1 Muli agôla mango, Antiyokusi ayagaluka omu nshonyi, arhenga omu bihugo by’e Persi. 2 Bulya erhi abà amâjà omu lugo luderhwa Persepoli arhangira okugendihagula ebirugu by’aka-Nyamuzinda n’okunyaga olugo, kuli okwo engabo yashagamuka yazukira oku mirasano, Antiyokusi acàndabukwakwo, akubûka n’enshonyi. 3 Amango ali omu cihugo c’Ekbatani bamubwîra kurhi byabîre kuli Nikanori n’oku ngabo ya Timoteyo. 4 Yêshi oburhè bwamugwârha bwalonzimuyîrha, akâlonza kurhi acîhôla oku Buyahudi kuli balya barhumaga ayâka. Arhegeka owajà agendêsa engâlè yâge mpu alikûle buzira kuyimanga lyo bakanya, n’obwo bucîranuzi bwa Nyamuzinda bwàli bumuhârhîne, bulya ayishaga ahiga omu bucîbonyi bwâge erhi: «Hano mpika aha Yeruzalemu, olugo lwoshi nalujira nshinda ya Buyahudi». 5 Ci, Nyakasane Nyamuzinda w’Israheli, abona ngasi kantu, amurhimbakwo erhabonekana erhanayishi bafumu. Oku anayûsihiga ebyôla ayumva amalumwa garhankabona bufumu omunda, bakerêrhera. 6 Okwôla kwo anali ashingânîne, bulya agezize abandi mw’omusisi n’amalibuko ga ngasi lubero, galya garhankamanyiderhwa. Ci obucîbone bwâge burhaderhaga mpu bwankanyihakwo. 7 Ngasi mango, muli obôla bucîbone, erhi n’obukunizi bwâge bwajà bwaluga anayisha ahigira Abayahudi anayisha arhegeka mpu bakanye duba, lêro câligumiza ahirima kw’erya ngâlè yayishaga yabomborogana bulibirha, n’okwôla ahirimaga kwàli kubî kuhika ebirumbu by’omubiri gwâge byoshi byalemala. 8 Owayishaga amanya omu bucîbone bwâge mpu nkaba anarhegeka omulaba gw’omu nyanja, owajaga akengêra mpu nkaba yeki anagerera amarhwehwe g’entondo omu munzâni, lêro akwêbwa okw’idaho, bamujagajagira oku ncingo. Okwo kwayêrekana obuhashe bwa Nyamuzinda embere z’abantu boshi. 9 Ciru omubiri gw’eyôla ndyâlya gwakazirhengamwo emivunyu, oku acizîne, omubiri gwâge gwakazivonyôngoka, eminyafu yakavônyoka omu malumwa manji bwenêne n’akabayo kayishaga kamurhenga mwo kakâyihika engabo yoshi. 10 N’oyôla wayishaga wamanya embere mpu nkaba anahuma oku nyenyêzi z’emalunga, lêro abula ciru owankamuhêka erhi kabayo kâge karhuma.

11 Lêro erhi ayumva yêshi amâyuyûkirwa, arhondêra okurhengamwo bulya bucîbone bwâge, arhondêra okubona ebintu byoshi bwinjà erhi munyuli gwa Nnâmahanga gwakazâgiyûshûla ago malumwa gurhuma. 12 N’ebwa kubà ciru na yêne arhankacilembire ebyôla bihulu, aderha, erhi: «kukwânîne okucîhira idako lya Nyamuzinda, kunali busha okucîgerera kuli ye erhi okucîgerera oku bunyamuzinda*9, 12 «bunyamuzinda» bwa Nnâmahanga, kwo kubà ye walemaga yena rhegeka byoshi; hali obumuntu bwîrhu rhwe bantu rhumushiga bulya rhwahâbagwa obuzîne, rhumoleka obwo bwinjà n’obulenga bw’obunyamuzinda bwa Nnâmahanga Îshe Omugala na Mûka Mwimâna, bwo buguma bwa Nyamuzinda muguma dolodolo, lolà Yesha’yahu 45 bwâge». 13 Ci kwône eyôla ndyâlya yakazishenga Nyakasane orhankacimubabalira, 14 alagânana agôla mango mpu aleka olugo lutagatîfu buzira kadugundu, lulya alibirhiragayo mpu alujira bwâmwa analuhindule nshinda, 15 ye wahigaga mpu kuhika Abayahudi abajire nka Bagreki, mpu irhondo barhabonaga aha babishwa, mpu bakabulirwe erubala bône abâna bâbo nka nyama zikwêbwa erubala mpu ebinyunyi n’ensimba zirye. 16 Alagânana mpu ayishihira enterekêro nyinjinjà muli kalya ka-Nyamuzinda katagatîfu arhangigihagula, mpu ciru agalula binji kulusha birya birugu bitagatîfu ayankaga, mpu yêne agule ngasi binayêrekîre enterekêro. 17 Ciru mpu yêne ahinduke muyahudi anajè agera ngasi hantu n’okumanyîsa obuhashe bwa Nyamuzinda.

