1 Erhi kugera myâka isharhu, Yûda boshi n’abâbo banaciyumva oku Demetriyusi mwene Selekusi, erhi abà amâshûbûza engabo, akanya ajicumbika ah’izîko lya Tripoli, alidwîrhe engabo mwandu. 2 Erhi abà amanyaga ecihugo ayîrhamwo omwâmi waco ye Antiyokusi n’omulezi wâge Lisiasi. 3 Muntu muguma ye Alkimi erhi abà amâyûs’iyîmanikwa mudâhwa mukulu, arhondêra okucîhemula n’oluhinzo n’obwo agôla mango Abayahudi barhayêrekeraga emunda abapagani bali mpu ntà bucire kuli bo ciru n’oku batagatîfu. 4 Ayisha ajà emunda mwâmi Demetriyusi ali, mwâli omu mwâka gwa igana na makumi arhanu, anacimurhûla ecimanè c’amasholo n’omushugushugu, ayûshûlakwo n’agandi mashami g’emizêti nk’oku banakomerera okurhûla omu ka-Nyamuzinda; n’olwo lusiku arhacijiraga bindi bilushire ahôla. 5 Ci abêrwa abona agandi mango g’obunguke okw’isirhe lyâge, erhi Demetriyusi amuhamagala omw’ihano, amudôsa kurhi Abayahudi bayôsire na mihigo mici bagwêrhe. Anacimushuza erhi: 6 Abayahudi baderhwa ba Hasidimi, bo balimo Yûda Makabeyo ye murhambo wâbo, abôla badwîrhe balêrha akavango n’obugoma omu bantu; barhaziga obwâmi bwabona omurhûla. 7 Lolà oku banyazire ecikono câni nahabagwa na bashakulûza, nalonza okuderha obudâhwa bukulu bw’obûla nyishire emund’oli. 8 Burhanzi nti nyôrhe mbwîzire mwâmi, bulya ntakaziga ebyâge byasherêra, na kandi nti lyo nkola bwinjà oku bya bene wîrhu bulya obuhalanjisi bw’abôla bantu bwalibuzize bene wîrhu okurhashingânîni. 9 Yâgirwa waliha, hano ôbà wamâmanya nâwe bwinjà ebyôla bintu, alole kurhi wankayôkolamwo eci cihugo cîrhu n’ishanja lîrhu lyamârhindibuka, ojire nk’oku ogûla murhima gurhuma osîmwa n’abantu boshi gunali. 10 Bulya oku Yûda anacibamw’omûka kwo n’ecihugo cirhasâg’ibona murhûla.

11 Erhi abà amâshambâla ntyo, abandi bîra ba mwâmi, balya bakazâg’ibigwabigwa amango bayumvagya baderha oku biyêrekîre Yûda, banarhondêra okushumika mwâmi Demetriyusi. 12 Anacihamagala ho na halya Nikanori wali oshokolîne omulongo gw’enjavu, anacimujira murhambo w’engabo yagend’ilwa e Buyahudi, anacimurhuma mpu agende ho na halya. 13 Anamurhegeka mpu ayîrhe Yûda, mpu n’abâbo abashandabanye, anayîmike Alkimi mudâhwa mukulu w’aka-Nyamuzinda kakulu.

14 Oku bundi, balya barhengaga omu Buyahudi bayisha bayâka Yûda, bulya bàli bapagani boshi bashûbûzanya, murhwe muguma gwajakwo Nikanori, bamanya mpu nkaba bayumgukira oku buhanya n’oku mugereko gwayishira Abayahudi.

15 Erhi Abayahudi banayumva oku Nikanori ayîshire arhabîre boshi n’amashanja, bacîshîga akatulo, banacishenga Olya waderhaga mpu olubaga lwâge luyôrhe lubâho ensiku zoshi, Olya onakaz’ibarhabâla ngasi mango. 16 Oku irhegeko ly’omurhambo wâbo banaciyîmuka ho na halya, lwagendibumbana omu murhundu gwa Desawu. 17 Simoni mulumuna wa Yûda arhangibà ye otula entambala kuli Nikanori, ci erhi afuduka n’obukali bw’abashombanyi, acîtunda ci erhi kurhanali kunene. 18 Nikanori erhi ayumva kurhi oburhwâli bw’abîra ba Yûda buli na kurhi bazigira bwenêne ecihugo câbo, arhînya okubulaga omukò mpu lyo ahima. 19 Anacilika entumwa Posidoniyusi, Teodoti, na Matatiyasi emunda Abayahudi bali, mpu babarhege amaboko nabo babahe okwabo.

20 Erhi abà amarhanya bwinjinjà kuli ebyôla binwa, agend’ibimanyîsa e­ngabo yâge yoshi n’erhi kumanyîkana oku boshi bàdesire kuguma, bayêmêra okunywâna. 21 Batwa olusiku abôla barhambo bashimânana bône na bône; ngasi lunda lwakârhenga engâlè nguma erya enabambirwemwo bwinjà ah’okutamala. 22 Ci kwônene Yûda arhangifulika engabo n’emirasano yâbo omu bantu banakwânîne ebwa kuyôboha obulyâlya bwa abashombanyi. Erhi bayûs’ishambâla banywâna. 23 Nikanori ageza nsiku nsungunu aha Yeruzalemu buzira kujiraho abantu kugalugalu, enyuma ly’aho alîka engabo bali boshi nayo mpu bashubire omu mwababwè. 24 Ngasi mango erhi boshi na Yûda banali, ali amurhonyize. 25 Akomêreza Yûda mpu ajè omu buhya, aburhe n’abâna. Yûda ajà omu buhya alama n’omurhûla, anasîma bwenêne omu kalamo kâge.

