1 Muli ezo nsiku ogwo mwanzi gwanacihika kuli Yuditi mwâli wa Merari, mwene Nkâfu, mwene Uziyahu mugala wa Yozefu mwene Uzieli, mugala wa Elkia, mugala w’Ananiya mwene Gedeoni, mwene Rafeni, mwene Ashitobu mwene Eliasi mugala wa Helkiya mugala wa Eliabu mwene Natanaeli, mwene Salamieli, mwene Sarasadi, mwene Israheli. 2 Îba Menashè, w’omu bûko bwâge na w’omu mulala gwâge, afaga gala mango barhema engano. 3 Bulya erhi adwîrhe akolêsa abakazâg’ishwêka emifumba y’engano, omw’ishwa, izûba likali lyamukomanga irhwe, ahirima oku ncingo yâge, afîra aha Betuliya cishagala câge; banacimubisha haguma n’ababusi bâge omu ishwa lyàli ekarhî ka Dotayimi na Balamoni. 4 Yuditi ali amayôrha mukana omu mwâge myâka ini na myêzi ini. 5 Arhangira ihêma oku nyanya ly’enyumpa yâge, anaciyambala piri n’eyindi mishangi y’obukana. 6 Akazâg’icîshalisa ngasi mango kuleka omu malâliro ga Sabato, olwa Sabato n’oku malâliro gw’omwêzi muhyâhya, olw’omwêzi muhyâhya, oku nsiku nkulu n’amango bene Israheli bakazâg’icîsîmîsamwo. 7 Ali agwêrhe omuhanda gurhali munyi, naye yêne ali w’iranga linjà bwenêne. Îba Menashè ali amusigire amasholo, ensaranga, abambali, abambalikazi, enkâfu n’amashwa; naye anabilanga bwinjà. 8 Ntâye wankadesire mpu amushobeka kanwa kalebe, bulya arhînyaga Nnâmahanga bwenêne.

9 Anacimanya ebijâci olubaga lwabwîraga omukulu w’ecishagala, obubule bw’amîshi bwamalonz’ibayîrha. Yuditi anacimanya kuguma ebinwa Uziyahu anababwîraga byoshi na kurhi abahigizagya oku ahâna olugo emw’Abanyasiriya enyuma lya nsiku irhanu. 10 Anacirhuma omwambalikazi wakazâg’ilanga ebirugu byâge byoshi, mpu bagend’ihamagala Shabrini na Sharmisi, bashamuka b’e Cishagala.

