1 Omu mwâka gwa igana na makumi anni na mwenda, Abayahudi banacimanya omwanzi oku Antiyokusi Epatori arhabâlîre Obuyahudi n’e­ngabo nyinji, 2 n’oku omulezi wâge Lisiyasi ye anali murhambo wâge, oku bayishire boshi naye ngasi muguma mulibo alongolîne engabo yâge mwandu ya bantu bihumbi igana na ikumi lya basirika bagereki bayisha balambagira n’a­magulu, bihumbi birhanu na magana asharhu ga banyakulwîra oku nfarasi, njavu makumi abirhi n’ibirhi, na ngâlè magana asharhu zoshi zihêkerinye e­byoji. 3 Menelasi naye acîhira kulibo, ci erhi na mwenge, ajaga ashumikashumika Antiyokusi arhali mpu lyo ayôkola ecihugo câge, ci mpu lyo nkaba okwôla kwamushubiza omu cikono câge. 4 Ci kwônene, Mwâmi w’abâmi azûsa obukunizi bwa Antiyokusi kuli eyôla ncuku, n’erhi Lisiyasi amanyîsa mwâmi oku Menelasi ye oli imerero ly’amabî goshi badwîrhe babona omu cihugo, Antiyokusi arhegeka mpu bamuhêke e Bereya banajimuyîrhirayo nk’oku engeso z’eyôla munda zinarhegesire. 5 Eyôla Bereya ebà omutungo gwa makoro makumi arhanu guyunjwîre luvù n’amasini g’okuzunguluka empande, ganakaz’iyôrha gakwêba omuntu omu luvù ngasi lunda. 6 Eyôla munda yo bakazâg’igendiyîrhira omuntu w’obushambo bw’isakrilego, nîsi erhi olya wundi wali mwîsi mukulu. 7 Kwo Menelasi afirage ntyôla, ali muntu arhacîgonzagya okushimba amarhegeko. Ciru arhabisbagwa. 8 Kulya kubà akazâg’ihemukira aluhêrero n’obwôla omuliro gwâlwo n’oluvù lwâko byàli binjà, kwàli kwinjà naye afîre omu luvù.

9 Mwâmi anaciyisha n’enkengêro z’obwîsi emurhima, ali alâlîre okulibuza Abayahudi kurhalusa îshe. 10 Amango Yûda amanyaga okwôla, arhegeka abantu boshi mpu bakashenga Nyakasane budufu na mûshi ashubirhabàla nk’oku anayôrhaga arhabâla 11 lyo balekinyagwa kandi amarhegeko, ecihugo, n’aka-Nyamuzinda, mpu arhazigaga mâshi olubaga lwàli lukola lurhondîre okuhûmûka, mpu lushubikumba omu maboko g’abantu bagalugalu. 12 Erhi boshi babà bamâyûkiriza ery’irhegeko, bamânashenga Nyakasane obwonjo omu kuvugumula emirenge, omu kucîshalisa n’omu kukaz’ifukamiriza nsiku isharhu, Yûda anacibabwîra ebinwa by’okubahà omurhima anabakomêreza mpu babè bacîrheganyize. 13 Erhi abà amâshambâla boshi n’abashamuka, bahiga mpu barhazigaga mwâmi ahika omu cihugo c’e Buyahudi n’engabo yâge, mpu bamanye ankanarhôla Yeruzalemu, ci mpu bakanye balîkûle, babone okubajira n’oburhabâle bwa Nyamuzinda. 14 Okubundi, erhi àbà amâcîhira omu maboko ga Nyamuzinda, anacikomêreza abâbo mpu balwe kuhika bafîre amarhegeko gâbo, aka-Nyamuzinda kâbo n’ecishagala câbo, ecihugo câbo n’engeso zâbo, anacikereka engabo yâge hôfi na Modini. 15 Erhi abà amâhà abâge akanwa balwamwo, mpu: «Okuhima kuli kwa Nyakasane!», anacicîshoga mulibo abâna b’entwâli anacirhabâlira ecihando ca mwâmi budufu. Abayîrhamwo bihumbi bibirhi, abahimira omwôla cihando câbo, ayîrha n’enjavu yakazâgilongolera ezâbo. 16 Ntyo ahira akavango n’ecôba omu cihando bacîgendera erhi bamâhimana n’oburhwâli. 17 Erhi bucânûla erhi mîra bamalaga oku bulanzi bwa Nyamuzinda owarhabâlaga Yûda.

18 Enyuma ly’okwôla, mwâmi arhangigera oburhwâli bw’Abayahudi, agereza okurhôla ebihugo n’obwenge. 19 Arhêra Beti-Shuri bantu bazibuzibu b’Abayahudi, ci bashubimukungusha muli akôla karhumbi, obwa kabirhi ahimwa. 20 Ci mw’agôla mango Yûda akazirhumira abôla bali bazongolosirwe n’ababisha ngasi ebi banali balagîrîrekwo byoshi. 21 Ci kwône Rodokosi, w’omu murhwe gw’Abayahudi abwîra abashombanyi amahwe g’Abayahudi. Obwo Abayahudi bamulongereza balinda bamuhikakwo; bagendimuhira omu mpami­kwa, buzinda bamuyîrha. 22 Obwôla bwa kabirhi, mwâmi asezibwa okuyumvanya n’abôla ali arhabâlîre e Beti-Shuri, abahà okuboko nabo bamuhà okwabo. Acîyêgûla arhêra abalwî ba Yûda, kandi ahimwa. 23 Ci kwônene erhi ayumva oku Filipo wasigalaga ekà oku birugu anagomire aha Antiyokiya, arhemuka ayinjibana Abayahudi n’ebinwa binjà, abalaganya ngasi ebi bali babwîne bi­kwânîne, bayumvanya boshi, abâna enterekêro, akuza aka-Nyamuzinda, akenga ahantu hatagatîfu, nka muntu muhânyi ocîkenzire. 24 Anaciyankirira Makabeyo bwinjà, asiga ayimanzize omurhambo ye Hegemonide, àli wa musirika, arhambula kurhenga e Ptolemayisi kujà emw’Abagereniani. 25 Ci kwônene, erhi mwâmi ajà e Ptolemayisi, olubaga lwamubwîra oku barhacisimiri ebyo bayumvayagyakwo, n’oku mulibyo hali ebi barhacishimba. 26 Lisiasi ajà kagombe, asamba nk’oku anahashire, ayumvîsa olubaga, alurhûliriza anagalicishubirira e Antiyokiya. Kwo mwâmi ayishaga arhabîre ntyôla, kwo anahimirwe ntyo.