3
1 Banacimurhumira entumwa z’okushenga omurhûla, mpu: 2 «Alà oku rhwono rhuli bantu ba Nabukondonozori, omwâmi mukulu, rhwono rhuli embere zâwe, orhujire nk’oku wankanalonza. 3 “Alà enyumpa zîrhu, ecishagala cîrhu coshi, amashwa gîrhu g’engano, ebibuzi bîrhu, enkafu zîrhu, na ngasi busò bw’omu nyumpa zîrhu zoshi; byoshi biri embere zâwe, obikolêse nk’oku wankanalonza”. 4 “N’ebishagala bîrhu ebi n’abantu balimwo boshi, rhuli bajà bâwe. Oyîshe olambagiremwo kulya onabwîne kuli kwinjà”». 5 Abo bantu ba cihâna ntyo emwa Holoferno, banacimuyinginga n’ebyo binwa biri ntyo. 6 Anacirhôla omwandagalo gwâge n’engabo yâge yoshi; anacihira abalanzi omu cihugo câbo; anacisingamwo abandi basirika omu balume banali ba ntwâli boshi. 7 Banacimuyankirira bôhe omu cishagala câbo coshi; bakayisha bayambîrhe ebimanè by’okushiga; bakayisha basâma banarhimba engoma. 8 Ahagula omu cishagala câbo coshi, anatwa emirhi yâbo. Banacimuyêmêrera okuhongola eby’abazimu omwo cihugo coshi, lyo amashanja goshi gaharâmya Nabukondonozori yênene, na ngasi bûko bwâbo n’olulimi lwâbo lwamushenga nka Nyamuzinda wâbo muguma yênene. 9 Alinda ahika ah’ishiriza ly’Esdreloni hôfi na Dotaya oli hôfi n’omuzinzi munene gw’entondo z’e Buyahudi. 10 Anacihanda ekarhî ka Geba na Shitopolisi; anacigezaho mwêzi mugumagumà adwîrhage ashûbûza analundika bwinjà bwinjà ebirugu by’engabo yâge.