1 Erhi ebijingo binabà, abambali bakasengaruka dubaduba. Bagoasi anahamika ihêma ly’embuga, anacikumira abalâlîzi boshi omu mwa nnawâbo, boshi bagend’ikacihonda oku ncingo zâbo, bulya bali erhi bagazirwe n’amamvu. 2 Yuditi asigala yêne omu nyumpa na Holoferno. Holoferno erhi amâlanguka oku ncingo ebwa kubà yêshi ali amâzika na idivayi. 3 Yuditi anacibwîra omwambalikazi mpu acîyêgûle n’enyumpa y’okulâla, anamulindire embuga nk’oku anajira ngasi lusiku, bulya ali adesire oku aciyîsh’ihuluka agend’isalîra, kwo anali amarhang’ibwîra Bagoasi.

4 Abantu boshi banacimuleka mulya nyumpa. Ntâye ciru n’omuguma wasigîre muli eyo nyumpa y’okulâla, abè mwâna, abè mukulu. Yuditi anaciyîmanga hôfi n’encingo, anaciderha omu murhima gwâge, erhi: «Nyamuzinda ogala byoshi, yîmangira ebijiro by’amaboko gâni okw’irenge lya Yeruzalemu. 5 Gano go mango g’okurhabâla omwîmo gwâwe n’okuyunjuliza omuhigo gwâni, lyo oshandabanya abashombanyi barhugosire buno».

6 Anaciyegera hôfi n’encingo ebw’irhwe lya Holoferno, amubwîkûla omushangi, 7 anacijà oku ncingo, anacirhuluba emviri z’okw’irhwe lyâge, anaciderha, erhi: «Mpà nâni emisî, Yâgirwa Nyakasane Nyamuzinda w’Israheli mwa gano mango». 8 Anacitwa kabirhi kabirhi n’emisî yâge yoshi omw’igosi lya Holoferno. Anacishayûla irhwe. 9 Anabulungiza omubiri gwâge okw’idaho kurhenga oku ncingo, anacimanyula emishangi yali oku minâra. Kasanzi kasungunu anacihuluka, ahêreza omwambalikazi irhwe lya Holoferno; 10 anacilirhogeza muli erya nshoho y’ebiryo. Oku banali babirhi banacihuluka nk’oku banakomereraga bakola bagend’isalîra. Banacirhenga omu cirâlo, banacizunguluka ecishagala, banacisôkera oku ntondo ya Betuliya, banacihika aha muhango gw’eco cishagala.

11 Yuditi ahamagaza anaciri kulî, erhi: «Muyîgule muyîgule olumvi, Nyakasane ali haguma nîrhu, nêci Nyakasane ali haguma nîrhu omu kurhucinga oku bashombanyi nk’oku anarhujirire ene». 12 Erhi abantu ba muli olwo lugo bayumva izù lyâge, boshi bashagamukira ebwa muhango gw’olugo banahamagala abagula balwo. 13 Banacigend’ihamagala abakulu b’olugo, banaciyisha nabo bali bulibirhà boshi, kurhenga oku murhò kuhika oku muntu mukulu, bulya bali babwîne oku ciri cisômerîne okucîbona agaluka. Banacihamûla olumvi banacimuyankirira banaciyâsa omuliro mpu babamolekere, banacibazunguluka. 14 Yuditi anacibabwîra, erhi: «Mukuze Nyamuzinda, mukuze Nyamuzinda, mumukuze bulya arhacirhenza obwonjo bwâge oku nyumpa y’Israheli, ci anavungunywîre abashombanyi bîrhu muli obu budufu na okuboko kwâni». 15 Anaciyômola irhwe mulya nshoho anaciliyêrekana, anaciderha, erhi: «Loli irhwe lya Holoferno ye murhambo mukulu w’abasirika b’Abanyasîriya, alagi n’emishangi ashuba agwishiremwo erhi ndalwè erhuma; Nyamuzinda anamuhimbagulize n’okuboko kw’omukazi. 16 Aganze Nnâmahanga owandangaga omu njira nanageraga mwoshi, bulya obusù bwâni bwamuhûsize acilêrhera olufù; arhajizire kubî nâni mpu ampemule anansherêze.» 17 Olubaga loshi lwazânwa, lwanaciyunamiriza, lwanaciharâmya Nyamuzinda, lwaderha, erhi: «Oyagirwe Nyamuzinda wîrhu we wafunyaga ene abashombanyi b’olubaga lwâwe».

18 Uziyahu anacibwîra Yuditi, erhi: «Oli mugishe mwâli wâni na Nyamuzinda ôbà enyanya ly’amalunga goshi, kulusha abandi bakazi boshi ba hano igulu. Ayâgirwe Nyamuzinda w’empingu n’igulu owajaga akulangula enjira mpu otwe igosi ly’omukulu w’abashombanyi bîrhu. 19 Bulya obu bwîkubagire bwâwe burharhenge omu mirhima y’abantu bayôrha bacîkubagira ensiku zoshi emisî ya Nyamuzinda. 20 Mâshi kuli okwo Nyamuzinda yêne akuhêke irenge, akuhè iragi libè luhembo lw’oku orhababalire obuzîne bwâwe omu kubona kurhi olubaga lwâwe lwamâjuguma, bulya wabîre murhanzi w’okubona oku rhwagukumuka galya mango wanabâga n’olugendo lwinjà embere za Nyamuzinda wîrhu.» Olubaga loshi lwanacidumiza mpu: «Amen! Amen!»