4
1 Obushinganyanya, co citabu c’Amarhegeko ga Nyamuzinda, na mahano ga kulama ensiku n’amango. Ngasi boshi bagashimba, bashobôla akalamo, ci abagaleka, kufà banafà. Kukwânîne okubà n’obushinganyanya
2 Galuka, mâshi Yakôbo, ogashimbe, shubira emunda omulengêzi guli obu wacibona.
3 Irenge lyâwe orhalihè wundi, nîsi erhi okuhà ishanja ly’ebigolo obunguke bwâwe.
4 Rhuli bany’iragi, mâshi Israheli: bulya ebisîmîsa Nyamuzinda rhwe byàfululîrwe.
III. Emirenge n’omulangâliro gwa Yeruzalemu
5 Ozibuhe, lubaga lwâni, we kashambala k’Israheli!
6 Bàmmuguzize emw’amashanja, ci kwône murhâhere. Mwabîhîre Nyamuzinda co carhumire muhânwa omu maboko g’abashombanyi.
7 Bulya mwagayîsize Lulema, mwarherekêra abazimu, mwaleka Nyamuzinda.
8 Mwaliyibagire ommuhà eci mwalya, Nyamuzinda w’ensiku n’amango, mwagayîsa na Yeruzalemu, nyoko.
9 Bulya erhi abona oburhè bwa Nyamuzinda bumujakwo, aderha, erhi:
Yeruzalemu ârhûliriza abâna bâge balulize
Muyumve, mwe balungu ba Siyoni; Nyamuzinda antumire ibala likulu.
10 Nabwîne oku bagala bâni na bâli bâni bahêkwa bujà, n’okwo kwârhenga emwa Nyamuzinda.
11 Nakâg’ibalera erhi nambasîmire, erhi bàhêkwa bujà, nalaka nalakûla.
12 Mumanyâge ntâye ocîshingirage oku ndi: nie nyamugosha na namunyagwa. Niono nkola kahumba erhi byâha by’abâna bâni birhuma, bulya bàvunyire Amarhegeko ga Nyamuzinda,
13 barhamanyaga amahano gâge, barhageraga omu njira z’amarhegeko ga Nyamuzinda, barhanashimbaga enjira y’okubalera omu bushinganyanya bwâge.
14 Balya balungu ba Siyoni bayishage! Mukengêre obujà Nyamubâho ahizire mwo bagala bâni na bâli bâni.
15 Bulya àbanisirekwo ishanja lyarhenga ihanga, ishanja lirhafa nshonyi, lya lulimi lurhumvûbwa, lirhakenga mushosi, lirhafa mwâna na cirhabà bwonjo;
16 lyo lyàhesire abâna bazigirwa b’omukana, lyàmusiga buhumba amâfîrwa na bâli bâge,
17 Niono, kurhi nâmmurhabâlaga,
18 Olya wammurhuliragakwo ago mahanya, ye wânammukûla omu nfune z’abashombanyi binyu,
19 Kanyi, bâna bâni, mucîgendere, niehe nie oyu namâlekwa mpugalîre, omu buhumba;
20 nahogwîre ecishûli c’omurhûla nayambala sunzu w’emishîbo; nâkaz’ilakira Ow’Enyanya ensiku z’akalamo kâni zoshi,
21 Muzibuhe, bâna bâni! Mulakire emunda Nyamuzinda ali, âmmurhenza mw’obwo burhegesi bubî, âmmukûla omu maboko g’abashombanyi binyu;
22 bulya niehe Nyamubâho ye mpiziremwo obulangâlire bw’okucira kwinyu, nyunjwîre mwîshingo gwarhenga emw’Omwîmâna: obwonjo bwâmmuyîshira kurhenga emw’Omwîmâna Mucunguzi winyu,
23 Bulya nammulekaga mwagenda omu malumwa n’amalibuko, ci kwône Nyamuzinda âshub’immugalula emunda ndi omu masîma n’omwîshingo gw’ensiku zoshi,
24 Nk’okûla abalungu ba Siyoni badwîrhe babona obujà mulimwo buno, ntyo kwo bânabona obucire bwinyu bwa muli Nyamuzinda, bwâmmuyishira omu bushagaluke bunene, oku irenge lya Nyamubâho,
25 Bâna bâni, mulembere obukunizi bwammurhengeraga emwa Nyamuzinda, Omushombanyi wâwe akulibuzize, ci kwône orhâyimang’ibone oku âherêrekera onamulabarhe igosi,
26 Abâna bâni bazigirwa bàgezire omu njira z’olukalabuye, abashombanyi bàbaheka n’emisî ak’ezajibâgwa.
27 Mucîsêze, bâna bâni, muyakûze Nyamuzinda. Ye wâmmushûrhaga, Ye wânammulembûla.
28 Nk’oku mwagwêrhe omuhigo gw’okuhabukira kulî na Nyamuzinda, ntyo kwo mugalukage, mulongereze Nyamuzinda kal’ikumi kulusha burhanzi.
29 Bulya Ye wammuhiragakwo obu buhanya, Ye wânashub’immuhà obusîme bw’ensiku n’amango, âmmucize.
Omulangâliro gwa Yeruzalemu
30 Zibuha, Yeruzalemu. Olya wakuhaga izîno lyâwe, âkurhûliriza*4, 30 Omwandisi amârhûliriza ecihugo ca Yeruzalemu omu kucilaganya Omucunguzi wayish’iciyûbaka buhyâhya. Omulêbi ali adesa Yeruzalemu omu nderho ziri zayîbusa Iz 40—55; Yer 31—33..
31 Buhanya bwâbo balya bàkukoleraga amaligo banacishingira okuhanyagala kwâwe!
32 Biri bihanya birya bishagala abâna bâwe balimwo bujà! Ciri cihanya ecishagala cayankiriraga abâna bâwe.
33 Bulya, nka kulya cakushekeraga erhi ohirima, canacishingira okushâbûka kwâwe, ntyo kwo naco câlumwa n’okuhongoka kwâco conene;
34 nâcinyaga omwîshingo gw’okubona cibâmwo bantu banji, n’omuhimbo gwâco gwahinduka malibuko;
35 bulya Nyamubâho w’ensiku n’amango acîrhulirakwo omuliro gw’ensiku nyinji cibè icumbi lya bashetani nsiku nyinji bwenêne.
36 Yeruzalemu, lolà Ebushoshôkero bw’izûba, obone obusîme bukuyîshîre kurhenga emwa Nyamuzinda.
37 Alaga, bayishire abâna wabonaga bagenda, bayishire, bashûbûzinye kurhenga ebushoshôkero kuhika ebuzikiro oku kanwa k’Omwîmâna, bâyisha bacîshingira irenge lya Nyamuzinda.
*4:30 4, 30 Omwandisi amârhûliriza ecihugo ca Yeruzalemu omu kucilaganya Omucunguzi wayish’iciyûbaka buhyâhya. Omulêbi ali adesa Yeruzalemu omu nderho ziri zayîbusa Iz 40—55; Yer 31—33.