1 Omu mwâka gwa kali makumi abirhi n’irhanu kurhenga rhuli rhuhêsirwe bujà, oku murhondêro gw’omwâka, omu nsiku ikumi z’omwêzi, omu mwâka gwa kal’ikumi n’inni kurhenga olugo luli lunyazirwe, muli olwôla lusiku lwonênè, okuboko kwa Nyakasane kwanacicîhunika kuli nie, kwanacimpêka eyôla munda. 2 Mwâli omu kubonekerwa kw’obunyamuzinda, kwanacimpêka omu cihugo c’Israheli, kwanacindêkereza oku ntondo ndîrî bwenêne, na kuli eyôla ntondo kwàli obulî nka bûbake bw’olugo olunda lw’emukondwè. 3 Erhi abà amâmpisa eyôla munda nanacibona omuntu wali oshushire omulinga, àli afumbasire omu kuboko omugozi gw’ecitâni n’olusheke lw’okujà apîma, anaciyîmanga aha muhango. 4 Oyôla muntu anacimbwîra, erhi: Wâni, mwene omuntu, okazilolêreza n’amasù gâwe, onakayumvirhiza n’amarhwîri gâwe, onakaz’ibîkirira oku murhima ngasi ebi nakuyêreka byoshi, bulya kuya­nkirira ebyôla byabonekana kwo kwakudwîrhe hanôla, oj’ibwîra omulala gwa bene Israheli ngasi ebi wankanabona byoshi.

5 Nalola oku olukûta lwàli luzongolosire enyumpa olunda lw’embuga omu marhambi mwoshi, n’oyôla muntu àli afumbasire olusheke lw’okujà apîma, lwli lwa makano ndarhu, lwàli lujire lwagererwa oku makano n’oku makoro. Anacipîma obugali bw’obwôla bûbake bwàli lusheke luguma oku bugali, n’oku bulî lusheke luguma.

6 Okubundi anacijà ebwa akabadu k’enyumpa kali kadwîrhe kalola olunda lw’ebuzûka-zûba, anacirherema oku mashonezo gali okwôla kabadu, anacipîma oku c’olusò c’akôla kabadu: lusheke luguma oku bugali na lusheke luguma oku bulîrî; àjira ntyôla oku ngasi lusò. 7 Ngasi cûmpa càli cigwêrhe lusheke luguma oku bugali na lusheke luguma oku bulîrî; ekâgarhî k’enyumpa akazipîma makano arhanu. Olusò lw’akabadu, ebwa cizimbêro cijîre ebwa nyumpa nayo apîmayo lusheke luguma. 8 Ashubipîma ecindi cizimbero cijîre ebwa kabadu k’enyumpa, naco càli ca lusheke luguma. 9 Apîma ecizimbêro c’ebwa lusò, càli ca makano munâni, n’emitungo yayo yali ya makano abirhi. Olusò lw’akwôla kabadu lwo lwakazâgija ebwa nyumpa. 10 Ebyumpa byàli omu kabadu kw’olunda lw’ebuzûka-zûba: bisharhu lunda luguma na bindi bisharhu olu­ndi lunda; byoshi oku binali bisharhu byàli bigwêrhe lugero luguma, kuguma n’emitungo yali kwo yali ya lugero luguma. 11 Apîma obugali bw’omuhango gw’akabadu, bwàli bwa makano ikumi, n’obulî bwàli bwa makano ikumi n’asharhu. 12 Embere z’ebyumpa yali olugurhu lw’ikano liguma ngasi lunda, na ngasi cûmpa càli cigwêrhe makann ndarhu lunda luguma na gandi ndarhu olu­ ndi lunda. 13 Anacipîma omu burhungiri bwa ngasi kabadu, kurhenga oku cumpa kujà oku cûmpa, bwàli bwa makano makumi abirhi n’arhanu oku bugali, kurhenga oku muhango kujà oku gundi. 14 Anacipîma ecindi cizimbêro: càli ca makano makumi abirhi, co càli cizimbêro c’okulunga engo y’ahôla kabadu. 15 Amalanga g’embere g’akôla kabadu, n’amalanga g’omu ndalâlà gakazâg’ihika oku birheho gàli ga makano makumi arhanu. 16 Kwàli orhubonezo rhw’akayungiro oku byûmpa n’oku nkingi, omu kabadu n’omu mbaraza; orhwo rhubonezo rhwàli rhuzonzire enyumpa yoshi, n’ezo nkingi z’amabuye zàli­mwo emirhanda.

