1 Oku bundi Yûda Makabeyo boshi n’abâbo barhondêra okushakûlula aka-Nyamuzinda n’olugo. 2 Bashâba empêro z’abapagani bali bamâyûbaka omu mihanda n’omu hantu hatagatîfu. 3 Ntyo erhi babà bamâcêsa ahantu hatagatîfu, bashubiyûbaka olundi luhêrero, kandi balasha omuliro omu ibuye, bayanka kuli gulya muliro bakagukoleza oku nterekêro, erhi baligi na myâka ibirhi barhajira ntyôla, barhondêra okutumbûsa enshangi, okukongêza amatara, n’okurherekêra emigati. 4 Erhi babà bamâyûsa okwôla, bafukamiriza, bashenga Nnâmahanga mpu mâshi irhondo arhacibarhumiraga mabî ga bene agôla, n’erhi kandi bankashubihirima, mpu mâshi anabahanûle n’olukogo, amanye arhacibahânaga omu maboko g’abashombanyi. 5 Olusiku aka-Nyamuzinda kahemulagwa n’abashombanyi, olwo lusiku lwo kanacêsîbwemwo, zàli omu nsiku makumi abirhi n’irhanu z’omwêzi gwa Kisleu (cambasè). 6 Boshi bageza nsiku munâni erhi bajira olwo lusiku lukulu, nka kulya banajira oku lusiku lukulu lw’Amahêma, bakakengêra oku harhacigera nsiku erhi badwîrhe balâla omu ntondo, omu lwâla nka nsimba z’erubala. 7 Co carhumaga erhi babà bamâyambala ebishâkè n’amashami g’emirhi minjinjà, n’emishugushugu omu nfune, barhondêra okukuza n’enyimbo olya wabahâga obulyo bw’okushub’icêsa ahantu hatagatîfu. 8 Banaciyandika irhegeko, banalimanyîsa omu cihugo coshi mpu ngasi Muyahudi akazikuza ngasi mwâka ezôla nsiku.

9 Byanacibà ntyôla aha kufà kwa Antiyokusi oderhwa Epifani. 10 Rhukola­ga rhwaderha oku biyêrekîre Antiyokusi Epatori, mugala w’eyôla ndyâlya, rhwanashambâla hitya oku mabî gadwîrhwe n’eyôla ntambala.

11 Erhi anajà oku ntebe, ayirukira ajira Lisiyasi murhindisi w’ebintu byâge byoshi, ye wanaligi murhambo w’e Sele-Sîriya n’e Fenisiya. 12 Kulya kubà Ptolemeyo oderhwa Makroni ye wali murhangiriza w’okubona kurhi Abayahudi badwîrhe balibuzibwa, alonza okubarhegeka n’obushinganyanya n’omurhûla. 13 Okwôla kwarhuma agend’ishobekwa bushabusha n’abîra ba mwâmi emunda Epatori ali; na kandi ngasi mango bakazimuderha mulenzi bulya alesire Cipro alangisibagwa na Filometori, n’oku alunganaga na Antiyokusi Epifani, erhi abona oku kuli kwa busha okulama buzira irenge acîhà obwôge afà.

14 Oku Gorigiyasi anabà murhambo w’engabo y’abalwî b’aho ntyâla, arhôla emirhwe y’okujuhwa na ngasi mango akâlonza obulyo bw’okulwîsa Abayahudi. 15 Kuguma naye, abantu b’e Idumeya, bulya bali bagwêrh’enyumpa nzibu nzibu z’okulwîramwo zanali ahantu hinjà, nabo bakayôrhabalibuza Abayahudi; bakayankirira ngasi banakazagiyisha bayâka e Yeruzalemu, bakâyôrha ba­sholoshonza Abayahudi. 16 Abantu ba Makabeyo erhi babà bamâshenga boshi haguma mpu Nyamuzinda abarhabâle, bahamira kuli zirya nyumpa nzibunzibu z’ab’e Idumeya. 17 Bazirhabâlira n’oburhwâli bunene, bazinyaga, banacandabukakwo abakazâgilwîra omu byôgo boshi; bakanigûza ngasi yêshi wanakazâgirhinda omu maboko gâbo, bayîrha bantu bihumbi makumi abirhi na kulusha. 18 Bantu bihumbi mwenda bayâkira omu mitungo ibirhi mizibuzibu bahêkamwo n’ebi bakwâninemwo byoshi. 19 Makabeyo asiga halya Simoni na Yozefu boshi na Zakeyo na ngabo erhali nyi mpu babalinguze, naye akanya aj’ahandi h’okurhabâlira kwa dubaduba. 20 Ci abantu ba Simoni, barhebwa omu kuziga ensaranga na baguma muli balya bali bayâkire omu mitungo. Erhi babà bamâhôngerwa mafundo bihumbi makumi gali nda, baleka baguma muli bo mpu bayâke. 21 Erhi bamanyîsa Makabeyo okwôla byabîre, ahamagala ihano ly’abarhambo bâge, ashobeka balya bantu mpu kurhi bajagiguza bene wâbo, omu kuhongerwa ensaranga balîkûla abashombanyi. 22 Oku bundi anacirhegeka mpu bayîrhe abôla bantu balenganyagya ntyôla, ho na halya arhôla erya mitungo oku yanali ibirhi. 23 Agendêsa bwinjà omukolo gwâge gw’okulwa, ayîrhira muli erya mitungo yombi bantu bihumbi makumi abirhi na kulusha.

