1 Mwâmi Baltazari anacilonza okujirira abakulu b’omu cihugo câge olusiku lukulu, byàli bihumbi by’abarhambo abanywesa idivayi, naye yêne alinywa bwinjinjà embere z’ebyôla bihumbi by’abantu, 2 Agôla mango bakazagidorhola oku idivayi, Baltazari arhegeka mpu bamulerhere rhulyâla rhubehe rhw’amasholo n’orhw’amarhale orhu îshe Nabukondonozori akulaga omu ka-Nyamuzinda k’e Yeruzalemu, mpu lyo naye anywêra muli rho boshi n’abarhambo bâge, na bakâge n’ebiherula byâge, 3 Banaciyisha badwîrhe orhôla rhubehe rhw’amasholo n’orhw’amarhale rhwarhengaga omu ka-Nyamuzinda k’e Yeruzalemu, banacirhangira okunywêra muli rhwo, Aligi mwâmi, abarhambo bâge, bakâge n’ebiherula byâge, 4 Banywa idivayi là, barhangira okukazi­kuza banyamuzinda b’amasholo, ab’amarhale, ab’omulinga n’ab’ecûma n’ab’emirhi n’amabuye,

5 Muli agôla mango hanacibonekana eminwe y’omuntu, eyajaga yayandika embere z’itara linene oku lukûta lwêru lw’omwôla bwâmi; Mwâmi anacibona okwôla kuboko kwakagiyandika, 6 Ahôla mwâmi arhemuka, enkengêro zâge zàgeramwo omusisi, yêshi àrhà ebirumbu n’amadwî gâge gakomanya, 7 Mwâmi anacihamagaza n’izù linene mpu bamulêrhere abalaguzi b’e Kaldeya n’abashonga bâyo; mwâmi abwîra abagula b’e Babiloni, erhi: Ngasi yêshi wakahashinsomera agâla mandiko akanampugûlira oku gadesire, namuyambisa ecishûli c’akaduku, mmuhîre olunigi lw’amasholo omu igosi, nnamujire abè ye wa kasharhu omu bwâmi bwâni. 8 Abagula boshi banacijà omu nyumpa, ci barhahashaga okusoma ebyali biyandisirwe n’okubihugûlira mwâmi, 9 Oku bundi mwâmi Baltazari anacirhemuka bwenêne, akazigeramwo omusisi, n’abarhambo bâge boshi bakazikomakomya. 10 Omwâmikazi anaciyumva okola mwâmi anaderhaga n’abarhambo bâge, anacijà mulya nyumpa bakazagilira olusiku lukulu, omwâmikazi aderha, erhi: Yâgirwa, mwâmi, olame ensiku zoshi. Enkengêro zâwe zirharhemukaga orhanayôbohaga! 11 Habà muntu muguma wa munôla bwâmi bwâwe, ajira obukengêre bwa banyamuzinda batagatîfu, amango sho acihali, babona muli oyôla muntu obukengêre, obumoleke n’oburhimanya buli nka oburhimanya bwa banyamuzinda. Oku bundi, mwâmi Nabukondonozori, yerigi sho, amujira murhambo w’abagula, abashonga b’e Kaldeya kuguma n’owa abalaguzi, 12 ebwa kubà oburhimanya bunene bwenêne, obumanye n’obukengêre bunji bwàli muli ye, ahasha okuhugûla ebilôrho, okubwiriza abantu oku birhankayumvikana n’okubwîra abantu kurhi bajira oku mazibu goshi; ebyôla byàbonekana muli oyôla muntu, ye Daniyeli, na mwâmi amuyîrika izîno lya Baltazari. Kuziga bahamagalage oyôla Daniyeli, âhugûlira mwâmi ecôla cilòôrho!

