2 Nyakasane Nyamuzinda wa larha Simoni, we wahiraga omu maboko gâge engôrho y’okuhana balya bàhamiraga oku mabêre g’omubikira mpu bamushereze, balya babwîkûlaga ecibero câge mpu bamubonese nshonyi, balya bahemulaga enda yâge. Bulya wali odesire erhi okwo kurhakabà kwagal’inabà.

3 Co carhumaga abarhambo bâbo oleka banigûzibwe; kandi wanaleka mpu erya ncingo yâbo yabonaga enshonyi erhi kulya kuhabuka kwâbo kurhuma, mpu yoshi emirîrwe n’omukò. Wahimbaguliza abajà kuguma n’abakulu, n’abakulu kuguma n’abashizi bâbo.

4 Waleka mpu abakazi bâbo banyagwe, mpu abânanyere bâbo bahêkwe bujà, n’ebi babanyagaga wabihà balya bâna osîma mpu babigabane, bo balya bayumvagya omutula gw’obumvu, bo balya bagayaguzagya bwenêne okuhemulwa kw’omukò gwâbo, banakuhamagala mpu obarhabâle. Yâgirwa Nyamuzinda wâni, ontabâle nâni nie mukana.

5 Wêne walemaga ebintu byagezire, ebiri buno n’ebyaciyîsha, we walemaga amango ga buno, amango gaciyisha n’ebi warhanyize binabè.

6 Ebintu wamalalira binayishe biderhe, mpu: «Rhwono orhulolage!» Bulya amâjira gâwe goshi gabà marheganye n’oku orhegeka erhi mîra wanakugererezagya.

7 Obonage kurhi Abanyasîriya balimbira obunji bw’engabo yâbo, badwîrhe bacîkungira enfarasi, n’abazigendakwo bacîkubagire abasirika bâbo bagenda n’amagulu, balangâlire amatumu, empenzi, emiherho na engondôzo zâbo; barhamanyiri oku Nnâmahanga otulutumbya entambala.

8 Nyakasane lyo izîno lyâwe, orhibule emisî yâbo n’obuhashe bwâwe, ohenangule emisî yâbo n’oburhè bwâwe. Bulya balalîre okusherêza oluhêrero lwâwe lw’ecirhînyiro mulyâla Izîno ly’irenge lyâwe lirhamûkira, banahizire okuhongola amahembe g’oluhêrero. 9 Sinza obucibonyi bwâbo; orhibulire oburhè bwâwe oku marhwe gâbo, ohire omu kuboko kwâni niono mukana emisî ndangâlîre.

10 Na ebinwa byâni by’obunywesi, ohirimye omurhumisi n’omukulikire, omukulu ahirime n’omushizi wâge. Orhibule okwo kucîhêka enyanya kwâbo n’amaboko g’omukazi.

11 Bulya emisî yâwe erhabonekera omu bintu mwandu, na okuhumbârhaza byoshi kurhabonekana omu bantu bazibu. Ci we Nyamuzinda w’abîrhôhye, we burhabâle bw’abafunyazîbwe, we mufungizi w’abazamba, we mulanzi w’abalekêrîrwe, we côkola c’abarhacigwêrhi bulangâlire.

12 Nêci! nêci! Waliha Nyamuzinda wa bashakulûza, Nyamuzinda w’akashambala ka bene Israheli, we mwâmi w’empingu n’igulu, we Lulema w’amîshi, mwâmi w’ebiremwa byoshi, oyumvîrhize Waliha omusengero gwâni.

13 Mpà nâni ebinwa by’okushishashisha, lyo ndemaza n’okuhirimya balya bali n’emihigo migalugalu oku ndagâno yâwe, oku nyumpa yâwe ntagatîfu, oku ntondo ya Siyoni, n’abahigire enyumpa abâna bâwe bajira.

14 Ohè olubaga lwâwe loshi ngasi bûko obukengêre bw’okumanya oku wênene we Nyamuzinda, Nyamuzinda nn’emisî yoshi n’oku ntà wundi mufungizi w’obûko bw’Israheli kulusha We.