OMUHANÛZI
Enshokolezi
Ecigabi cirhanzi c’eci citabu ciderhwa: «Ebinwa by’Omuhanûzi». Omu cihebraniya Omuhanûzi aderhwa Koheleti. Koheleti kwo kuderha: omuntu ohanûla omu ndêko. Omuhanûzi anacîderhe «Mwâna wa Daudi Mwâmi w’e Yeruzalemu». Kwo binali, owayandikaga eci citabu arhali Salomoni, ci wundi muntu waderhaga mpu Salomoni ye waciyandikaga. Owayandikaga eci citabu alonzagya engerêrezo zâge zifungirwe n’omuntu mukengwa bwenêne. Eci citabu cirharhondekanya bwinja ebinwa. Cinakavanga engerêrezo n’okugalukagaluka omu binwa byashambîrwe mîra. «Busha buno, ngasi kantu koshi kabà ka busha» (1, 2; 12, 8). Akalamo k’omuntu ebà ntondekanye y’ebijiro bya ngasi lubero birhagwêrhi nda na mugongo (3, 1-11). Akalamo kahwêra omu malibuko g’omu bushosi (12, 1-7). Obuzinda bw’omuntu kuli kufà. Boshi kufà banafè (3, 14-20). Idôso ly’ecitabu c’Omuhanûzi lyo na liguma n’idôso lya Ayubu. Ishuzo ly’Omuhahûzi lidesire mpu: «Okuli kurhahemberwa hano igulu». Ayubu n’omuhanûzi bo baguma bulya omuhanûzi ali muntu orhagwêrhe malibuko. Arhalonza okushambâla ebiyêrekîre amalibuko aka Ayubu walibuzibagwa bwenêne. Omuhanûzi abona kwône oku amasîma ga hano igulu gabà ga busha. Acîrhûliriza n’obushagaluke busungunu bw’akalamo ka hano igulu (3, 12-13; 8, 15; 9, 7-9). Omuhanûzi ali muntu wa buyêmêre, cikwône orhadêkereza murhima kulya kubà akalamo k’abantu karhegekwa na Nyamuzinda. Omuhanûzi ayêmêra okurhahêka Nyamuzinda lubanja (3, 11-14; 7, 13). Okushimba amarhegeko ga Nnâmahanga n’okumukenga kuli kwa bulagîrire bulya Ye yishi byoshi. Ecitabu c’Omuhanûzi ciyêrekana okujà enyanya kw’enyigîrizo z’idini, cirhuyigîriza oku kurhegesirwe okuyâka akalamo k’oburhogozi ka hano igulu. Obugale burhankalêrha akalamo kinjà kw’okuli.
EBIRIMWO
1. Ecigabi cirhanzi: Akalamo ka Salomoni: cigabi 1, 1—2, 26
2. Ecigabi ca kabirhi: Okufà n’omulala: c. 3, 1-16
3. Ecigabi ca kasharhu: Amahano ga ngasi lubero: c. 7, 1—12, 14
1
1 Emyanzi y’Omuhanûzi Koheleti, mwene Daudi, mwâmi w’e Yeruzalemu.
Ecigabi cirhanzi Enshula-mwanzi
2 Busha-busha, gwârhi omuhanûzi Koheleti, busha bwenêne. Byoshi bunabà busha. 3 Bunguke buci omuntu akûla omu kurhama arhama hano îdako ly’izûba? 4 Abarhanzi banagende, abandi bayishe, erhi n’igulu ho linayôsire liri. 5 Onabone izûba linyonyôke, izûba lizike, obone ligende lihike, lijinyonyôkera emunda lyajâga. 6 Empûsi onabone erhenge njir’îdako eyêrekere njira-nyanya, obone erhangibinduluka, kandi ehârhûle. 7 Enyîshi zoshi ebwa nyanja zija n’enyanja erhanayunjule, n’enyîshi zirhahwa zirhabululira emunda zâhwêra. 8 Ntâco cirharhamya. Ntâye wakaderha mpu aga masù garhabonaga obu, nîsi erhi mpu aga marhwiri garhasag’iyumva gasîme!
9 Okwàli kwo kwanabà, n’okwabîre kwacibà; na ntà kantu kahyâhya hanôla îdako ly’izûba. 10 Nka kula akantu baderhire, mpu: «lâba! mpu kahyâhya aka!» Okwôla kukola kubîre omu gandi mango. 11 Ci bulya kwône ntâye ocikengîre ebya mîra; ciru n’enyuma, ntâye wakengêra omu nsiku zâyisha.
Akalamo ka Salomoni
12 Niono Koheleti*1, 12 Niono «Muhanûzi», kuli kuderha olya mwandisi wayandikaga ecigabi cinene c’ecîra citabu, cidesirwe oku mpu ye mwâmi Salomoni, mwâmi w’Israheli, kulya kubà ye wali muntu w’obukengêre bunji., nali mwâmi w’Israheli, aha Yeruzalemu. 13 Najîre aho nalongereza n’oburhimanya ebijirwa banola îdako ly’izûba byoshi. Wâni sho, bushanja bubî Nyamuzinda ahîre abantu. 14 Nasingirîze ebijirwa hanôla îdako ly’izûba: kàli byoshi kubà kurhebwa kunabâ kubiva empûsi! 15 Ehiri hiniole hirhankaba hilongêdu, ehirhahali hirhankaganjirwa omu bindi.
16 Nacîderhêza niene obwo: nti oburhimanya ngwêrhe burhali bunyi, nti burhalusire abantangaga aha Yeruzalemu boshi. Nalolêrize oburhimanya bwoshi n’obumanye bwoshi. 17 Nacîyigîrize oburhimanya nayîga n’ebiyigwa, nashanga oku isirhe na buhwinja. Nayumwa oku ciru n’okwo, gali mango gafire busha. 18 Burhimanya bunji, mutula munji, obumanye oku buli bunji kwo bunarhamya.
*1:12 1, 12 Niono «Muhanûzi», kuli kuderha olya mwandisi wayandikaga ecigabi cinene c’ecîra citabu, cidesirwe oku mpu ye mwâmi Salomoni, mwâmi w’Israheli, kulya kubà ye wali muntu w’obukengêre bunji.