1 Omu mwâka gwa kali ikumi na munâni, omu nsiku makumi abirhi n’ibirhi z’omwêzi gwa burhanzi, barhondêra okuderha oku bwâmi mpu Nabukondonozori mwâmi w’Asîriya akola alonza okucîhôla omw’igulu lyoshi nk’oku anali amâhiga. 2 Anacishûbûza entwâli zâge zoshi n’abarhambo bâge; banacijira ihano bufunda funda; anacirhôla omuhigo yêne omu kanwa kâge gw’okumalîra ecihugo coshi. 3 Boshi banacirhôla ogwo muhigo gw’okumalîra balya boshi barhashimbaga akanwa kâge. 4 Erhi abà amârhôla ogwo muhigo gwâge, Nabukondonozori, mwâmi w’Asîriya, anahamagala Holoferno, ye wali murhambo mukulu w’engabo zâge na wa kabirhi oku bukulu. Anacimubwîra, erhi: 5 «Omwâmi mukulu oku adesire kw’oku, ye mwâmi mukulu w’igulu lyoshi: “Okanye ogende n’abantu bikubagirwa omu burhwâli bwâbo, ba bihumbi igana na makumi abirhi bagenda n’amagulu n’engabo erhali nyi ya bihumbi ikumi na bibirhi bya balwî b’oku nfarasi”, 6 “obulirhêra abantu b’omu bihugo by’obuzikira-zûba bulya barhayumvagya akanwa kâni”. 7 “Obabwîre barheganye idaho n’amîshi bulya nkola nabatulakwo entambala muli obu bukunizi bwâni; abasirika bâni bakola bashandabana omu igulu lyoshi, banabanyâge”. 8 “Abatumisirwe ebibande muli bwo babumba emisima, n’emirhumba yabumba emigezi n’enyîshi zihulula”. 9 “Nabagwarhamwo abajà kurhenga ebuzinda bw’igulu”. 10 “Kuli we okanyagye, ogend’ingwârhira eco cihugo câbo; bônene bayisha bacîdwîrhe emunda oli, onabandangire kuhika oku lusiku lw’obuhane bwâbo”. 11 “Kuli bacikanyi cirhagomba, isù lyâwe lirhababaliraga ciru n’omuguma, obanigûze, onahagule ecihugo câbo”. 12 “Bulya niono ndahîre mbofa, mbonyagwa n’obwâmi akabà oku naderhaga ntanakujiziri na okuboko kwâni”. 13 “Kuli we wênene, omanyâge wankaderha mpu warhalukiza ciru n’oburhegesi buguma muli ebîra binwa bya Nnâhamwinyu, ci obishimbe bwinjà nk’oku nakurhegesire, ojire duba”».

14 Oku arhenga omu mwa nnâhamwâbo, Holoferno anahamagala ngasi banali bakulu boshi, abarhambo bakulu b’abalwî, abarhambulaga engabo y’Asûru. 15 Anacigabula abantu oku bagend’ilwa nka kulya mwâmi ananamurhegekaga: bihumbi igana na makumi abirhi bagenda n’amagulu, ba muherho, na bihumbi ikumi na bibirhi balwa n’enfarasi; 16 anabakerekanya kulya bankanahash’ikerekanya engabo oku matabâro. 17 Omu kuhêka emizigo yâbo arhôla engamiya, bapunda, bapunda-farasi mwandu, n’oku lwîko lwâbo, barhôla ebibuzi, ebimasha, empene mwandu. 18 Kuguma barhôla n’ebiryo, mwandu kuli ngasi mulume amasholo n’ensaranga zarhenga omu mbîko ya mwâmi, binji bwenêne.

19 Anacilîkûla ajà oku matabâro ye n’omurhwe gwâge mpu abè ashokolera mwâmi Nabukondonozori, anashandabane omu cihugo c’ebuzikira-zûba na zirya ngâlè zâge na balya banyakulwîra oku nfarasi bâge, kuguma na balya basirika balambagira n’amagulu, boshi balume ba ntwâli. 20 Abantu bayishaga babakulikîre bâli mwandu nka nzige, nka mushenyi gw’okw’idaho, ntâye wankahashir’ibaganja erhi bunji burhuma.

21 Barhenga e Ninive, bajira nsiku isharhu bagenda omu kabanda ka Bektileti. Bagenditwa ecirâlo hôfi n’entondo yali eyegîre Silisiya w’enyanya, ebwa kumosho. 22 Anaciyanka engabo yâge yoshi, banyakulambagira n’amagulu, banyakulwîra oku nfarasi, abà engâlè, akanya, ajija oku ntondo. 23 Arhema anahonjeka Puto na Ludu; anyaga bene Rasisi boshi, na bene Ismaeli ababà hôfi n’irungu, eburhambi bw’ecihugo ca Sheleoni. 24 Akulikira Efrata yêshi, arhulukana omu Mezopotamiya, ashandâza ebishagala byoshi byanali enyanya ly’omugezi gw’Abroni kuhika oku nyanja. 25 Arhôla ecihugo ca Silisiya coshi, anigûza ngasi balya banakazâg’irhangula okumucîka, alinda ahika oku lubibi lwa Yafeti, eburhambi bw’Arabiya. 26 Agorha bene Mediana boshi, ayôca enyumpa zâbo, anyaga n’amasò gâbo. 27 Anacibungulukira omu kabanda ka Damasko amango g’okukalala emburho, ayôca amashwa gâbo goshi, anigûza ebibuzi byâbo, ebimasha byâbo, ahagula ebishagala byâbo, emanda zâbo zoshi azijira bwâmwa, n’abâna-rhabana boshi abageza oku boji bw’engôrho. 28 Ajugumya abantu hoshi banayûbakaga oku burhambi bw’enyanja, ab’e Sidoni, ab’e Tiri, abayûbakaga e Suri, e Okina n’abayûbakaga e Yamuniya, e Azoti n’e Askaloni: bajuguma bwenêne embere zâge.