1 Nikanori anaciyumva oku Abayahudi babà omu Samâriya, anacihiga okugend’ibalwîsa omu kahwenyenye, amango g’olwa Sabato. 2 Abayahudi bâli boshi naye banacimubwîra mpu: omanye orhabajiraga okubî kwa bene okwo n’okuli nka kwa nsimba n’obuhalanjisi, ci okuze olusiku Olya Obo­na-byoshi akuzagya n’obutagatîfu bwâge. 3 Oku bundi olya kahenya anacidôsa mpu k’emalunga oku nkuba kubà omukulu warhegekaga olwa Sabato. 4 Banacimushuza mpu: «Ye Nyakasane Nyamubâho orhegeka empingu, ye wanarhegekaga mpu bakazilanga olwa kali nda.» 5 Olya kaheza anaciderha erhi: «Nâni ndi mukulu hanôla igulu ntegesire, bayanke emirasano, banacijira oku mwâmi arhegesire». Ci kwônene arhahashaga okuyûkiriza ogwôla muhigo gwâge mubî.

6 Agôla mango, Nikanori akazâgihiga muli obwôla bucîbone bwâge okuyêreka Abayahudi boshi oku anababimire, 7 Yûda yêhe arhahusagya okucîkubagira n’obulangâlire bunene, oku abona oburhabâle emwa Nyakasane. 8 Akaz’ikomêreza abâge mpu barhakazâg’iyôboha okurhêrwa n’amashanja g’abapagani ci mpu bakazicîkubagira, banakakengêra amarhabâle Ow’enyanya akazâg’ibarhuma omu nsiku zageraga, balangâlire bunôla oburhwâli bwarhenga e­ mw’Ogala-byoshi. 9 Abahà omurhima omu kubabwîra binwa biguma biguma by’Akanwa ka Nnâmahanga n’abalêbi. Ashub’inabakengêza entambala bamâlwa n’omu kuzishambâla ashubizinunîsa kundi kundi. 10 Erhi abà amâbahà omurhima, abarhegeka mpu bamanye obulyâlya bw’amashanja g’abapagani n’okuvuna endahiro zâbo.

11 Erhi abà amâhà ngasi muguma emirasano, arhali ebwa kubahà empenzi n’amatumu, ci kwône omu kubahà ebyôla binwa binjà, anacibaganîrira kandi ecilôrho ciri nka kuyagânwa anabonaga, cabasîmisa boshi. 12 Alaga ebi abwîne: Omudâhwa mukulu Oniyasi, muntu mwimâna na mwîkubagirwa, ci bwenêne mutûdu, muntu mwîrhonzi omu binwa byâge, muntu wakâgijira aminjà kurhenga eburhò bwâge, anakola acîbêra nyakwîgendera, anamubwîne alambwîre amaboko anadwîrhe asengerera olubaga lwoshi lwa Abayahudi. 13 Kuguma n’okwo ashubibonekerwa n’owundi muntu mukengwa erhi emviri zâge nyêru zirhuma n’irenge lyâge, muntu wali ogwêrhe naye obuhashe bunene na bwa kusômeza. 14 Ene Oniyasi arhôla akanwa, ambwîra erhi: «Oyûla ali mwîra wa bene wâbo bene Israheli, oyôrha obasengerera bwenêne olubaga n’olugo lutagatîfu, ye Yeremiya mulêbi wa Nnâmahanga». 15 Oku bundi ene Yeremiya alambûla okuboko anacihêreza Yûda engôrho y’amasholo, n’ene akola amuhâyo, anacimubwîra, erhi: 16 «Rhôla eyi ngôrho ngishe, nshôkano ya Nyamuzinda eyôla, yo wamaliramwo abashombanyi bâwe eyôla.»

