1 Niono Nabukondonozori, nabîre ntûlwîre omu mwâni erhi nanjagalire obugale omu bwâmi bwâni, 2 ecilôrho c’ecirhangâzo canacinyishira, ca­ nyôbohya, nakazifudukafuduka aha ncingo n’ebyôla byanyishiraga omu irhwe byangezamwo omusisi, 3 Nanaciyâliza irhegeko ly’okuhamagala abarhimanya boshi b’omu Babiloni nti bayishe bampugulire ecôla cilôrho. 4 Oku bundi, banaciyisha bayishire abagula, abashonga n’abalaguzi bâge kuguma n’abandi banya-Kaldeya n’abalaguza; nanacibabwîriza ecilôrho câni ci kwônene barhahashaga okucimpugûlira. 5 Cabuzinda Daniyeli anaciyisha emwâni, ye onadesiragwe Baltazari, oku izîno lya Nyamuzinda wâni ye naligimwo abandi bazimu boshi, nanacimubwîra ecôla cilôrho. 6 Nanacimubwîra nti wâni Baltazari, we mukulu omu bashonga, nnamanyire oku omûka gwa Nyamuzinda Mutagatîfu gukulimwo, na ntà ihwe lya­ nkakuyabira, derhaga ebirhangâzo nabwîne omu kulôrha, onabihugûle. 7 Alaga ebi nakazâgibona omu irhwe erhi nnangwishîre: alà oku nanacibona omurhi mulîmulî omu kâgarhî k’igulu. 8 Ogwôla murhi gwanacilihûka, gwanazibuha, gwanahikira omu nkuba karhî, gwanakazibonekana omu mpande zoshi z’igulu. 9 Gwàli gugwêrhe ebyâsi binjinjà, n’amalehe gâgo gàli manji bwenêne, gwakazilisa abantu boshi, ensimba z’erubala zakayishibêra omu cihôho câgo, ebinyunyi by’e malunga byakarhêra omu mashami gâgo, ntà ka­ntu kazîne karhayishigikazigulyakwo. 10 Ebyôla bilôrho byakazingera omu irhwe amango nali ngwîshîre oku ncingo na kandi Omulanzi Mutagatîfu amanuka emalunga. 11 Anaciyâkûza n’izù linene aderha erhi: Mukube ogwôla murhi munatwe amashami gâgwo murhenzekwo ebyâsi byoshi, munakwêbe kuli amalehe gâgo; ensimba ziyâke zirhenge omu cihôho câgo, n’enyunyi zirhenge omu mashami gâgo. 12 Ci kwônene mulekere ekuzimu, ecikundukundu c’emizî yago, ci cibè cishwêke n’ebyûma n’emiringa, omwôla lubala lw’omu mashwa, gukazidomererwa n’olumè lw’emalunga, gunakazilya boshi n’ensimba ebyâsi by’erubala. 13 Omurhima gwago gurhacibaga murhima gwa muntu, guhâbwe omurhima gw’ensimba na byanda nda bigere erhi eyôsire ntyôla. 4, 10: Omulanzi: ye malahika. 2. 13: Byanda nda: kwo kuderha myâka nda. 14 Okwôla kwajirwa n’irhegeko ly’Abalanzi, n’ebyôla byoshi byakolwa n’a­batakatifu, lyo abazîne bamanya oku Ow’Enyanya agwêrhe obuhashe oku bwâmi bw’eno igulu, anabûhe oyu alonzize n’omwîrhohye bwenêne omu bantu anamuyimuse. 15 Co cilôrho nabonaga ecôla niono mwâmi Nabukondonozori; nâwe wâni Baltazari orhuhugulirage co ebwa kubà ntâye w’omu balenga b’omu cihugo câni wankahasha okucimpugûlira; ci kwônene wêhe wanahasha, bulya bukengêre bwa ba Nyamuzinda batagatîfu bukubamwo.

