1 Banacimanyîsa Holoferno, ye murhambo mukulu w’abalwî b’Asûru oku bene Israheli badwîrhe bacîrheganya okulwa n’oku bafusire enjira z’omu ntondo, oku bazungulusire enkûta oku ngasi ntondo enali enyanya zinarhalusire ezâbo, n’oku bahizire emirhego omu ngasi rhubanda. 2 Yêshi anaciyâka bwenêne n’oburhè, ahamagala abarhambo n’engabo y’e Mowabu boshi abakulu b’abasirika b’engabo y’e Amoni n’abashamuka b’oku burhambi bw’enyanja, anacibabwîra, erhi: 3 Mbwîri nâni bene Kanâni lwo lubaga luci olwo luyûbaka omu ntondo, bishagala bihi luyûbaka, omurhwe gwâbo gw’okulwa gwanahika omu bantu banga, buhashe buci bajira, na bulyo buci balwamo, mwâmi wâbo ye ndi, ndi murhambo obadwîrhe oku matabâro? 4 Cirhumire bône omu bantu bayûbaka eno buzikira-zûba bo balahire okujà eno munda ndi?

5 Akioro, murhambo wa bene Amoni boshi, anacimubwîra, erhi: «Nnâhamwîrhu ayumve akanwa k’omurhumisi wâge. Nanakumanyîsa eby’okunali byoshi kuli olwo lubaga luyûbaka kula ntondo enali hôfi n’ecirâlo câwe, na ntà bunywesi bwarhenga omu kanwa ka mwambali wâwe. 6 “Olwo lubaga luli lw’oku bûko bw’Abanya-Kaldeya”. 7 “Bayûbakaga mîra e Mezopotamiya, ci barhayêmêraga okukolera abazimu b’ababusi bâbo b’eyo Kaldeya”. 8 “Barhenga omu njira y’ababusi bâbo bakaz’iharâmya Nyamuzinda w’e mpingu, Nyamuzinda banamanyaga bwinjà bwinjà oku ho anabà. Erhi bakagwa n’ababusi bâbo, babahêka kuli n’abazimu bâbo, bayâka aho bàbâga, bajiyûbaka handi omu Mezopotamiya nsiku ndi”. 9 “Oyo Nyamuzinda waho anacibabwîra mpu barhenge omu cihugo câbo, bagend’iyûbaka omu cihugo ca Kanâni; banacigend’iyûbaka eyo munda, n’erhi bayihika, bagala omu masholo, omu nsaranga n’omu masô g’ebintu mwandu”. 10 “Banacibungulukira omu cihugo c’e Mîsiri erhi ishali likali lyamâzûka omu Kanâni, banayûbaka eyo munda amango banacikazâg’ibonayo ebiryo byoshi; eyôla munda banaciluga bwenêne, ntâye wankacihashire okuganja ngasi bûko bwâbo”. 11 “Mwâmi w’e Mîsiri anacibashomba, abarhindibuza n’omukolo gw’okujira amatofali, babajira kuligo bahinduka bajà”. 12 “Banacilakira Nyamuzinda wâbo, naye alibuza abanya-Mîsiri n’ebibande birhayishigi bafumu”. 13 “Abanya-Mîsiri banabalibirhakwo emwâbo”: 14 “Nyamuzinda ayûmya enyanja Ndukula erhi bo bàrhuma, abageza omu njira y’e Sînayi, n’omu Kadesi-Barneya; anacikungusha abantu bayûbaka omu ntondo boshi”. 15 “Bayûbaka omu cihugo c’Abanya-Amori; bahungumulamwo Abaheshiboniti erhi misî yâbo erhuma. Erhi babà bamâyîkira Yordani, ba nayûbaka entondo yoshi,” 16 “balibirhakwo Abanya-Kanâni, Abaferezeni, Abayebuseni, Abanya-Sikemi, Abanya-Girgashi, babêra omwo cihugo nsiku nyinji”. 17 “Amango goshi barhanajira kubî embere z’oyo Nyamuzinda, anabagwâse oku iragi lyâbo, bulya ye nabo bagaya obulyâlya”. 18 “Ci erhi banarhengaga omu njira abalangûlaga banagukumuke n’okulwa kwa ngasi lubero, bahêkwe bujà omu by’ihanga, aka-Nyamuzinda wâbo koshi bakajire bwâmwa n’ebishagala byâbo binyagwe n’abashombanyi bâbo”».

19 «Buno, ebwa kubà bashubir’igomera Nyamuzinda wâbo, barhenzirage emunda bajaga babashandâliza, bashubir’iyûbaka omu Yeruzalemu, banahira mwo oluhêrero lwâbo. Banacishub’iyûbaka omu ntondo yali ekola ebà irungu. 20 “Na buno Yâgirwa Muhanyi, akabà olwo lubaga lwajizire amabî, bagayisa oyo Nyamuzinda wâbo, rhulole erhi muli bo munali eco cankarhuma bahimwa, kandi rhwanasôkera emwâbo, rhwanabahima”. 21 “Ci akabà ntà bubî balimwo, Nnawîrhu kwanabà kwinjà aharhalukire, bulya oyo Nyamuzinda wâbo anahash’ibalwîra, kandi obone rhwamarhenzayo okwarhubonêsa nshonyi omu igulu lyoshi”».

22 Erhi Akioro ayûs’ishambâla ebyo binwa, omwîdudumo gwazûka omu ngabo yali ezungulusire enyumpa n’abàlimwo. Abarhambo ba Holoferno, kuguma n’abantu bayûbakaga oku burhambi bw’enyanja na bene Mowabu baderha mpu bamuyîrhe. 23 N’ecarhuma bulya rhurharhinyiri abo bene Israheli. Luli lubaga lurhajira buhashe na misî mici y’okulwa kuzibu. 24 Co carhuma rhwono rhwasôka, wabona oku balibwa na engabo yâwe yâgirwa Holoferno.