1 Amango abantu b’omu cishagala citagatîfu bali n’omurhûla munene bwenêne, banakazagishimba boshi amarhegeko bwinjà bwinjà erhi bushiru bw’omudâhwa Oniyasi burhuma, na kulya ashombaga amabî; 2 ciru n’abâmi b’ecihugo bakazikuza ahôla hantu hatagatîfu omu kurhumayo ensholôlo za ngasi lubero. 3 Ciru na Selekusi, mwâmi w’e Aziya akazâgirhumayo oku birugu byâge mpu bagulemwo ngasi byankanakwânana enterekêro. 4 Ci kwônene hanacizûka ndyâlya nguma izîno lyâge ye Simoni w’omu bûko bwa Bilga*3, 4 Bilga = Benyamini w’omu mulala gw’abadâhwa., erhi ajira omukolo gw’okulanga aka-Nyamuzinda, anacilongôla n’omudâhwa mukulu oku biyêrekîre ecibuye càli omu lugo. 5 Ebwa kubà arhankahimire Oniyasi, akanya agenda emwa Apoloniyusi mugala wa Tarseya ye wali murhambo na musirika omu Sele-Sîriya n’omu Fenisiya. 6 Agendimuvuhûlira oku omu mbîko ya aka-Nyamuzinda muli obuhirhi mwandu n’oku ebijamwo nabyo biri binji, birhankagêrerwa kw’ebi bakolêsa oku nterekêro n’oku kwanahashikana e­byôla byoshi bije omu maboko ga mwâmi. 7 Erhi abà amâjà emunda mwâmi ali, amushambâlira kuli obwôla bugale nk’oku banamuganîrira kwoshi, naye acîshoga Heliyodori ye wali murhindisi mukulu w’ebirugu bya mwâmi, anacimurhuma amuhà irhegeko ly’okuyanka ebyôla birugu. 8 Heliyodori anacihira njira, abà nk’owajirhangula ebishagala by’e Sele-Sîriya n’e Fenisiya n’obwo kwàli kugendijira okwôla mwâmi amurhegekaga. 9 Heliyodori erhi ahika aha Yeruzalemu, omudâhwa mukulu w’olwôla lugo anacimuyankirira nka mwîra. Okubundi arhondêra okushambâla ehi banamubwîraga, anamanyîsa ecimudwîrhe anadôsa erhi ko binali okwôla. 10 Omudâhwa mukulu amumanyîsa oku ebiri omu mbîko biri by’abakana n’enfûzi, 11 oku ensaranga zirimwo ziri za Hirkani mugala wa Tobiya, muntu mukengwa bwenêne omu lugo n’oku obwôla bugale boshi bamubwîraga bwanahika omu mafundo magana anni ga nsaranga na mafundo magana abiri ga masholo. 12 Amumanyîsa oku ciru na kandi kurhankahashikana okubabaza balya banacîkubagira ahatagatîfu h’aka-Nyamuzinda kakengwa omu igulu lyoshi.

13 Ci kwône Heliyodori aderha oku liri irhegeko lya mwâmi, n’oku ezôla nsaranga zigwâsirwe okujà omu mbîko ya mwâmi. 14 Erhi abà amâtwa olusiku, agenda analaganya oku ashubigaluka ayishilola kurhi byabîrage. Olugo lwanayumva amazibu manji bwenêne. 15 Abadâhwa banacifukamiriza embere z’oluhêrero erhi banayambîrhe emyambalo yâbo y’obudâhwa, banacirhondêra okushenga olya wajiraga irhegeko ly’okukazibîsa, mpu yêne alangâge ebyôla birugu bya bene biri omu mbîko. 16 Erhi omuntu analolaga oku busù bw’omudâhwa mukulu, anayumve alumirwe oku murhima bwenêne, bulya oku busù bwâge bwàli buzinzibîre kwakazâg’imanyîsa amalumwa gamuli omurhima. 17 Okulembaguka kwâge, oku omubiri gwâge gwakazâgigeramw’omusisi, okwôla konene kwakazimanyîsa ngasi wamulolakwo embaka zimuli emurhima. 18 Abantu b’omu lusò boshi bakazishagamukira embuga barhenga omu nyumpa zâbo mpu bagendisâlirira olugo lutagatîfu oluli hôfi h’okuhemukirwa n’okulogorherwa. 19 Abakazi, n’ebifuba birhube n’amasunzu bakashandabana omu njira; abânanyere barhò balya barhalisâg’ijà embuga bundi bakalibirhira omu mihango, abandi bakashonera oku bizimbêro by’enyumpa n’abandi bâgend’ikâhengûliza omu rhubonezo. 20 Boshi n’amaboko bagalambûlire emalunga, bakazishenga n’emirenge. 21 Okwôla kufukamiriza kw’olubaga n’okwôla kula­ka kw’omudâhwa mukulu kwakajira abantu boshi bwonjo. 22 Agôla mango Abayahudi bakazishenga Nyamuzinda Ogala-byoshi mpu alange bwinjà ebirugu by’ekonda-buyêmêre byabikiragwa omu mwâge. 23 Heliyodori naye erhi ali ayûkiriza omuhigo gwa mwâmi.

