11
Entumba ntanzi ya Lisiyasi
1 Erhi kugera nsiku nsungunu, Lisiyasi wali mulezi na mwene wâbo mwâmi, na mwimangizi w’amahano g’oburhegesi bwâge goshi, ashombwa erhi ebyôla byàbâga birhuma, 2 anacishûbûza hôfi ha bantu bihumbi makumi gali munâni n’abanyakulwîra oku nfarasi bâge boshi anacijà emw’Abàyahudi, erhi alangâlîre mpu ahindula ecihugo citagatîfu cibè cihugo cirhegeke n’Abagreki. 3 Mpu ayishijira aka-Nyamuzinda kakâjira empongano nka kula ezindi nyumpa z’oburherekêre zinajira omu cihugo n’okuguza ngasi mwâka ecikono c’omudâhwa mukulu; buzira kulola obukulu n’obuhashe bwa Nyamuzinda. 4 Ayishaga acîkubagîre ebihumbi by’abasirika bâge bagenda n’amagulu, n’ebihumbi by’abandi bagenda oku nfarasi n’amakumi gâge gali munâni g’enjavu.
5 Erhi ahika omu Buyahudi, anahika hôfi ha Betisuri, lugo luyûbake buzibu luli hantu ha bilometri birhanu kurhenga e Yeruzalemu, anacicigorha. 6 Erhi abantu ba Makabeyo bayumva oku Lisiyasi anagosire olugo lukomezibwe ntyôla, boshi n’olubaga mpu Nyakasane abarhumire Malahika wâge ayishiyôkola Israheli. 7 Makabeyo ye murhangiriza arhôla emirasano yâge anacibwîra abâbo mpu bahale amagala bagendirhabâla bene wâbo. 8 Boshi bayimuka câligumiza n’oburhwâli bunene, n’erhi ahika halya bakazâg’ilangira Yeruzalemu, nyakulwîra oku nfarasi oyambîrhe ebyêru ababonekera, abajà embere abashokolera ayisha agarambanya emirasano y’amasholo. 9 Oku bundi boshi banacikuza Nyamuzinda w’obwonjo, banaciyumva oburhwâli kulusha omu murhima gwâbo, bantu bali n’oburhwâli bw’okulwîsa arhali abantu bônene ci na zirya nsimba nkali n’okurhulungula ebyôgo by’ebyûma. 10 Banaciyisha baarhabîre kanyamulongo k’amatabâro na bulya burhabâle bwâbo bwarhenga e mpingu, oku bwonjo bwa Nnâmahanga. 11 Caligumiza nka kula entale enarûkûza bacîrhulumbika oku bashombanyi, babalambikamwo bantu bihumbi ikumi na ciguma, na banyakulwîra oku nfarasi, cihumbi na magana gali ndarhu, n’abandi babakûlakw’omulindi. 12 Banji mulibo bayâka erhi banali babande, bakazijandika emirasano yâbo; Lisiyasi yênene ashugunuka n’enshonyi nnene bwenêne.
Lisiyasi ayumvanya n'Abayahudi. Amaruba anni g’obumvîkane
13 Ci kwône bulya arhâli muntu obuzire obukengêre, arhanya kuli okwôla anahimagwa abona oku Abayahudi barhankahimwa bulya Nyamuzinda adwîrhe abalwîra. 14 Arhumiza mpu bayumvanye omu bushinganyanya, alagânana mpu agend’iyêmêza mwâmi abè mwîra wâbo. 15 Makabeyo anaciyêmera ebyôla Lisiyasi alagânaga, erhi bunguke bw’olubaga burhuma. Ebwa kubà ngasi ebi Makabeyo anali ayandikire Lisiyasi biyêrekîre Abayahudi, mwâmi anacibiyêmêra.