17 Anacimpêka ebwa bululi bwàli buyêrekîre olunda lw’embuga, nalola oku bwàli bugwêrhe ebyumpa byàli bibambire omu bululi bwâbyo; byàli eburhambi bw’obwôla bululi bw’embuga, hali byûmpa makumi asharhu oku bulî bw’ahwôla hantu hali habambirwe. 18 Ahwôla hantu habambirwe hàli hajîre hahika ebwa ngasi mulungulungu; hali hantu habambirwe omu ndalâlà. 19 Apîma obulî bw’akabadu kàli omu ndalâlà kuhika oku bululi bw’omu ndalâlà: kàli ka makano igana, kali olunda lw’ebuzûka-zûba.

20 Oku biyêrekîre olunda lw’emwênè, apîma yo obulî n’obugali bw’omuhango gwàli olwôla lunda lw’emwênè. 21 Eyo munda yali byûmpa bisharhu lunda luguma na bindi bisharhu olundi lunda; emitungo y’obwôla bululi n’ehy’olusò byâge byàli bigwêrhe lugero luguma n’ebyumpa by’akabadu ka burhanzi: makano makumi arhanu oku buli na makano makumi abirhi n’arhanu oku bugali. 22 Orhuhonezo rhwâbyo, n’akabadu kâyo n’emirhanda yali mitâke kwo, byoshi byàli bigwêrhe lugero luguma n’ebya akabadu k’olunda lw’ebuzûka­ zûba. Bakazâg’ishonerayo omu kugera oku mashonezo nda, n’olusò lwâge lwanali hôfi n’agôla mashonezo. 23 Obululi bw’omu ndalâlà bwàli bugwerhc nabo akabadu, kali kayêrekîre akabadu k’olunda lw’emwênè, kali kuguma n’aka olunda lw’ebuzûka-zûba; apîma kurhenga oku kabadu*40, 23 akabadu mpu «vestibule» omu c’e mazûlu kujà oku kandi; gali makano igana.

24 Ashubimpêka kandi olunda lw’emukondwè, nalola oku yali akabadu, kàli kayêrekîre olwôla lunda lw’emukondwè, apîma banabwigorhe†40, 24 banabwigorhe, mpu zo «poteau» omu c’e mazûlu kuguma n’akabadu, byoshi byàli bigwêrhe lugero luguma. 25 Omuhango gwàli gugwcerhe orhubonezo rhushushîne n’orhwa akabonezo. Gwàli gugwêrhe makano makumi arhanu oku bulîrî, na makano makumi abirhi n’arhanu oku bugali. 26 Bakagisôkera yo oku mashonezo nda, n’akabadu kâge nako kanali aha burhambi, olunda n’olundi yali etâsirwe emirhanda oku mitungo. 27 Obululi bw’omu ndalâlà nabo bwàli bugwêrhe omuhango guyêrekîre olunda lw’emukondwè gali makano igana.

28 Anacimpêka omu bululi bw’omu ndalâlà, kugera omu muhango guli olu­nda lw’emukondwè, nago gwàli gugwêrhe bipîmo biguma. 29 Ebyumpa byâgo, banabwigorhe bagwo, byoshi byàli bigwêrhe lugero luguma; obwôla bululi bwàli bugwêrhe orhubonezo omu marhambirhambi, kuguma n’akabadu. 30 Omu marhambi g’obwôla bululi mwâli akabadu, obulî bwamwo gàli makano makumi abirhi n’arhanu na makano arhanu oku bugali. 31 Akabadu kâge kali kayêrekîre obululi bw’embuga, banabwigorhe bâge bali batâkekwo emirhanda n’okujà yo kwàli kugera kuli mashonezo munâni.