16 Okubundi, Daniyeli ye odesiragwe Baltazari arhangihulika kasanzi, e­nkengêro zamuja kulî. Mwâmi ashubiriza aderha erhi: «Omanye wâni Baltazari, ecôla cilôrho n’okucihugûla kwankanakuheza obukengêre». Baltazari anacishuza erhi: «Yâgirwa Nnâhamwîrhu, eci cilôrho cije oku bashombanyi bâwe, n’okucihugûla kuje oku banzi bâwe. 17 “Ogwôla murhi wabonaga gwakula guna­ba murhi muzibu n’irhwêrhwè lyâgwo lihikira omu nkuba karhî, kandi gwaka­zibonekana omu igulu lyoshi”; 18 “ogwôla murhi gwàli gugwêrhe ebyâsi binjinjà n’amalehe manji, ogwôla murhi gwàli kwo ebiryo by’abantu boshi, n’ogu ensimba zakazâgiyishibêra omu cihôho câgo n’enyunyi z’e malunga zakazibêra omu mashami gâgo”. 19 “Ogwôla murhi ali we, Yâgirwa Mwâmi, wabîre mukulu wanazibuha, wanacikula buzira kuhusa kuhika wahika omu nkuba karhî n’o­bwâmi bwâwe bwahika oku buzindazinda bw’igulu”. 20 “N’oyôla mulanzi, oyôla Mutagatîfu mwâmi anabonaga ayandagala empingu anaderha erhi: mukube omurhi munagushandâze; ci kwônene mulekere ekuzimu ecigundu n’emizî y’ogwôla murhi, munagubohe n’omugozi gw’ecûma n’ogw’omulinga omu lubala lw’omu mashwa; erhi ci kwônene gukaziyôrha gwanywa olumè lw’omu nkuba, gulame haguma n’ensimba z’omu mashwa kuhika amango gàli nda gahike”. 21 “Alaga okuhugûlwa kwâco nako, yâgirwa mwâmi, n’irhegeko ly’Ow’Enyanya lyagwârha Nnawîrhu mwâmi”. 22 “Bakulibirhakwo omu karhî k’abantu ogendilama omu karhî k’ensimba z’erubala, bakazikuha eci walya nka kula banalisa enkafu, wanalobe n’olumè lwarhenga oku nkuba na mango nda gahwa erhi onali ntyôla kuhika olinde omanya oku Ow’Enyanya bwenêne agwêrhe obuhashe oku mâmi g’abantu hanôla igulu n’oku ye ohâna obwâmi emwa ngasi oyu analonzize”. 23 “Nakabà barhegesire okuleka ecigundu c’ogwôla murhi kuli kuderha oku obwâmi bwâwe bwashubizibuha amango wânayêmêre oku empingu yo oburhegesi buhubuka”. 24 “Co cirhumire yâgirwa nnawîrhu mwâmi, nkuhûna ntyâla: ihano lyâni liyumvîkane emunda oli: orhenzagye ebyâha byâwe omu kujira ebishingânîne*4, 24 Ebishingânîne, kuli kujira ebijiro by’obushinganyanya, kwo kuderha burhabâle oku bakenyi. n’amabî gâwe omu kukazibêra abarhindibusire obwonjo, nkaba okwôla kwanarhuma omurhûla gwâwe gushub’ilîha.”»

25 Okwôla kwoshi kwanaciyishira mwâmi Nabukondonozori. 26 Erhi kugera myêzi ikumi n’ibirhi, mpu ajà acîgezageza omu bwâmi bw’e Babiloni, 27 mwâmi aderha, erhi: «K’arhali cihugo ca Babiloni ecîra, Babiloni munene bwenêne oyu niene nayûbakaga nti mwo nadêkereza obwâmi bwâni n’obuhashe bwâni, kandi nti abè irenge ly’obukulu bwâni?»†4, 27 Aga mandiko gayêrekîne gurhi mwâmi agwêrhe obucîbone burhagwêrhi Lugero. Ecihugo ca Babiloni càli cibonekîne nka lwîganyo lukulu lw’igulu. Cikwône càkasherêzîbwe dubaduha. Olwo lwîganyo luli lwakuyêrekana okugayaguzibwa kw’obucîbone bwâge. Obo bucîbone, babuhurhaza. 28 Oku acidwîrhe aderha ntyâla izù lyanacihona empingu lyanaciderha erhi: «Wàbwîzirwe wâni mwâmi Nabukondonozori oku obwâmi bwâwe bwakunyazirwe, 29 wâlibirhwakwo omu karhî k’abantu ogendilama haguma n’ensimba z’eru­bala, bakazikuha ebiryo nka kula banakazilisa enkafu; amango gali nda gâgera kuli we kuhika omanye oku Ow’Enyanya agwêrhe obuhashe oku mâmi g’abantu n’oku oyu alonzize ye anabuhà.» 30 Muli akwôla kasanzi ebyaderhagwa kuli Nabukondonozori byanacibà; anacilibirhwakwo omu karhî k’abantu, anacikazilya olubala nka nkâfu n’omubiri gwâge gwakaziloba n’olumè lw’oku nkuba, emviri zàmuli oku irhwe zashalama nka mashala g’oku byûbi by’enyunda n’enyûnu zâge zalihûka nka za rhunyunyi. 31 Ci erhi ensiku zibà zamagera, niono Nabukondonozori nanaciyinamulira amasù empingu, obukengêre bwâni bwangàlukira. Nanaciharâmya Ow’Enyanya bwenêne, nakuza nanavuga omunkwa emwa olyâla Obâho ensiku zoshi, oyu obuhashe bwâge buli bw’ensiku n’amango n’oyu obwâmi bwâge buli bwa kurhenga oku iburha kujà oku lindi. 32 Kuli ye abantu b’omu igulu lyoshi bali busha embere zâge; anajîre oku anasîmire haguma n’omurhwe gwâge gw’empingu, haguma n’abantu ba hanôla igulu, ntâye wankarhanga okuboko kwâge nîsi okumubwîra, erhi: «Kurhi oku wajira?» 33 Muli akôla kanya kwonêne, obukengêre bwanacingalukira; irenge n’obugale byagalula obukuze bw’obwâmi bwâni; abahanûzi bâni n’abarhambo bâni bashub’iyish’impûna, banacinshubiza omu bwâmi bwâni, n’obuhashe bwâni bwayûshuka bwenêne. 34 Bunôla niono, mwâmi Nabukondonozori, namâharâmya, namâkuza namâvuga n’omunkwa emwa Omwâmi w’empingu, oyu emikolo yâge yoshi eri y’okuli n’enjira zâge zishingânîne, Ye oli n’obuhashe bw’okuhurhaza abagenda bacijêgêga n’obucîbone.