1 Erhi buca Holoferno arhegeka engabo yâge, emirhwe yâge yoshi, na balya bàyîshaga okubarhabâla mpu bagandûle bahêke ecirâlo e Betuli, bagwârhe obuhumana bw’entondo, banalwîse bene Israheli. 2 Olwo lusiku abasirika bâbo boshi bagandûla; emisî yâbo omu kuganja abalume b’amatabâro bali bihumbi igana na makumi gali ndarhu ga bantu bagenda n’amagulu, bihumbi ikumi na bibirhi bya bantu bagenda n’enfarasi, buzira kuganja ab’emikolo n’abandi bayishaga babalusize: gwàli mwandu gurhankaganjwa. 3 Banacitwa olugerêro omu kabanda hôfi na Betuli aha iriba. Banacihanda omu murhambirhambi kuhika e Belbayim na Dotayimi, kandi kurhenga e Betuli kuhika e Shiyamoni ah’ishiriza lya Esdreloni. 4 Bene Israheli erhi babona erya nkûmo y’abantu, bayô boha, ngasi muguma akabwîra owâbo erhi: «Lêro abâla boshi bamalîra igulu. Ntà ntondo ejîre enyanya, nîsi erhi kafômeko, erhi hirhondo hyankalembera obuzirho bwâbo». 5 Erhi babà bamârhôla ngasi muguma eby’okulwa, n’erhi babà bamâyâsa orhumole oku minâra y’okulanga, bageza obwo budufu boshi babalinzire.

6 Oku lusiku lwa kabirhi, Holoferno ayisha adwîrhe balya basirika bâge bagenda n’enfarasi boshi; abageza olunda bene Israheli bali, omu Betuli, alâba emihango y’ebishagala byâbo byoshi. 7 Arhangula amaliba gâbo goshi, aganyaga, anahiraho abalanzi; yêne ashubira emunda engabo yâge yali. 8 Na, erhi bamujaho, bene Ezau boshi, abarhambo ba bene Mowabu boshi, abarhambo b’oku lunda lw’enyanja, bamubwîra, mpu: 9 «Nnawîrhu ayumve bwinjà akâla kanwa lyo engabo yâwe elek’itumirhwa. 10 “Bulya olu lubaga lwa bene Israheli emisî yâbo bayihira arhali omu kulwa amatumu ci omu bulîrî bw’ezi ntondo bayûbakamwo. Kurhali kulembu okusôka ezi ntondo bayûbakamwo”».

11 «Yâgirwa orhaderhaga mpu okerêse abantu okala wabalwîsa na ntyo harhahirime ciru n’omuntu muguma omu mirhwe yâwe. 12 “Obêre oku lugerêro lwâwe, olange kwo abantu b’emisî yâwe, n’abarhumisi bâwe bagend’ilanga amaliba garhenga omu marhambi g’entondo”. 13 “Bulya ahôla ho abantu b’e Betuli boshi bayish’ikadôma: enyôrha yabasêza okuhâna olugo lwâbo. Kuli rhwe rhwenene, rhukola rhwasôkera oku marhwêrhwè g’entondo ziri hôfi, rhugend’itwayo amacûmbi g’okubalanga lyo balek’ijira owarhenga omu lugo”. 14 “Ishali lyabahungumuliramwo na bakâbo n’abâna bâbo embere engôrho ebahôlereze; balambûkira omu njira z’aha bayûbaka”. 15 “Kandi wênene wanayishig’ibahemba kulya kugalugalu banakwânîne, bulya barhalonzagya okuyîsh’ishiga n’omurhûla emunda oli.”»

16 Ebyo binwa byasîmîsa bwenêne Holoferno n’engabo yâge; anacirhegeka mpu bajire okwo banadesire. 17 Cikembe ciguma ca bene Amoni cagenda na bene Asûru bihumbi birhanu, bahanda omu kafômeko k’entondo, banyaga enyîshi n’amaliba ga bene Israheli. 18 Nabo bene Ezau na bene Amoni basôka e ntondo bagend’itwa icumbi oku ntondo ya Dotayimi, banacirhuma abantu bâbo olundi lunda lw’ishiriza lya Egrebeli hôfi na Kusi, cishagala cibà hôfi n’omugezi gwa Mokimuri. Abasigalaga omu ngabo ya Asûru bahanda omu kabanda, bakabumba bantu. Amahêma gâbo n’ebirugu byâbo byajira olugerêro lw’orhuyumpa rhunji rhunji, nabo bône bâli ngabo nyinji bwenêne.

19 Bene Israheli balakira Nnâmahanga Nyamuzinda wâbo, erhi boshi bamârhemuka, bulya bamâgorhwa n’abashombanyi bâbo, na ntâko bankacihashire okubafumamwo. 20 N’eyo ngabo ya bene Asûru yanacibazunguluka ntyo nsiku makumi asharhu: abalambagira n’amagulu kône, abagenda omu ngâlè n’abagenda n’enfarasi. Abantu b’e Betuli banacibona omuhako gwâbo gw’amîshi gukola buhwa. 21 Emîna yagana, barhanacihashaga okunywa mpu batwe enyôrha, bulya bal’ikola bakagera amîshi babahà ga okunywa. 22 Abâna bâbo balikola ba ntà magala, abâna bâbo barhôrhô na bakâbo balembaguka n’enyôrha, bakahirima omu njira n’omu muhango, bulya ntà misî bacigwêrhe.

23 Okubundi obwo, olubaga loshi lwanaciyisha, lwazunguluka Uziyahu n’abarhambo b’olwo lugo, abâna bagerêrîre, abakazi barhò, banaciyâma n’izù linene, banaciderha, banabwîra abashamuka, mpu: 24 Nnâmahanga yênene atwâge olubanja ekarhî kîrhu na ninyu kuli oku mwarhujirîre ebwa kubà murhabwîraga bene Asûru ebinwa by’omurhûla. 25 Rhwono buno rhurhacigwêrhi burhabâle, Nyamuzinda arhuhânyire omu maboko gâbo, erhi aleka rhufè n’enyôrha nnene, rhunagukumukire ntyo embere zâbo. 26 Mukanyagye mubahamagale buno, olugo muluhâne mpira emw’eyi ngabo ya Holoferno n’emirhwe yâge yoshi. 27 Kwanabà kukulu barhunyagûze, barhuhêke bujà, rhunagend’ilama ahâli h’okubona n’amasù gîrhu abâna bîrhu bafà, bakirhwe bafè n’abâna kuguma. 28 Abahamirizi bîrhu yo mpingu n’igulu, Nyamuzinda wîrhu, Nnâmahanga wa balarha, ye warhuhana erhi byâha bîrhu birhuma n’ebyâha bya balarha lyo alek’ijira kwa bene oku ene la. 29 Boshi caligumiza banayâma, balaka bwenêne emunda Nyakasane Nyamuzinda ali n’izù linene.

30 Uziyahu anacibabwîra, erhi mubè n’obulangâlire bône, mulinde zindi nsiku irhanu: mw’ago mango, Nnâmahanga Nyamuzinda wîrhu arhuyêrekeza obwonjo bwâge, bulya arharhulekerere kuhika ebuzinda. 31 Ezo nsiku zikagera n’oburhabâle burhacirhuyîshira, nanajira nk’oku munadesire. 32 Asengaruka olubaga, alushubiza oku cihando, balanga enkûta, eminâra y’olugo lwâbo, abakazi n’abâna babashubiza omu nyumpa. Boshi bâli bamâtwika enjingo omu lugo.