16 Amaruba Lisiyasi aliyandikîre Abayahudi kwo gali mayandike ntyâla:
«Omusingo gwa Lisiyasi oku lubaga lw’Abayahudi: 17 Yowane na Absalomu mwâli muntumîre ene babà bamampà galya maruba mwâli mwamâkondorakwo, bampûna mpu ngalule amashuzo kuli ebyôla binwa. 18 Ngasi byoshi byanali bigwâsirwe okuhika emwa mwâmi namumanyisizebyo anayêmêra ngasi byankanayêmêrîrwe. 19 Erhi mwankasera oku bwôrhere bw’ecihugo nâni nanacihangâna okummulongeza birya binakwânîne. 20 Oku hindi by’obukomokomo, narhegesire abantu mwâli murhumire boshi n’ezâni ntumwa nti mubishambâlekwo mweshi. 21 Muyôrhe bwinjà. Mwâka gw’igana, na makumi anni na munâni, omu nsiku makumi abirhi n’inni, omu mwêzi gwa Dioskore.»
22 Amaruba ga mwâmi Antiyokusi kwo galidesire ntyâla:
«Omusingo gwa Mwâmi Antiyokusi kuli mwene wâbo Lisiyasi! 23 Ebwa kubà larha acijirire omu nnâma, rhwono omu kulonza nti balya boshi banali b’omu bwâmi bwîrhu bakole emirimo yâbo n’omurhûla, 24 n’omu kuyumva oku Abayahudi barhayêmîre nk’oku larha anali alonzize, mpu barhôle engeso z’obugreki, ci mpu balonzize okuyôrhana engeso zâbo bône na bône, banakaziyôrha bashimba amarhegeko gâbo, 25 omu kulonza nti olôla lubaga nalwo lurhabonaga kavango kaci, rhurhegesirwe nti rhubagalulire aka-Nyamuzinda kâbo, banalame omu kushimba obwôrhere bwa bashakulûza bâbo. 26 Kuziga kwanabà kwinjà okurhuma emwâbo entumwa yajibahà omukono, lyo hano bamanya obulonza bwîrhu, babè n’omurhima gw’obulangâlire, banahiribanye emirimo yâbo n’obushagaluke.»
27 Amaruba ga mwâmi oku Buyahudi ko gali gayandisirwe ntya:
«Oku Nnâma y’Abayahudi, n’oku bandi Buyahudi, omusingo gwa mwâmi Antiyokusi. 28 Akabà munayôsire bwinjà, bulya ko rhunacîfinja, na nîrhu rhwêne rhuzibubire. 29 Menelasi arhumanyîsize omwîfinjo gwinyu gw’okuhiribanya emirimo yinyu, 30 abankanalikûla kuhika oku lusiku lwa makumi asharhu lw’omwêzi gwa Santike, (kasi-kîru kazinda) rhubalaganyize oku babà n’omurhûla. 31 Abayahudi bakazilya ebiryo byâbo, banashimbe amarhegeko gâbo nk’oku byanali embêre, buzira kubamwo owalibuzibwa mpu anavunyire irhegeko lilebe omu kurhalimanya. 32 Mmurhumîre Menelasi nti ayishimmubwîra murhimûkwe. 33 Muyôrhe bwinjà. Mwâka gw’igana na makumi anni na munâni omu nsiku ikumi n’irhanu z’omwêzi gwa Santike (mwêzi gwa kabirhi).»
34 Abaroma nabo banaciyandikira Abayahudi amaruba gali mayandike ntyâla:
«Kwintusi Memiyusi na Titusi Maniyusi, barhambo b’Abaroma, oku lubaga lwoshi lw’Abayahudi, musingo! 35 Ebintu Lisiyasi mwene wâbo mwâmi abayêmêreraga nîrhu rhubayêmêrîrebyo. 36 Na kuli birya anaderhaga mpu arhang’idôsa mwâmi, murhurhumire muntu muguma buzira kulegama, hano mubà mwamârhang’ibigeramwo, lyo rhubihugûlira mwâmi okunamukwânîne, bulya rhwajà e Antiyokiya. 37 Kuziga mujire duba, mulike entumwa, bayishirhumanyisa nîrhu entanya zinyu. 38 Muyôrhe bwinjà, mwâka gw’igana na makumi anni na munâni, omu nsiku ikumi n’irhanu za Dioskore (mwêzi gwa kabirhi)*11, 38 Omwêzi gwa «Dioskore» omu cilatini guli mwêzi gwa «Santike» omu cigereki (11, 33)..»