3
1 Yâgirwa Nyakasane Ogala-byoshi, Yâgirwa Nyamuzinda w’Israheli, murhima gugogomîrwe, murhima gurhadêkerîri byo bidwîrhe byakubirikira. 2 Oyumvîrhize Nyakasane, onababalire, bulya rhwajizire ebyâha embere zâwe, 3 wêhe oyôrha obâho ensiku zoshi, ci rhwêhe rhwaherêrekîre lwoshi! 4 Yâgirwa, Nyakasane Ogala-byoshi, Nyamuzinda w’Israheli, oyumvîrhize, Waliha, omusengero gw’eyi mifù y’Israheli, bo bâna ba balya bantu bàkubîhiraga: barhàyumvagya izù lya Nyakasane Nyamuzinda wâbo, lêro amahanya garhunanîragekwo. 5 Orhacikengêraga ebyâha bya balarha, ci mwo kano kasanzi, okengêre okuboko kwâwe n’Izîno lyâwe*3, 5 Eyi milongo: 3, 5—4, 1, eyêrekîre Obukuze bw’obushinganyanya. Rhulole muli Mig 8; Burh 24; Ayu 28., 6 bulya we Nyakasane Nyamuzinda wîrhu, nîrhu rhukâkukuza Nyakasane. 7 Bulya wahizire ecâbà câwe omu mirhima yîrhu, mpu lyo rhukaz’ishenga Izîno lyâwe. Rhulonzize rhukaz’ikukuza mw’obu bukagwa bwîrhu, bulya rhwarhenzize obubî bwa balarha omu mirhima yîrhu, bo bàkujiriraga ebyâha. 8 Ololage oku ene rhuli mw’obu bukagwa wa rhushandabanyizemwo mpu rhubè banyamakobwa, bahehêrere, erhi mabî ga balarha garhuma bo bacinanûlaga kuli Nyakasane Nyamuzinda wîrhu.
II. Oburhimanya: kashambala Israheli arhashangîra na ndi
9 Wâni Israheli, yumvîrhiza amarhegeko g’obuzîne, orhege okurhwiri kwâwe, okengukwe, orhacibè idâga.
10 Kurhi oku, wâni Israheli, ci oli omu cihugo c’abashombanyi bâwe? Carhumire washosihalira ihanga lya bene?
11 Wàhemukîre omu karhî k’abapagani, bali nka mifù, waganjirwa muli banyakwîgenderà bâjà ekuzimu.
12 Kali bulya walesire Enshôko y’Obushinganyanya.
13 Ocishimbaga enjira ya Nyamuzinda, wankabwîne omurhûla ensiku n’amango.
14 Manyîrira ngahi obumanye buli, n’emisî, n’obukengêre: lyo omanya ngahi obunji bw’ensiku buli, omanye n’aha obulangashane bw’amasù buli n’omurhûla.
Ntâye wankahash’ifulûla obushinganyanya
15 Ndi wafulwîre aha obushinganyanya buhanda n’omu Obushinganyanya bubîkirwa?
16 Ngahi baligi balya barhegesi b’amashanja na balya bàkâg’ishwêka ensimba z’erubala,
17 balya bakâg’irhegeka ebinyunyi by’emalunga, balunda ensaranga n’amasholo, byo abantu bacîkubagira, balya bantu obugale bwâbo burhàgwêrhe lugero?
18 Erhi balya bakâg’itula amarhale n’obushiru bunene kuhika emikolo yâbo yarhaluka obukengêre?
19 Boshi bahirigisire, bakaz’iyandagalira ekuzimu! N’abandi bayisha enyuma zâbo.
20 Abarho kulusha babalimwo, babwîne obumoleke banabêra hano igulu, ci kwône barhamanyaga enjira y’obushinganyanya,
21 barhashîbiriraga okumanya emikâba yabwo, nabo abâna bacîyegûla n’enjira ya bîshe.
22 Ntâye wayumvîrhe Obushinganyanya bwaderhwa e Kanâni, nîsi erhi bwâbà nwa e Temani,
23 ciru bene Hagari balongereza amalenga ga hano igulu abarhunzi b’e Merani n’ab’e Temani, abahugûla emigani n’abalongereza amalenga, barhamanyaga enjira y’Obushinganyanya barhanashîbiriraga okumanya emikâba yabwo.
24 Mâshi Israheli, alà oku enyumpa ya Nyamuzinda†3, 24 Enyumpa ya Nyamuzinda, kwo kuderha igulu. yaluga wâni, alà oku ecihugo c’omwîmo gwâge cagaliha wâni!
25 Cibà cinene cirhajira lubibi, cibà cirîrî kurhalusa olugero!
26 Yo baburhagwa balya bantu banênênè ba mîra, balya bâli balîrî bwenêne na ntwâli omu bîrha.
27 Arhali bo Nyamuzinda àcîshozire, arhanali bo àyêresire enjira y’Obushinganyanya;
28 boshi baherêrekera, bulya barhagwêrhe bumanye, baherêrekera erhi buhwinja bwâbo burhuma.
29 Ndi wasôkîre emalunga agend’iburhôla anabuyandagaza kurhenga omu bitù?
30 Ndi wayikîre enyanja aj’ibulonza abulêrha oku citwîro ciri nk’ec’amasholo gacîre bwenêne?
31 Ntâye ciru n’omuguma oyishi enjira y’Obushinganyanya, ntâye wankamanya aha bugera.
Nyamuzinda yêne ye hà Israheli obushinganyanya
32 Ci kwône, Olya oyishi byoshi, yeki oyishi enjira yabwo, àyifulûlaga n’obukengêre bwâge: Yêne wayimanzagya igulu burhadundagana, analiyunjuza nsimba za magulu anni.
33 Anarhume obulangashane mpu bugende; anashub’ibuhamagala buyishe bwajuguma.
34 Enyenyêzi kulangashana zilangashana, ziyîze n’omwîshingo.
35 Anazihamagale, nazo ziyakûze, mpu: «Ho rhuli hano!» Obwo zilangashane n’omwîshingo, Mulemi wazo orhumire.
36 Oyo ye Nyamuzinda wîrhu, ciru ntà wundi omushusha.
37 Afulwîre enjira z’Obushinganyanya zoshi, azifumbika Yakôbo, mwambali wâge, na Israheli, murhonyi wâge.
38 Obushinganyanya nabwo bwapamuka omu igulu, bwajiyûbaka haguma n’abantu.