27
Okuyandika olu lushika
1 Mûsa, haguma n’abagula b’Israheli, barhegeka olubaga mpu: «Mula nge olu lushika mmuhîre ene oku lunali», 2 Amango wayikira Yordani, okolaga oyêrekîre mw’eci cihugo Nyamubâho Nyamuzinda wâwe akushobôza, onagwike amabuye manênene ogashîge engwa, 3 onayandikekwo ebinwa by’omu lushika byoshi, òkola wayikirira omu cihugo Nyamubâho, Nyamuzinda wâwe akuba, cihugo cihululamwo amarhà n’obûci, nka kulya Nyamubâho, Nyamuzinda wa basho anakubwîraga, 4 N’amango mwâbà mwamayikira Yordani, munagwîke ago mabuye oku ntondo ya Ebala, nk’oku mmurhegesire ene munagashîge engwa. 5 Onayûbakireho Nyamubâho, Nyamuzinda wâwe oluhêro, onayûbake n’amabuye ecûma cirhabinjaga. 6 Mabâle bubâle wayûbakiramwo Nyamubâho, Nyamuzinda wâwe oluhêro, n’olwo luhêro lwo wakazirherekêrakwo Nyamubâho, Nyamuzinda wâwe enterekêro, 7 lwo wakazibâgirakwo onashagaluke omu masù ga Nyamubâho, Nyamuzinda wâwe. 8 Oyandike kuli ago mabuye ebinwa by’olu lushika byoshi: obiyandike bwinjà.
9 Oku bundi Mûsa n’abadâhwa baleviti babwîra Israheli yêshi, erhi: «Hulika oyumve, wâni Israheli. Ene wahindukaga lubaga lwa Nyamubâho, Nyamuzinda wâwe. 10 Okolaga wayumvirhiza izù lya Nyamubâho, Nyamuzinda wâwe onakazishimba ebinwa n’amarhegeko nkurhegesire ene».
Okuyishigisha olubaga oku ntondo Garizîmi
11 Olwo lusiku Mûsa atwa olu lushika luyêrekîre olubaga: 12 «Amango mwâbà mwamayikira Yordani, eyi milala eri aha yanayimanga oku ntondo ya Garizîmi egishe olubaga. Omulala gwa Simoni n’ogwa Levi, ogwa Yûda n’o gwa Isakari, ogwa Yozefu n’ogwa Benyamini. 13 “N’eyi yindi milala mwabona, oku yanagendiyimanga oku ntondo ya Ebali, etulagule: omulala gwa Rubeni, ogwa Gadi n’ogwa Azeri, ogwa Zabuloni, ogwa Dani n’ogwa Nefutali”».
Abayishihehêrerwa
14 Abà leviti banajà eluhya babwîre bene Israheli boshi, erhi:
15 Aherêrekere mâshi, omuntu wabinja erhi okutula enshusho, bikabulirwa omu masù ga Nyamuzinda, mukolo gwa nfune za muntu mulenga, akanabifulika ahantu hafulike. N’olubaga lwoshi lwanaderha mpu: «Amen».
16 Aherêrekere mâshi, omuntu wakolera îshe na nina amaligo. N’olubaga lwoshi lwanaderha mpu: «Amen».
17 Aherêrekere mâshi, owahindula olubibi lw’omulungu. N’olubaga lwoshi lwanaderha, mpu: «Amen».
18 Aherêrekere mâshi, òwahabula omuhûrha. N’olubaga lwoshi lwanaderha, mpu: «Amen».
19 Aherêrekere mâshi, owahaba ecigolo, enfunzi n’omukana. N’olubaga lwoshi lwanaderha, mpu: «Amen».
20 Aherêrekere mâshi, owalâla bona muk’îshe, bulyâla abwîkwîre ecikwi c’ecirondo c’îshe. N’olubaga lwoshi lwanaderha, mpu: «Amen».
21 Aherêrekere mâshi, owalâla na cintu cirebe. N’olubaga lwoshi lwanaderha, mpu: «Amen». 22 Aherêrekere mâshi, owalâla bona mwâli wâbo oburhwa n’îshe erhi oburhwa na nina. N’olubaga lwoshi lwanaderha, mpu: «Amen».
23 Aherêrekere mâshi, owalâla bona nnazala. N’olubaga lwoshi lwanaderha, mpu: «Amen».
24 Aherêrekere mâshi, owashûrha omulungu bwifulikwè. N’olubaga lwoshi lwanaderha mpu: «Amen».
25 Aherêrekere mâshi, owayêmêra empongano mpu bayîrhe omwêru kwêru. N’olubaga lwoshi lwanaderha, mpu: «Amen».
26 Aherêrekere mâshi, orhalanziri arhanakulikiri ebinwa by’olu Lushika byoshi. N’olubaga lwoshi lwanaderha, mpu: «Amen».