17 Erhi ebyo binwa binjà bya Yûda bibà byamâbanywengerera byamânabà­rhwalihya n’okuzûsa emirhima y’abâna b’emibagabaga, boshi bahiga mpu barhacicîgonye omu cihando ci mpu bacîrhunika oku bashombanyi, n’omu kulwa bahiramwo oburhwâli bwâbo bwoshi, ntyôla bayûsamw’entambala, bulya olu­ go, ahantu hatagatîfu, n’aka-Nyamuzinda biri omu mbaka. 18 Bali bayôbohîre kunyi oku bâna bâbo, oku bakazi bâbo, kuli bene wâbo, oku balungu bâbo, ci bwenêne kulusha bâli bayôbohîre aka-Nyamuzinda kagishe. 19 Obwôba bw’a­bâli basigîre omu lugo burhali bunyi, omu kurhanya kuli okwôla kurhêrwa kw’abantu bayisha bahungumula engabo. 20 Amango bakazâg’ilinga emigâbo yabayishira, abashombanyi bôhe erhi mîra bashubûzanyagya, banatwa ecigamba n’enjavu zâbo erhi zikeresire ahantu hanakwânîne, na banyakulwîra oku nfarasi erhi bakola bali oku rhufendefende. 21 Makabeyo anacibona ogwôla mwandu gw’abashombanyi kurhi emirasano yâbo yayisha yalaza, obukali bw’ensimba zâbo, Anaciyinamulira amaboko enyanya, ashenga Nyakasane ye ojira ebirhangâzo, bulya ali amanyire oku arhali omu bunji bw’emirasano, ci oku omu muhigo gwâge mwo murhenga obuhimanyi kuli balya banakukwânîne. 22 Alaga kurhi isâla lyâge lyàli: «Yâgirwa Nyakasane, warhumire Malahika wâwe omu mango ga Hezekiyahu, mwâmi w’e Buyahudi, anacimalîra basirika bihumbi igana na makumi gali munâni, b’engabo ya Senakeribu, 23 na bunôla Yâgirwa Nyakasane w’empingu; orhurhumire malahika mwinjà arhushokolere, ahire ecôbà n’entemu embere zîrhu. 24 Oku buhashe bw’okuboko kwâwe, baherêrekere abâla bayishire n’ebinwa by’obulenzi omu kanwa kâbo, oku lubaga lwâwe lutagatîfu!» Kwo afundisire ebinwa ntyo.

25 Okubundi, engabo ya Nikanori yanaciyisha yàhinda n’emishekera yabûhwa kuguma n’enyimbo z’okulwa. 26 Ci bene Yûda bôhe bayisha bashenga banasâlira. 27 Agôla mango oku balwa n’amaboko, basâlira n’omurhima. Balambika okw’idaho bantu bihumbi makumi asharhu na birhanu na kulusha; boshi bashagaluka bwenêne, kuli okwôla Nyamuzinda anababwîraga n’obwâlagale. 28 Erhi okulwa kubà kwamahwa, bakolaga bashubira emwâbo, tundu kuli Nikanori, yêshi acîlunda okw’idaho n’ebihagarhizi byâge.

29 Oku bundi banacibanda orhuhababo, boshi bashagaluka, banacikuza Nyamuzinda omu lulimi lw’emwâbo. 30 N’olya warhambulaga alanga okukunda obûko bwâge, ngasi muntu kurheng’eburhò bwâge, yerigi Yûda, anacirhegeka mpu batwe irhwe lya Nikanori, mpu bamurhoze okuboko kwoshi banabihêke e Yeruzalemu. 31 Anaciyisha yêne ashûbûza bene wâbo, n’abadâhwa, n’erhi abà amâyimanga embere z’oluhêrero; anacihûna mpu abantu b’omu lugo babone, 32 anacibalangûla irhwe ly’olya mubisha Nikanori, na kulya kuboko oyôla nyakubura alà­mbuliraga ebwa ka-Nyamuzinda k’Ogala-byoshi. 33 N’erhi abà amâtwa olulimi lw’oyôla kahenya Nikanori, arhegeka mpu balutwe bihimbi bihimbi, banakwêbwe ebinyunyi, mpu bamanike embere z’aka-Nyamuzinda, oluhembo lw’ceryo isirhe. 34 Boshi banacisôkeza emunda Nyamuzinda w’irenge ali ebinwa by’okumuvuga omunkwa bakaderha mpu: «Aganze owalangaga ahantu hâge harhag’ihemuka».

35 Yûda anacimanika elyôla irhwe lya Nikanori lyatubagwa omu lugo, nka cêrekane c’okunali c’oburhabâle bwa Nnâmahanga, kuli boshi. 36 Banacitwa olushika oku bumvanye bwa boshi mpu irhondo olwo lusiku lurhageraga lurhanakengîrwi. Ci mpu bakazilukuza omu nsiku ikumi n’isharhu z’omwêzi gwa kali ikumi na kabirhi guderhwa Adari omu cisiriyaki, oku malâliro g’olusiku luderhwa lukulu lwa Mardokeyo.

37 Olwa Nikanori lwanacihekera aho ebwa kubà kurhenga olwo lusiku ecihugo cabêra omu maboko g’Abayahudi. Nkolaga nayukiza ecitabu câni ahâla. 38 Akabà okûla biyandisirwe kukwânîne kwanagendekîre bwinjà, kwo nâni nanalonzagya ntyôla, akabà kuli kurhashinganini kunali kwa busha, kwo nanahashire okujira okwôla… 39 Bulya, nka kula kurhabà kwinjà okunywa idivayi ly’enshongôlè lyonene, na buzinda okunywa amîshi nago gônene, ci idivayi ligushe n’amîshi co cinyôbwa cinjà cilêrha obushagaluke, ntyo buli bulenga okurhondekanya emyanzi yasîmîsa amarhwîri ga kulya yayandikagwa. Ho nyûkîze ahôla.