32 Kandi anacimpêka omu bululi bwàli olunda lw’omu ndalâlà, olunda lw’ebuzûka-zûba, anacipîma omuhango gwàli yo, nago gwàli gugwêrhe bipîmo biguma. 33 Ebyumpa byâge, emitungo yâge n’akabadu kâge, byàli bigwêrhe bipîmo biguma; omuhango kuguma n’akabadu kâge byàli kwo orhubonezo omu marhambi mwoshi. Obwôla bululi bwàli bugwêrhe obulî bwa makano makumi arhanu na bugali bwa makano makumi abirhi n’arhanu. 34 Akabadu kâge kali kayêrekîre obululi bw’embuga n’emitungo yakwo yali mitâke emirhanda olunda n’olundi, hali na mashonezo munâni g’okusôkerayo.

35 Kandi anacimpêka ebwa muhango gw’olunda lw’emwênè, anacipîma yo ebipîmo biyumânîne. 36 Yali ebyumpa, emitungo, akabadu. n’orhubonezo omu marhambi mwoshi. Obulî bw’ogwôla bwàli bwa makano makumi arhanu na makano makumi abirhi n’arhanu oku bugali. 37 Akabadu kâge kàli kayêrekîre obululi gw’embuga, n’emitungo yako yali mitâkekwo emirhanda, hali na mashonezo munâni g’okusôkera yo.

38 Yali n’ecumpa cigwêrhe olumvi hôfi n’emitungo y’omuhango; aho ho bakazishukira enterekêro y’embâgwa. 39 Omu kabadu k’omuhango mwâli mêza abirhi lunda luguma na gandi abirhi olundi lunda. Kuli agôla mêza kwo bakazâg’ibâgira eby’enterekêro y’ensirîra ey’okuhûna obwonjo oku byâha n’ey’agandi mabî. 40 Olunda lw’embuga, oku muntu ogezire ebwa lunda lw’e­ mwênè, yali mêza abirhi, n’olundi lunda ebwa kabadu k’omuhango nayo yali mêza abirhi. 41 Ntyo ebwa muhango yali mêza anni lunda luguma na gandi anni olundi lunda, goshi gahika omu mêza munâni gwo bakazâg’ibâgirakwo. 42 Hali mêza anni oku nterekêro z’ensirîra, gàli ga mabuye marhendêze, obulî ikano liguma n’ecihimbi, obugali ikano n’ecihimbi n’oburherema bwâgo ikano liguma, kwo bakazâg’idêkereza ebirugu by’okubâga enterekêro z’ensirîra n’ezindi nterekêro. 43 Emihiro mitâkekwo ebibabi omu bugali yalihizirwe omu ndalâlà kuli ago mêza kwo bakazâgidêkereza enyama z’enterekêro.

44 Emugongo g’omuhango gw’omu ndalâlà mwâli ebyumpa by’abimbiza b’omu bululi buli omu ndalâlà. Cûmpa ciguma càli ebwa muhango g’olunda lw’emwênè, cakazâg’ilola olunda lw’emukondwè; ecindi càli ebwa muhango gw’olunda lw’emukondwè, cakazâg’ilola olunda lw’emwênè. 45 Olya muntu anacimbwîra, erhi: Ecôla cûmpa ciri olunda lw’emukondwè, ciri ca badâhwa bâli omu mikolo y’aka-Nyamuzinda. 46 N’ecumpa ciri olunda lw’emwênè ciri c’abadâhwa badwîrhe bakola oku luhêrero; bali bene Sadoki, baguma b’omu bene Levi, bo bayêgera Nyamubâho n’okumurhumikira.

47 Olya muntu anacipîma obululi, bwàli bugwêrhe obulî bwa makano igana n’obugali bwa makano igana, empande zoshi zàli ziyumânîne, Oluhêrero lwàli embere z’enyumpa.

48 Kandi anacimpêka omu kabadu k’enyumpa anacipîma emitungo y’akola kabadu, yali ya makano arhanu oku lunda luguma na gandi arhanu oku lundi lunda, n’obugali bw’akabadu bwàli bwa makano asharhu ga lunda luguma na gandi asharhu g’olundi lunda. 49 Obulî bw’akabadu bwàli bwa makano makumi abirhi n’obugali bwàli bwa makano ikumi na liguma; okusôkera yo kwàli kugera oku mashonezo; hali n’enkingi aha burhambi bw’emitungo, nkingi nguma lunda luguma n’eyindi olundi lunda.