1 Erhi olubî luhwa muli balya bantu bâli bazongolosire endêko, Holoferno, omurhambo mukulu w’engabo y’abalwî b’Asûru, anacibwîra Akioro na ngasi bandi bene Mowabu embere za olubaga lw’ahandi erhi: 2 «Oli muntu muci wâni Akioro na bala balimya bene Efrayimu, obu okola wajira obulêbi kuli rhwe, onakola warhubwîra buno mpu rhurhajag’ilwîsa bene Israheli ebwa kubà Nyamuzinda wâbo anakabalwîra! Ndi Nyamuzinda kuleka Nabukondonozori? Yênene arhuma engabo yâge, anabaheze hano igulu, n’oyo Nyamuzinda wâbo arhabayôkole. 3 Ci rhwono bambali ba Nabukondonozori wabona oku rhwabarhimbaguliza nka muntu muguma, barhankaderha mpu bacîshomya embere z’enfarasi zîrhu. 4 Rhwabayôkera eyo mwâbo, n’entondo zâbo zalaluka omukò gwâbo, orhubanda rhwâbo rhuyunjule mifù. Barhabone misî y’okuhangaza embere zîrhu, ci kukwânîne boshi bafè, kwo adesire mwâmi Nabukondonozori orhegeka igulu lyoshi. 5 Bulya adesire, n’ebinwa byâge birhagaluka kône. Kuli we wâni Akioro mulimya wa bene Amoni we, odesire ebîra binwa, ahâla onajirire okubî, orhakacilola oku busù bwâni, kurhenga ene, kuhika ncîhôle kuli balya barhengaga e Mîsiri. 6 Okubundi obwo, ecûma c’engabo yâni n’omurhwe gwa bambali bâni cakurhulungula enkanga na hano nshubûka, bakuhimbagulize, ofè. 7 Bambali bâni bakola bakuheka omwo ntondo, baj’ikuhira omu cishagala cigwêrhe akafomeko. 8 Na hano ofà, wânafà haguma nabo. 9 Na kulya kubà olangâlîre oku barhagwârhwe, omanye obusù bwâwe burhacizinzibalaga. Nadesire, na ntâko kurhabè omu binwa byâni.»

10 Holoferno anacirhegeka abambali bali omu nyumpa mpu bagwârhe Akioro, bamuheke e Betuli, bamuhane emwa bene Israheli. 11 Balya barhumisi banacimugwârha, bamurhenza omu cihando, bamuhêka omu kabanda, banacirhenga omwo kabanda, basôkera oku ntondo bahika aha maliba gali hôfi na Betuli. 12 Abantu b’omwo lugo erhi bababona, banacirhôla emirasano yâbo, banacishagamuka omu lugo, bajà oku irhwêrhwè ly’entondo. Abalwa n’amabuye babacîka okusôka omu kubabanda amabuye. 13 Banacizonga omu marhambi g’entondo, baziriringa Akioro, bamukwêba halya erya ntondo erhondêrera, banacishubira emunda nawâbo ali. 14 Oku babunguluka oku ntondo, bene Israheli banarhinda ahâli; bamushwêkûla, bamuhêka e Betuli, baj’imuyêreka abakulu b’ecishagala. 15 Mw’ago mango, abo bakulu bali: Uziyahu, mwene Mika, w’omu bûko bwa Simoni, Shabrisi, mugala wa Gotonieli na Sharmisi mugala wa Melkieli. 16 Banacishûbûza abashamuka b’oku lugo loshi, n’abâna n’abakazi boshi balundûkira bw’eyo endêko. Banaciyisha badwîrhe Akioro omu karhî k’olwo lubaga loshi, na Uziyahu anacimudôsa kurhi byabîre koshi, 17 Anacibashuza, abashambalira n’olwo lw’endêko ya Holoferno, ebinwa ananaderhaga omu karhî k’abarhambo b’Asuru na ngasi bindi analogosire kuli bene Israheli byoshi. 18 Olubaga lwafukamiriza, lwaharâmya Nnâmahanga, lwayâma, mpu: 19 «Nnâhamwîrhu, Nyamuzinda w’empingu, olole obwo bucîbone bwâbo, obwonjo bw’okunenaguzibwa kw’olubaga lwâwe bukugwârhe, olole Yâgirwa muli luno lusiku obusù bw’abà wagishaga!» 20 Barhûliriza Akioro banacimukuza bwenêne. 21 Erhi barhenga omw’ihano, Uziyahu amuhêka emwâge, n’abashamuka abahà oku mamvu. Banacirhondêra bashenga oburhabâle emwa Nyamuzinda w’Israheli muli obwo budufu boshi.