11 Banacijà aha mwâge, naye anacibabwîra, erhi: «Nyumvi nâni bakulu b’ecishagala ca Betuli. Bulya karhashingânîni akanwa mwaderhaga embere z’olubaga mwa zino nsiku. Mwahânyire eciragâne, mwanajira Nyamuzinda muhamîrizi waco ekarhî kinyu, mwanahizire oku mwahâna ecishagala emw’abashombanyi akabà Nyamuzinda arhamurhumiri oburhabâle muli ezi nsiku. 12 “Mw’oyo muligi bantu baci buno, mwe mwacîshomagya okurhangula Nyamuzinda muli ezi nsiku z’ene, muyimangîre Nyamuzinda ekarhî k’abantu”. 13 “Mwamâhiraga Nyamuzinda-ogala-byoshi omu marhangulo, ntâco mweki mwanaciyumve”. 14 “Erhi aha murhayishi eciri ebulîrî bw’omurhima gw’omuntu murhanayumva bwinjà entanya z’omu bukengêre bwâge, kurhigi mwankamanyirira Nyamuzinda walemaga byoshi, mumanye omuhigo gwâge n’entanya zâge. Nanga, bene wîrhu, arhali ntyo, ciru n’ehitya, murhakunizagya Nnâmahanga Nyamuzinda wîrhu”. 15 “Akabà arhalonzizi okurhurhabâla muli ezo nsiku irhanu, acigwêrhe obuhashe bw’okurhulanga omu zindi nsiku asîmire, okurhumalîra embere z’abashombanyi bîrhu”. 16 “Mw’oyo mumanye murhahânaga eciragâne c’okusêza obulonza bwa Nyakasane Nyamuzinda wîrhu, bulya Nyamuzinda arhali nk’omuntu, yeki bakayêmêza akantu omu kumusêza, nîsi erhi mwene omuntu, oyu bankarhûliriza n’eby’empongano”. 17 “Co cirhumire omu kulinda obuyôkozi bwankarhenga emwâge yêne, rhumuhûne arhurhabâle, anayumvîrhize omusengero gwîrhu nk’oku yênene anasîmire”. 18 “Bulya kurhasâg’iyumvîkana omu mpiriri z’iburha lîrhu buno, ciru na buno ntà bûko, ntà mulala, ntà cihugo, ntà cishagala cidwîrhe caharâmya abazimu bajiragwa n’amaboko g’omuntu nk’oku byàbâga omu nsiku za mîra”. 19 “Okwôla kwo kwakazâg’irhuma ababusi bîrhu balekêrerwa bafè n’engôrho, banyagwe banamalirwe n’abashombanyi”. 20 “Ci konene rhwono rhurhasâg’imanya wundi Nyamuzinda orhali ye yêne; co carhuma rhulangâlire oku arharhushombe rhwono, nîsi erhi obûko bwîrhu”. 21 “Bulya kandi okuhirima kwîrhu kwo na kuhirima kwa Yudeya yêshi, oluhêrero lwîrhu lwanasherêzibwa na ntyo Nyamuzinda anacihôla kuli okwo omu mukò gwa ngasi muguma muli rhwe”. 22 “Okuyîrhwa kwa bene wîrhu, okunyagwa kwa ecihugo, okusherêzibwa kwa akashambala kîrhu, ebyo byoshi Nyamuzinda arhubarhuze byo oku irhwe lîrhu, ciru n’omu mashanja, elya munda rhwankanahêkwa bujà, kandi rhwanabà lwîganyo lubî na masheka g’abarhuhimaga”. 23 “Bulya obujà bwîrhu burhahinduke iragi, ci Nyamuzinda Nnâmahanga ajira bubè buhanya bwîrhu”. 24 “Buno, bene wîrhu, rhuyêrekage abandi bene wîrhu oku obuzîne bwâbo rhwe buyegemîre, oku okulangwa kw’oluhêrero lwîrhu, okw’aka-Nyamuzinda n’okw’oluhêrero rhwe okwo koshi kushegemire”. 25 “Kulusha aho rhukuze Nyakasane Nyamuzinda wîrhu orhuhizire muli gala marhangulo nka kulya anakazâg’ijirira balarha”. 26 “Kengêri amarhangulo Nyamuzinda ajiriraga Abrahamu, amarhangulo ajiriraga Izaki n’okwayishiraga Yakôbo koshi omu Mezopotamiya amango akazâg’iyabula amasò g’ebintu bya Labani, nalume wâge”. 27 “Bulya rhwono arharhujiriraga nka balya arhangulaga n’omuliro erhi bajira omurhima mwinjà, rhwono arhali kurhuhana arhuhanyire, ci kubà kuhanûla kurhuma Nyamuzinda ashûrha abamuyegera.”»

28 Uziyahu anacimubwîra, erhi: «Ebi onadesire byoshi, obidesire n’omurhima gw’okunali na ntâye wankaganya ebinwa byâwe. 29 “Bulya arhali oku lusiku lw’ene lyo obulenga bwâwe omu binwa bubonekîne, ci kurhenga emurhondêro gw’ensiku zâwe, olubaga loshi lwanabwîne obukengêre bwâwe, bulya enkengêro z’omurhima gwâwe zibà nyinjà bwenêne”. 30 “Ci kwône abantu baligwêrhwe bwenêne n’enyôrha! Barhusêza okubajirira ebi rhwabalaganyagya n’okujira endahiro kuli byo”. 31 “Na bunôla orhusengererage bulya ôbà mukazi wa kushenga, na ntyo Nnâmahanga anarhurhumira enkuba yayunjuza emîna rhubikiramwo amîshi, na ntyo rhurhacifè”».

32 Yuditi anacibabwîra, erhi: «Muyumve, najira ecijiro cakakengêrwa n’obûko kujà oku bundi bûko, omu bâna b’ishanja lîrhu. 33 “Mugend’iyimanga aha muhango muli obûla budufu bw’ene; nayîsh’ihuluka nie na mwambalikazi wâni. Na buzinda bwa zirya nsiku mwahigaga mpu zo mwahânamwo ecihugo cîrhu emwa abashombanyi, Nyamuzinda acîyêrekana emwa Israheli n’okuboko kwâni”. 34 “Ci konene mw’oyo murhaderhaga mpu mwalonza okumanya ebijiro byâni, bulya ntababwîra cici embere nkole oku nalonz’ijira”». 35 Uziyahu n’abarhambo banacimubwîra, mpu: «Gendaga n’omurhûla; Nyakasane Nyamuzinda akushôkolere omu kuhana abashombanyi bîrhu.» 36 Erhi barhenga mulya nyumpa, banacijà emwa bâbwè.