18 Kulya kubà amalumwa gâge garharhûliriraga, bulya alikwo akanwa ka Nyakasane, erhi abona oku ntaho acilangâlire, ayandikira Abayahudi agâla maruba gakulikîre gali gayandisirwe nka musengero n’ebinwa byalimwo by’ebîra:

19 «Oku Buyahudi bakengwa, oku banyacihugo, akalamo n’omurhûla gwa mwâmi Antiyokusi. 20 Akabà mweshi muyôsire bwinjà kuguma n’abâna binyu, akabà ebintu binyu bigendesire bwinjà nk’oku mwankanacîfinja, mvuzire omunkwa bwenêne, mpizire obulangâlire bwâni empingu. 21 Oku bwâni niono, ndambukire oku ncingo buzira misî mici, ndwîrhe nakengêra n’ecifufu emurhima obukuze, irenge nabonaga mwanyêreka emwinyu. Ganôla mango narhenga omu bihugo by’e Persi n’obûla namâgogomerwa n’endwâla, mbwîne oku kuli kwinjà okushîbirira omurhûla gwa ngasi muguma. 22 Arhali ebwa kubà namâkumba omurhima, kali ngwêrhe obulangâlire bw’okurhenga muli eyîra ndwâla. 23 Ci, omu kubona amango larha ajanaga e­ ngabo yâge omu bihugo by’enyanya, asiga amanyîsize ndi wankayîma omu byâge, 24 mpu lyo nk’obuhanya erhi bwankayisha, nîsi erhi gundigundi mwanzi mugalugalu, abantu boshi b’omu cihugo erhi bakamanya oku bayîmisire balekijamwo akavango. 25 N’omu kubona oku abâmi rhuyûbakînwe nabo, boshi n’abaluzi b’abalungu, badwîrhe bayunjayunja amango, co cirhumire ndesire oku mugala wâni Antiyokusi ye mwâmi, oyu nakazagisigira banji muli mwe amango najaga nageragera omu bihugo byâni by’enyanya, nambakômêrize ye, nnamuyandikire agâla maruba mayandike ahâla. 26 Mmuhûnyire nnansengîre nti ngasi muguma omu kukengêra aminjà namujirire yêne nîsi erhi n’abandi caligumiza, obukenge mungwêrhekwo munabulange kuli mugala wâni. 27 Bulya ndangâlîre nti akanashimba obulonza bwâni bwinjà, mwalama mweshi naye n’omurhûla.»

28 Ntyôla kwo oyôla kaheza, eyôla ncuku, omu kulabanjira n’amalumwa madârhi, agali nka galya ajaga alibuzamwo abandi, ntyôla kwo afîrîre omu cihugo c’ihanga, afîra omu ntondo, ayîrhwa n’obuhanya budârhi. 29 Filipo wali mwîra wâge wa kurhenga mîra e burho bwâbo, ayisha alusize ecirunda câge ci erhi aciyôboha omugala Antiyokusi, acîyâkira e Mîsiri emwa Ptolemeyo Filometori.