1 Okubundi anacimpêka omu ka-Nyamuzinda, anacipîma emitungo egwêrhe makano ndarhu oku bugali lunda luguma, na gandi ndarhu ga bugali oku lundi lunda bugali bw’ihêma. 2 Obugali bw’omuhango bwàli bwa makano ikumi; ebizimbêro by’ogwôla muhango byàli bya makano ikumi oku lunda luguma, na gandi makano arhanu olundi lunda. Anacipîma obulîrî bw’aka-Nyamuzinda: makano makumi anni oku bulîrî na makano makumi abirhi oku bugali.

3 Oku bundi anacikanya ajà omu ndalâlà, apîma emitungo y’aha muhango, yali ya makano abirhi oku bugali n’oku bulî gàli makano ndarhu; ebizimbêro by’omuhango: makano nda. 4 Anacigera obulî bw’ecumpa, bwàli bwa makano makumi abirhi, n’obugali bwâco bwàli bwa makano makumi abirhi omwôla ndalâlà y’aka-Nyamuzinda, anacimbwîra, erhi: Ahôla ho Hatagatîfu ha Ahatagatîfu.

5 Anacipîma olukûta lw’enyumpa: makano ndarhu, n’obugali bw’akafômeko k’eburhambi: makano anni oku burhambi bw’enyumpa bwoshi. 6 Oku rhundi rhufômeko rhwàli omu marhambi hali nkere isharhu y’orhufômeko rhujire rhwayûbakirwa rhuguma enyanya ly’orhwâbo n’eyôla myûbako yahika kali makumi asharhu, orhwôla rhufômeko rhwankarhuma omu lukûta lwàli lurhuyûbakîrwe omu marhambi g’enyumpa mwoshi, kulya kwankarhuma rhukaziyêgemerwa olukûta lw’enyumpa rhurhanaluhisirikwo. 7 Orhwôla rhufômeko, oku obuyûbake bwajà enyanya erhi kwo narho rhwanagaliha bulya idako lwâbà lugali kulusha olw’ekâgarhî, n’olw’aha kâgarhî lulushe olw’oku lukere lw’enyanya.

8 Nanacibona oku eyôla nyumpa omu marhambi mwoshi yali elengerîre n’okusimikira kuli orhwôla rhufômeko. Omusinji gw’orhwôla rhufômeko gwapîma olusheke lugumagumà na makano ndarhu ebwa kahembe. 9 Olukûta lw’embuga lw’akafômeko lwàli lugwêrhe obugali bwa makano arhanu, lwasiga engo ekarhî k’orhwôla rhufômeko rhw’enyumpa. 10 Ahantu harhali hayûbake kujà ebwa biyûmpa byàli eburhambi hali n’obugali bwa makano makumi abirhi omu marhambi g’enyumpa mwoshi. 11 Akafômeko kàli kagwêrhe omuhango gwakazâg’ijà ebwa ngo, muhango muguma olunda lw’emwênè na gundi muguma olunda lw’emukondwè; obugali bw’engo bwàli bwa makano arhanu omu marhambi mwoshi.

12 Enyumpa yali aha mbêre h’ahantu harhàli hayûbake olunda lw’ebuzika-zûba, yali egwêrhe makano makumi gali ndarhu ga bugali, olukûta lw’enyumpa lwàli lugwêrhe makano arhanu oku bugali omu marhambi mwoshi, n’oku buli gali makano makumi gali mwenda. 13 Anacipîma aka-Nyamuzinda kali ka makano igana oku buli, ahantu harhali hayûbake, enyumpa na enkûta zâyo byoshi bigwêrhe obulî bwa makano igana. 14 Obugali bw’embere z’aka-Nyamuzinda kuguma n’ahantu harhàli hayûbake, kujà olunda lw’ebuzûka-zûba, gàli makano igana. 15 Anacipîma obulî bw’enyumpa embere z’ahantu harhali cici, n’ahwôla hantu, hali oku buzindazinda bw’enyumpa n’orhonga rhwâyo bwâbà buli bwa makano igana.

Ecumpa cigali c’omu ndalâlà, orhubadu rhwàli rhuyêrekîre obululi, 16 e­by’olusò, orhubonezo rhwàli mwo orhuyungiro, orhonga, amarhambi goshi g’empande isharhu kuyêrekera ebwa lusò ebyôla byoshi byàli bibambire n’e­mpaho, kurhenga oku idaho kujà oku rhubonezo. 17 Kuhika oku nyanya ly’omuhango, kuhika omu ndalâlà n’embuga bakazâg’ilekahwo abantu, 18 hwo bakazâgitâka ba kerûbini n’emirhanda: murhanda muguma ekarhî ka bakerûbini babirhi; ngasi kerûbini ali agwêrhe malanga abirhi: 19 amalanga g’omuntu gali gayêrekîre ebwa murhanda muguma, amalanga g’entale gayêrekîre olunda lw’ogundi murhanda; banajà bajira ntyôla oku nyumpa yoshi. 20 Kurhenga oku idaho kujà enyanya ly’omuhango balijire batâkayo ba kerûbini n’emirhanda oku lukûta lw’aka-Nyamuzinda. 21 Aka-Nyamuzinda kali kagwêrhe orhubonezo rhw’omuhango rhwàli rhuyûmânîne empande zoshi.

N’embere z’Ahatagatîfu, yali agali nka luhêrero lwa mpaho. 22 Oburherema bw’olwôla luhêrero bwàli bwa makano asharhu n’obulî bwa makano abirhi, lwàli lugwêrhe orhuhembe, n’omu bulîrî bwâlwo, ebirhebo by’empaho. Anacimbwîra, erhi: «Alaga amêza gali embere za Nyamubâho».

23 Aka-Nyamuzinda n'Ahatagatîfu mwâli ngasi haguma omuhango. 24 Ngasi lumvi lugwêrhe mpande ibirhi, mpande ibirhi zakazâg’igonywamwo bihimbi bihimbi: bihimbi bibirhi oku luhande luguma, zindi ibirhi oku lundi luhande. 25 Oku nyanya ly’ezôla nyumvi bali bajire batâkakwo bakerûbini n’emirhanda kuguma nka balya banali oku birhebo. Olubigabiga lw’empaho lwàli enyanya lya ngasi muhango gw’embuga. 26 Kwàli amadirisha galikwo orhuyungiro, matâke n’emirhanda, gali ngasi lunda ebwa birhebo bya ngasi kabadu n’ebwa rhufômeko rhw’enyumpa, kuguma n’omu mbigabiga.