1 Omu mwâka gwa igana na makumi arhanu na muguma, Demetriyusi mugala wa Seleukusi anaciyongoloka omu Roma, anacijà haguma n’engabo yâge omu lugo luguma lw’omu nyanja, acîjiramwo mwâmi. 2 Erhi abà amâshubihika ntyôla omu bwâmi bw’ababusi bâge, abasirika banacirhuluba Antiyokusi na Lisiasi banacibahekeraya. 3 Erhi bamumanyîsa okwôla, anaciderha, erhi: «Ciru ntabonaga obusù bwâbo». 4 Okubundi engabo yanacibayîrha na ntyo Demetriyusi ayîma yêne oku bwâmi bwâge. 5 Okuhandi ngasi banali bantu ba ndyâlya omu Israheli banaciyisha bajà emwâge erhi baherhwe na Alkimi owakazagilonza okubà mudâhwa mukulu. 6 Banacirhondêra babêshera olubaga emunda mwâmi ali banacimubwîra mpu: «Yûda na bene wâbo bayîsire ngasi banali bîra bâwe boshi na nîrhu rhwenene arhulibisireko omu cihugo. 7 “Orhumage bunôla omuntu mwîkubagirwa agendicibonera yênene agôla maligo goshi barhujirîre n’oku basherêzize ecihugo ca mwâmi anahana abôla banyankola maligo kuguma na ngasi bandi babarhabâla boshi”».

8 Mwâmi anacicîshoga Bakidesi muli balya banali bîra ba mwâmi, abâga murhegesi w’omu cihugo ciri olundi lunda lwa olwîshi ali muguma w’omu barhambo bakulu ba mwâmi na w’omu bikubagirwa bâge. 9 Anacimurhuma boshi haguma na Alkimi erya ndyâlya ayiyîmanza mudâhwa mukulu haguma n’okumuhà obuhashe bw’okucîhôla kuli Bene Israheli. 10 Erhi babà bamârhôla enjira yâbo, banaciyisha n’engabo nyinji omu cihugo ca Yûda, banacilika entumwa zajà ema Yûda na bene wâbo mpu bajibabwîra ebinwa by’omurhûla gw’obunywesi. 11 Ci bôhe erhi babona oku bayishire n’engabo nyinji babula kuyêmêreza ebinwa byâbo. 12 Ci kurharhumaga abandisi barhali banyi barhajà emunda Alkimi boshi na Bekidesi bali babahè amadôso oku biyêrekîre oburhegesi. 13 Na omu Bene Israheli Abahasidimi babà ba burhanzi omu kuhûna omurhûla 14 bulya baderha mpu: «Omudâhwa w’omu bûko bw’Aroni ayîshire n’eyôla ngabo y’abasirika, mpu arharhulenganye». 15 Anacibabwîra emyanzi y’omurhûla ciru anacigashirabo erhi: «Rhurhabajire akantu kabî oli mwenene, oli abîra binyu». 16 Banacimuyêmêra, ci agwârha bantu makumi gali ndarhu muli bo abayîrha muli olwo lusiku lônene nk’oku ebinwa by’amandiko binadesire e erhi: 17 «Bashandâza emirhumba y’abatagatîfu bâwe n’omukò gwâbo gwabulagw’eburhambi bwa Yeruzalemu na ntâye wahali mpu ababishe». 18 Okubundi olubaga loshi lwarhondêra okubayôboha loshi lwanageramwo omusisi mpu: «oli okuli oli obushinganyanya ntâbo ekarhî kâbo, bulya bavunyire endagâno zâbo n’ibango balahiraga».

19 Bakidesi anacirhenga e Yeruzalemu ajihanda e Betizeti; kurhenga ahôla arhuma mpu bajigwârha balya boshi banayâkaga omu ngabo yâge kuguma n’abandi baguma baguma ba omu lubaga, na erhi abà amâbayîrha abakwêba omu nyenga mpamu. 20 Erhi abà amâhà Alkimi ecihugo câge amânamusigira ecihimbi c’engabo yâge mpu bamulange, Bakidesi anacishubira emunda mwâmi ali. 21 Alkimi anacicihangana okukomeza obudâhwa bwâge. 22 Ngasi boshi balya banakazâgilêrha akabôlo omu lubaga bamushiga, boshi bayîma omu Buyahudi bahenya n’amaligo manji omu Israheli. 23 Erhi abona oku amabî Alkimi n’abâbo badwîrhe bajirira Bene Israheli gali manji kulusha aga abapagani, 24 Yûda arhangira okushubija azungula omu cihugo c’e Buyahudi coshi ajà acîhôla kuli ngasi balya banamutwîkaga boshi akabacika okucilumira omu cihugo.