24 Ciru anali akola ali hôfi n’embîko haguma n’abalanzi bâge, amango Nyakasane w’emirhwe olya orhegeka ebintu byoshi, àcîyêrekanaga n’obumoleke bunene, kuhika ngasi boshi banacîshomagya okujà ahôla, bakalâmbikwa okw’idaho n’emisî ya Nyakasane, barhungwa n’entemu n’obôba bunene. 25 Omu masù gâbo banacibona eciterusi cishonyirwekwo n’omusirika w’ecôbà, ajagalîre ebyâge by’obusirika; cirya citerusi canacîmoga, cahamira emunda Heliyodori ali, canacimubanda emigegere y’emalanga yombi. Olya ntwâli w’omusirika wali oku citerusi ali abonekîne nk’oyambîrhe emirasano y’amasholo. 26 Na muli agôla mango, bâna babirhi ba misole, barhunurhunu, banacimubonekera, bakazilangashana nk’izûba n’emyambalo yâbo yali minjinjà bwenêne; bombi bamugorha eburhambi n’ebundi, barhangira okumushûrha emikoba burhahusa, bamushûrha empîmbo zirhankaganjwa. 27 Heliyodori anacicilunda o­kw’idaho na halya honênè olubwibwi lwamujà omu masù. Bamulengeza bâna­ cimuhira oku nkunda-baniha. 28 Ntyôla oyôla muntu wayishaga aharhîre ebwa nyumpa y’obuhirhi gwârhi yêne, owayishag’abalagazize n’engabo nyinji y’abalanzi, bajà bamujagajaga, bulya arhankacihashire okucîlengeza yênene: ayêrekana ntyôla obuhashe bwa Nyamuzinda.

29 Agôla mango alambikagwa oku idaho n’emisî ya Nyakasane, alikola ali kaduma, arhacigwêrhe ciru na bulangâlire ciru n’abandi ankacicîkubagira. 30 Abayahudi bôhe bakavuga Nyamuzinda omunkwa ye wakuzagya yêne ahantu hatagatîfu hâge, n’aka-Nyamuzinda kali kamâyunjula bwôba n’amatumu, kahinduka hantu ha busîme n’omwîshingo erhi okwôla Nyamuzinda acîyêrekanaga kurhuma. 31 Ho na halya, baguma omu bîra ba Heliyodori, barhangira okuyinginga omudâhwa Oniyasi mpu ashenga Ogala-byoshi ashubizibuhya oyôla oli hôfi h’okurhengamw’omûka.

32 Naye omudâhwa mukulu, omu kuyôboha mpu mwâmi akâcîkêbwa mpu nkaba hali Abayahudi bakemerîne omwambali Heliyodori banamuyîrha, okwôla kwarhuma ashenga mpu oyo muntu afume. 33 Oku acidwîrhe ahâna enterekêro y’okuhûna obwonjo, balya barhabana babirhi bali bayambîrhe emyambalo eshushîne, bashubibonekera Heliyodori banacimubwîra kandi bwimanga mpu: «Okazivuga omunkwa bwenêne emunda omudâhwa mukulu Oniyasi ali, bulya ye orhumire Nyamuzinda akushubiza akalamo. 34 Kuli we wênene, okwôla Nyamuzinda anakurhimbaga okw’idaho, agende ojè wamanyîsamwo emw’abandi boshi obuhashe bwa Nyamuzinda Ogala-byoshi.» Oku bayûs’iderha ntyôla bahirigirha.

35 Heliyodori anacirherekêra Nyamuzinda, analagânana endagâno nnene e­mw’olya wamuhâga akalamo; okubundi erhi abà amâyankirira Oniyasi bwinjà, boshi n’engabo yâge banacishubira emunda mwâmi ali. 36 Akanya ajà amanyîsa emw’abantu boshi emikolo minjà ya Nyamuzinda Mukulu anabonaga omu masù gâge. 37 Erhi mwâmi acîdôsa Heliyodori muntu ndi abwîne okwânîne okurhumwa e Yeruzalemu, naye amushuza erhi: 38 «Akabà ogwêrhe omushombanyi nîsi erhi owundi walonza okulenganya obwâmi bwâwe onamurhume eyo munda, anagaluka erhi bamâmushûrha emikoba, akabà ankagaluka; bulyâla eyôla munda eri emisî ya Nyamuzinda w’okunali. 39 “Olya ôbà omu mpingu ye ôbà ahôla, ye onakabafungira; abâjà yo n’emihigo migalugalu anabatyabule anabaherêrekeze”». 40 Kwo byabîre ntyo oku myanzi ya Heliyodori n’embîko y’ebirugu bitagatîfu.