13 Aho banahêka Daniyeli embere za mwâmi, Mwâmi abwîra Daniyeli erhi: «Ka we Daniyeli, wa muli balya bagwârhagwa mpira e Yûda, balya larha wali mwâmi arhenzagya mpira e Yûda?» 14 Nayumvîrhe baderha kuli we oku obukengêre bwa banyamuzinda bukubâmwo, n’oku obumoleke; obukengêre n’oburhimanya bunene bwenêne bukubâmwo. 15 Bamâyisha badwîrhe embere zâni abagula n’abalaguzi nti bayishinsomera agâla mandiko banagampugûlire, ciru barhâhashire okumpugûlira akantu. 16 Na niono nayumvîrhe baderha oku wanahasha okuhugûla ebirhumvikini n’okumanyîsa ebizibuhire. Akabà wankahashisoma ebîra biyandisirwe n’okumpugûlira kwo kuderha kuci, nânakuyambisa ecishûli c’akaduku, nnankuhire olunigi lw’amasholo omu igosi, kandi wanabà we wakasharhu oku bukulu omu bwâmi bwâni.

17 Okubundi Daniyeli abwîra mwâmi erhi: Oyorhane ezôla ngalo zâwe, ohè n’owundi ebyôla by’oluhembo lwâwe! Ci kwônene nasomera mwâmi agôla mandiko nankuhugulire gwo. 18 Yâgirwa, mwâmi, Nyamuzinda Ow’Enyanya bwenêne alihîre sho Nabukondonozori obwâmi, obukulu, irenge n’obuhashe. 19 N’obwôla bukulu amuhâga bwarhuma embaga, amashanja, n’abà ngasi ndi­mi bàkazigeramwo omusisi embere zâge; akazâgiyîrha oyu analonzize, analamye oyu analonzize; akazâgikuza oyu alonzize ananyage oyu analonzize. 20 Ci erhi omurhima gwâge gucicîkangalaza, gucîhêka enyanya n’erhi acidârhabala kuhika omu kucîbona, banacimurhenza kuli erya ntebe y’obwâmi, ananyagwa n’irenge. 21 Banacimurhenza omu karhî k’abantu, omurhima gwâge gwabà nka gwa nsimba, anagendicumbika ekarhî k’ensimba z’endogomi z’erubala, bakazimulîsa n’ebyâsi nka nkâfu, n’omubiri gwâge gwakazilobera embuga n’olumè lw’oku nkuba, kuhika alinda amanya oku Nyamuzinda Ow’Enyanya bwenêne agwêrhe obuhashe oku bwâmi bw’abantu, n’oku ye oyîmika oyu analonzize. 22 Nâwe, we mugala wâge, wâni Baltazari orharhôhizi omurhima gwâwe n’o­bwôla omanyire okwôla kwoshi. 23 Ci kwônene walonzize okucîjira mukulu kulusha Nyamuzinda w’empingu, wahûna banakulêrhera orhubêhè rhw’omu ka-Nyamuzinda, nâwe n’abarhambo bâwe na bakâwe, n’ebiherula byâwe mwanyweriremwo idivayi, wanaharâmya banyamuzinda b’amarhale, ab’amasholo, ab’omulinga, ab’ecûma, ab’emirhi n’ab’amabuye, banyamuzinda barhabona, barhanayumva. Na Nyamuzinda ofumbasire omûka gwâwe, okulanga omu majira gâwe goshi orhamukuzagya. 24 Co carhumaga orhumirwa okwôla kubo­ko, kwo kwanarhumaga agwôla mandiko gayandikwa. 25 Alaga ebyàli biya­ndisirwe: Mené, Mené, Tekeli na Paresi. 26 Yumvagya oku okwôla kudesire! Mené, «kuganjwa». Nyamuzinda anaganjire obwâmi bwâwe amânabuyusa. 27 Tekeli «kugerwa» Nyamuzinda anakugerire oku munzâni, abona oku oli ntâye. 28 Paresi «kugabwa» obwâmi bwâwe bwamâgabwa bwanahâbwa Abanya-Mêdi n’Abapersi.

29 Okubundi Baltazari arhegeka mpu bayambise Daniyeli ecishûli c’akaduku, banacimuyambisa olunigi lw’amasholo omu igosi, kandi banaciyâliza omu cihugo oku ye okola oli wa kasharhu omu bwâmi. 30 Muli obwôla budufu mwônêne Baltazari, mwâmi w’abanya-Kaldeya anni­gwa.