25 Erhi Alkimi abona oku Yûda akola muzibu na bene wâbo, na erhi abona oku ntâko ankabagagaja ashubira emunda mwâmi ali agendi bashobeka kuli binji bwenêne. 26 Mwâmi anacirhuma Nikanori muguma w’omu barhambo bâge bakulu, muntu wali mushombanyi bwenêne w’Israheli erhi anahîragwe irhegeko mpu amalîre olubaga loshi7, 26 Lolà 3, 38-41; 2 Mak 8, 8-29.. 27 Erhi ahika aha Yeruzalemu anadwîrhage engabo nyinji, Nikanori arhengigendiganîza Yûda na bene wâbo n’ebinwa by’olubohôlolo: 28 Erhi harhabaga okulwa ekarhî kinyu nâni. Nayîsha na bantu basungunu bônene nti nâni nyishimulolako. 29 Anacijà ntyo emunda Yûda ali, banacilamusanya n’omurhûla ci abasirika bali hôfi hokugwârha Yûda. 30 Erhi ayumva omurhego Nicanori amujirîre omu kumuyîshira n’ebinwa by’olubohôlolo, Yûda afuduka acîyêgûla arhanacilonzagya okucimubona bundi. 31 Nikanori abona oku omurhego gwâge gwamanyîkîne anayisha n’engabo yâge akola alilwîsa Yûda, lwanacibumbana hôfi na Kafarisalama. 32 Hôfi bantu magana arhanu omu bantu ba Nikanori banacifà, abasigalaga bashandabana omu cihugo ca Daudi.

33 Enyuma ly’okola, Nikanori anacisôkera oku ntondo, ya Siyoni na baguma omu badâhwa banacijà emunda ali boshi na bashamuka banji b’omu lubaga mpu bamulamuse na omurhûla banamuyêreke enterekêro za kanwa mwâmi arhumire. 34 Ci yêhe abashekera, abahemula anababwîra ebinwa bigalugalu anacibahigira erhi: 35 Akabà Yûda n’engabo yâge arhahanyirwi honahalya omu nfune zâni amango nayîsha omu murhûla nanyôce eyîra nyumpa. Anacicîkwêba embuga n’oburhè bunene. 36 Abadâhwa banacishubira omu nyumpa, bayîmanga embere z’oluhêro n’ecibula baderha omu kuvugumula emirenge erhi: 37 Yâgirwa wêne wacîshogaga eyîra nyumpa mpu ekazirherekêrwa izîno lyâwe, na mpu ly’olubaga lwâwe lubona enyumpa y’okukakushenga n’okukusengera. 38 Wênene ocihôle, oyûla muntu n’engabo yâge alimbira, boshi bayîrhwe n’engôrho. Okengêre okwôla bakujirire orhanazigaga balama!

39 Nikanori arhenga e Yeruzalemu akanya ajihanda hôfi na Beteroni na bantu ba cikembe Banya-Sîriya banaciyisha emunda Yûda ali. 40 Naye oku bwâge, ajiyûbaka ecihando hôfi na Adasa n’engabo ya bihumbi bisharhu, anacigenda ashenga, erhi: 41 Abâli barhume n’omwâmi w’Abanya-Sîriya bulya bakujâcire, Yâgirwa, Malahika wâwe anacibayîshira anacibaniguzamwo bantu bihumbi igana na makumi gali munâni na birhanu. 42 Omalîre mâshi enôla ngabo eri ahâla mbêre zâwe lyo abandi bamanya oku anaderhire kubî ahatagatîfu hâwe, onamutwîre olubanja nk’oku obubî bwâge bunali.

43 Engabo lwabumbana, omu nsiku ikumi n’isharhu z’omwêzi gw’ikumi na kabirhi, n’omurhwe gwa Nikanori_gwahombekwa; yênene akumba wa burhanzi omu ntambala. 44 Erhi engabo zibona oku Nikanori amâfà bajandika emirasano yâbo bakûla omulindi. 45 Abayahudi babaminika mulegerege goshi e Adasa kuhika e Gazara banayisha babûha emishekera banayishekêreza. 46 Kurhenga omu bishagala byoshi bya Yûda n’eburhambi mwashagamuka abantu bagorha balya Banya-Sîriya babajako bakola babatumirha boshi banakumba n’engôrho kurhaderhaga mpu hajira ciru ow’enshangu wafulumuka, ciru n’o muguma. 47 Bagugumba ebirugu by’abôla bahimagwa kuguma n’ebiryo bali bacîyikire; na erhi babà bamâtwa irhwe lya Nikanori n’okuboko kwâge kulyo kulya akazâgilêgesa bayisha babidwîrhe banakabilengereza emunda Yeruzalemu ali. 48 Olubaga lwanacisîma bwenêne n’olwôla lusiku balukuza nka lusiku lwa mwishingo munene. 49 Bahiga mpu olwôla lusiku lukakuzibwa ngasi mwâka omu nsiku ikumi n’isharhu z’omwêzi gwa Adari. 50 Ecihugo ca Yûda carhangiba n’omurhûla nsiku nyi.