26 Alkimi erhi abona kurhi badwîrhe baderha kuguma, ayanka empamîso (lwandiko) ya kulya banywânaga, ayijana emunda Demetriyusi ali, anacimubwîra mpu Nikanori agwêrhe yindiyindi mihigo erhalingânîni n’emihigo ya mwâmi, bulya amanyîsize oku omukûla wâge anali Yûda, omushombanyi wa mwâmi. 27 Mwâmi akunira bwenêne, n’omu kushumikwa n’obunywesi bw’eyôla ndyâlya ayandikira Nikanori oku arhankalembera okwôla kunywâna kwâbo banywânaga n’oku arhegesire barhume Yûda Makabeyo e Antiyokiya anali mushwêke.

28 Nikanori erhi abona olwo lwandikwo, azânwa bwenêne, ayumva oku kuli kuzibu okuzâza eco cihango banywânaga, n’obwo Yûda ntà kantu kabî ajizire. 29 Ci kwônene bulya kurhankacihashikîne okurhaluka akanwa ka mwâmi, akâlonza amango minjà g’okugwârha Yûda n’obwenge. 30 Makabeyo naye olwâge lunda akâbona oku Nikanori akola ajà abà muzibuzibu emunda ali, n’oku bakazâg’ishambâla naye bwinjà lêro kukola kuzibu, ayumva oku obwôla buzibu burhaciri bwa buholo, ashûbûza bantu basungunu omu bantu bâge ayongoloka Nikanori. 31 Erhi abona oku ehilume hyamusingîre obwenge, akanya, ajà aha luhêrero lutagatîfu n’abadâhwa bali barherekîre enterekêro y’obwôrhere, anacibarhegeka mpu bamuhè olya muntu. 32 Erhi bacîgasha mpu barhamanyiri olunda ali, 33 Nikanori alambûlira okuboko emunda aka-Nyamuzinda kali, alahira aderha erhi: «Akabà murhandwîrhîri Makabeyo muyishe mumushwêsire, nnashandâze akala ka-Nyamuzinda kagishe okw’idaho, nnampôngole olûla luhêrero, nyûbakeho enyumpa nyinjinjà ya Dionisiusi.» 34 Oku anayûs’iderha ahuluka ho n’aho. Oku bundi abadâhwa bayînamulira amaboko enyanya barhondêra okushenga Olya onayôrha abalwîra, mpu: 35 «Yâgirwa Nyamuzinda, W’oyu orhalagîrîri kuli kantu kaci, wasîmire erhi akala ka-Nyamuzinda obamwo kayûbakwa ekarhî kîrhu. 36 “Bunôla Yâgirwa, rhukusengîre we Mwimâna w’obwimâna bwoshi, olangage wênene aka ka-Nyamuzinda kalek’ihemulwa, eyi nyumpa yâwe erhacijira nsiku nyinganaci ecêsîbwe”».

37 Oku bundi muntu muguma ye Razisi, muguma omu bashamuka ba Yeruzalemu, agend’ishobekwa emunda Nikanori ali, abâga muntu wasîmaga bwenênè bene wâbo, anali muntu wa lukengwa, ciru bakazâg’imuderha mpu ye îshe w’Abayahudi erhi minjà gâge garhuma. 38 Ebwa kubà omu mango ga mîra, galya mango okuyêgera abapagani gwàli muziro, bàli bamutwîrîre okufà erhi kubà mushibirizi w’obuyahudi bwâge kurhuma. Ciru omu kubulanga arhababaliraga oli omubiri gwâge, oli n’obuzîne bwâge. 39 Omu kulonza okuyêrekana enshombo yâge emw’Abayahudi, Nikanori arhuma basirika magana arhanu mpu bagendimugwârha. 40 Ali alangâlîre mpu omu kumugwârha ababazamwo Abayahudi. 41 Eyôla ngabo yali ekola eri hôfi h’okugwârha eyôla nyumpa n’okubêra omu muhango munene, bâli bamâhâna irhegeko mpu bayôce enyumvi. Ci erhi Razisi akola ali hôfi agwârhwe hyaciri hisanzi hitya hyône, arhôla engôrho acîfundayo. 42 Asîma okufà nka muluzi ahâli h’okukumba omu maboko g’ababisha n’okujâcira okurhakwânîni obuluzi bwâge. 43 Ci ebwa kubà omu kucîfunda engôrho dubaduba arhamanyagikoza ahankayîrha duba, erhi abona erya ngabo yoshi ecirhunika oku mihango, alibirha n’oburhwâli bwoshi oku nyanya ly’e côgo, acîguga akirumè oku bantu. 44 Boshi bamuhà orwegu, ahirima halya bayâkaga. 45 Oku aciri ahûmagira ashubiyimanga n’obu­rhwàli, anayisha ajababa miko, anayunjwîre ecihulu c’okuyôbohya, anacihulukâna omu lubaga bulibirha, okubundi agend’iyîmanga okw’ibuye lyàli oku ntuli. 46 Oku omukò gwamuhwamo, akâcîbulula amalà n’amaboko gâge gombi, agafumbarha agabanda olubaga, erhi anadwîrhe ashenga Lulema ye Nn’obuzîne mpu amugalulire byoshi lusiku luguma*14, 46 Okusengerera abafîre kuyêrekîne oku Abayahudi bâli bayêmîre ak’irhù oku amasâla ganarhabâle abafîre. Kandi okwo kuyêrekîne oku omu buyêmêre bwâbo, abafîre banarhabâle abacizîne, Lolà 2 Mak 15, 12. Ko afîre ntyôla.