngasi byoshi banajizire omu Hispaniya mpu barhôle ecihugo câyo c’amarhale n’amasholo gàbâgayo, kandi na kurhi omu bwîrhonzi bwâbo n’oku kucisegereza kwâbo bahimaga ecôla cihugo n’o bwôla càli kuli n’emwâbo. 4 Kuguma n’ababî bayîshigibalwîsa kurhenga omu cihugo c’ihanga babalunda oku idaho babahima loshi, n’abandi banakazibahongera ngasi mwâka. 5 Bahimire erhi badwîrhe balwa, mwâmi Filipo na Perseo mwâmi w’e Kitimu na ngasi banacîshomize okuyanka emirasano mpu babalwîse babahima banabarhegeka. 6 Antiyokusi ali mwâmi mukulu w’omu Aziya mpu abarhabâlira agendibalwîsa na njavu igana na makumi abirhi abalwîsa oku nfarasi, ebihêsi n’engabo mwandu, banacimugonya bwinjinjà. 7 Yêne bamugwârha mugumagumà banacimusêza okukazibahongera ye n’abayîmaga e nyuma lyâge empongano nyinji, mpu akazibahà abajà, abahè n’oluhande lw’ecihugo câge. 8 Kwo kuderha cihugo ca Hindiya, Mediya, Lidiya byo byàli bihugo binjà omu bihugo byâge byoshi n’erhi ayusibaha byo nabo bàbîha mwâmi Ewumene. 9 Abà omu Bugereki banacikomekera badwîrhe n’omuhigo gw’okumalîra Abaroma cikône Abaroma bamanya ogwo mwanzi. 10 Bamurhumira murhambo muguma n’engabo yâge abatulako entambala, abanigûzamwo mwandu ayisha adwîrhe bujà abakazi bâbo, abâna bâbo, abanyaga ebirugu ecihugo ahongola namahukulu gâbo n’abantu b’eyôla munda babajira bajà kuhika bunôla. 11 Ngasi gandi mâmi ga hano igulu erhi ngasi g’omu nyanja gacîshomagya okubahagaza boshi babahima banabarhegeka, ci basêza obwîra n’abîra babo na ngasi balirhûlwîre.

12 Ci oku bîra bâbo na ngasi bacîkubagira bo kulanga balanga obwîra haguma nabo, babajire barhegesi b’amâmi gabayegire ciru n’aga kuli na ngasi abakazagiyumva izù lyâbo banajugume. 13 Oyu balonza okurhabâla mpu lyo ayîma anayîme n’oyu balonzize okuyîmûla banamuyîmûle. Bakola babà bantu ba buhashe bunji bwenêne. 14 Ciru bakayôrha ntyôla, ntâye muli bo oderha mpu akola ayambala ecimanè acîhundikîre n’ecishûli c’akaduku mpu naye alimbe. 15 Basinzire akagombe na ngasi lusiku bagula magana asharhu na makumi abiri badêkaho mpu balole ebiyêrekîre olubaga n’oku bankalulanga. 16 Ngasi mwâka banahîre obuhashe bwâbo omu maboko ga muntu muguma bacîkubagîre mpu arhegeke ecihugo coshi; boshi banayumve oyôla muntu muguma barhajira mujina na bwâgalwa buci ekarhî kâbo.

17 Yûda anacicîshoga Epolemi mugala wa Yowane, mugala w’Akosi boshi na Yasoni mugala wa Eleyazari anacibarhuma e Roma mpu bagendinywâna bânajire obwîra boshi n’Abaroma. 18 Na mpu lyo babakûla omu bujà ebwa kubà bamâbona oku Abagreki babajizire bajà, bàhizire Israheli omu bujà. 19 Ba nacilikûla obo bàjà e Roma ci enjira yalîha; erhi bahika e Kagombe banaciyanka akanwa baderha mpu: 20 Yûda Makabeyo, abalumuna n’olubaga barhurhumire, bayandisire mpu rhunywâne rhunayumvanye omu murhûla rhweshi lyo nîrhu rhuganjirwa e karhî k’abà mwayumvinye n’abajizire obwîra mweshi nabo. 21 Okola kwasîmîsa abagula b’ihano likulu. 22 Alaga empamîso y’olwandiko Abaroma bakôlôlaga omu cûma c’amarhale banalurhuma e Yeruzalemu mpu lubè cimanyîso c’okola kunywâna n’ogwôla murhûla emw’Abayahudi:

23 «Iragi oku Baroma n’oku Buyahudi bali oku budaka n’omu nyanja, ensiku n’amango. Kulî nabo engôrho n’omushombanyi. 24 Abaroma bakârhêrwa bwa burhangiriza nîsi erhi baguma omu bîra bâbo omu cihugo obuhashe bwâbo bunahisire hoshi, 25 ishanja ly’Abayahudi linabarhabâle nk’oku banahashire muli agôla mango; 26 barhahè abashombanyi nîsi erhi okubarhabâla n’oli engano, oli emirasano oli enfaranga, oli amârho nk’oku banalagânîne e Roma. Kukwânîne Abayahudi bashimbe eyôla mihigo yâbo buzira kulinda luhembo luci. 27 Kwo nakuguma erhi ishanja ly’Abayahudi lyankarhêrwa Abaroma banababwîra n’emisî yâbo yoshi nk’oku amango ganadesire. 28 Buzira kuhà abandi barhabâlwa oli engano, oli emirasano, oli nsaranga ciru amârho nk’oku banalaliraga oku banarhôlaga emihigo e Roma; banashimbulula eyôla ndagâno buzira kurhebana. 29 Ebyo binwa byàli omu ndagâno Abayahudi bajiraga hagma n’Abaroma. 30 Ci omu mango ga nyuma erhi baguma nîsi erhi abandi bakâlonza okuyûshûla kandi erhi okunyihya ebindi binwa kuli ebyôla, banajira nk’oku banalonzize na ebi bankanayumva banyihize kandi erhi kuyûshûla ebyôla byoshi binarhôlwe buzibu. 31 Oku mabî mwâmi Demetriyusi abajirire rhwamâmuyandikira muli ebîra binwa ‘Carhumaga warhindibuza Abayahudi n’obwôla bali bantu rhunywânîne nabo kandi banali bîra bîrhu?’ 32 Bakâshub’ikâcîduduma oku wabarhindibuzize rhwanabagwâsa omu mirenge rhunakulwîse akabà ebulambo nîsi erhi omu nyanja.»