24 Ci kwônene Timoteyo olya warhangig’ihimwa embere na Abayahudi, erhi abà amâshubishubûza omwandu gw’abasirika b’omu bindi bihugo amânagend’irhiza abasirika banyakulwîra oku nfarasi omu Aziya, ayisha akola ali humbârhaza Obuyahudi n’emirasano yâge. 25 Erhi bayumva oku ayîruka, abantu ba Makabeyo barhondêra okushenga Nyamuzinda, bacîshîga oluvù o­mw’irhwe, bayambala na sunzu. 26 Agôla mango bali embere za Nyamuzinda, bakazishenga banafukamire embere z’oluhêrero mpu Nyamuzinda arhabâle, mpu abè mushombanyi w’abashombanyi bâbo nka kulya irhegeko linalaganyire.

27 Erhi bayûsa okushenga, barhôla emirasano yâbo bayiyêgûla n’olugo, erhi bahika hôfi n’abashombanyi, bayimanga. 28 Erhi izûba lishalâla, bakoza entambala olunda n’olundi, baguma bacîkubagira bwenêne oburhabâle bwa Nyamuzinda kulusha obulenga bw’amatumu, abandi bacîkubagira emisî yâbo yonene. 29 Erhi entambala ekula abashombanyi babona kurheng’emalunga, bantu barhanu bali oku nfarasi banayisha balaza nka nkuba, bajà embere z’e­ ngabo y’Abayahudi, ezo nfarasi erhi zirimwo ebyûma by’amasholo. 30 Babirhi mulibo erhi babà bamâhira Makabeyo ekarhî kâbo, bamucikiriza n’emirasano yâbo mpu arhag’ibandwa, na muli agôla mango bakaz’ibanda abashombanyi emyampi n’emilazô bahûrha, bayunjula ntemu boshi bagukumuka. 31 Bantu bihumbi makumi abirhi na magana arhanu omu banyakulambagirira amagulu, n’abandi banyakulwîra oku nfarasi magana gali ndarhu bafà ntyo olwo lusiku. 32 Timoteyo ayâkira ahantu hazibuhazibu haderhwa Gazara, aha omukulu w’abasirika bâge w’entwâli ye Kereasi ali. 33 Abantu ba Makabeyo n’oburhwâli bunene bagorha ahôla hazibuzibu nsiku inni. 34 Ebwa kucîkubagira ahôla bali, barhondêra okujà­cira Nnâmahanga n’okuderha ebinwa bigalugalu. 35 Erhi olusiku lwa karhanu lucânûla, bâna ba misole makumi abirhi omu bantu ba Makabeyo erhi balumwa n’ebyôla bijâci, bahamira n’oburhwâli bw’akirumè oku côgo n’obukali buli nka bwa nsimba, bayisha batumirha eyi n’eyi ngasi yêshi banashimânaga e­ mbêre zâbo. 36 Abandi bashona barhêra abôla bali bagosirwe omu kugerera olundi lunda, badûlika omuliro kulya mitungo batwâna ebibêye, bayôkerakwo balya bakazâg’ijâcira Nnâmahanga ozîne; abandi babasa enyumvi, bahà eyindi ngabo yalisigîre aha yagera, banacinyaga lulya lugo. 37 Erhi bashimâna Timoteyo acîfulisire omu iriba, bamuyîrhiraho boshi na mwene wâbo Kereasi na Apolo­fani. 38 Erhi bayûs’ihima ntyo, bakuza Nnâmahanga n’enyimbo banavuga omu­nkwa emw’Owabumbaga Israheli minjà anamuhà oburhwâli.