1 Holoferno anacirhegeka mpu baheke Yuditi halya anabîkira ebirugu byâge binjinjà, anacirhegeka mpu bamuhè oku biryo byâge yênene, banamuhè kuli galya gâge ananywakwo yênene. 2 Yuditi anashuza, erhi: «Ntalya kuli ebyo biryo lyo ndek’isârhaza abandi, ci konene ebiryo byâni byayishire binkulikîre». 3 Holoferno anacimushuza, erhi: «Hano ebiryo byâwe bihwa ngahi rhwashub’irhenza ebiryo bya bene ebyo mpu rhukuhebyo? Bulya emwîrhu erhabà ciru n’omuntu muguma w’omu bûko bwâwe?» 4 Yuditi anacimubwîra, erhi: «Ndahîre okw’izîno lyâwe nnâhamwîrhu, mwambalikazi wâwe arhayûse ebi ndwîrhe embere Nyamuzinda ayûkirize n’okuboko kwâni ebi alaganyagya byoshi». 5 Abâli na Holoferno banacimuhêka omw’ihêma, anacijà îrò kuhika aha karhî k’obudufu, anacisinsimuka oku mucêracêra. 6 Anacirhuma abagend’ibwîra Holoferno, erhi: «Nnâhamwîrhu arhegeke baleke omwambalikazi wâge ahuluke, agend’isalîra», 7 bulya Holoferno ali arhegesire, abakazâg’imulanga mpu barhamuhanzagya. Anacibêra okwo cihando nsiku isharhu. Ngasi budufu akazâg’ijà omu kabanda ka Betuli anacikalaba omwo cihando ahâli iriba ly’amîshi. 8 Na erhi ayinamukaga anayîshe ashenga Nnâmahanga mpu ahêke amâjira gâge bwinjà okw’irenge ly’abâna b’olubaga lwâge. 9 Anashubira mulya ihêma akola acîre yêshi; anabêramwo kuhika amango arhûla ebiryo byâge omu cajingwè.

10 Ka oku lusiku lwa kani Holoferno arhajira idinye oku barhambo bâge bônene, arhalalikaga ciru n’omuguma omu barhumisi bâge. 11 Anacibwîra Bagoasi, ye wali nshâgi y’okulanga ebirugu byâge byoshi, erhi: «Kanya oyêmêze oyu mukazi w’omuyahudi oli emwâwe, ayîshe eno mwîrhu, rhulye rhunanywe rhweshi. 12 Bulya zanabà nshonyi kuli rhwe erhi rhwankalêka mukazi wa bene oyu agenda rhurhanayinjibini. Kandi nka rhurhayîshiri rhwamurhiza anakarhushekera». 13 Bagoasi anarhenga aha mwa Holoferno, ajà omu Yuditi ali, anacimubwîra, erhi: «Oyûla mujanyere mwinjinjà arhayôbohaga okujà emunda nnâhamwîrhu ali, lyo akuzibwa embere zâge, anywe haguma nîrhu idivayi n’obushagaluke bunene, anabè mwa luno lusiku nka munyere muguma wa bene Asûru, ababà omu nyumpa ya Nabukondonozori». 14 Yuditi anashuza, erhi: «Ndigi ndi niono w’okuhakana ebya nnâhamwîrhu? Ehi anabwîne hiri hinjà omu masù gâge, niono nanacihangâna okuhijira bwinjà na ntyo bwanabà busîme bunene kuhika oku lusiku lw’okufà kwâni». 15 Anaciyimuka, anaciyambala omushangi gwâge, ajagalîra n’ebindi birimbîsa omukazi byoshi. Omwambalikazi ayisha amushokolire, anacilambûla embere za Holoferno itapi Bagoasi ali ahîre Yuditi mpu akaz’ilikolêsa ngasi lusiku amango g’okulya. 16 Yuditi anacijà omu nyumpa. Omurhima gwa Holoferno gwadûrha bwenêne. Ayumva akola azigîre loshi okulâla naye. Anakazâg’ilonza amango ga okumushumika kurhenga lulya lusiku anamubonaga. 17 Holoferno nacimubwîra, erhi: «Nywaga mâshi nâwe oshagaluke haguma nîrhu». 18 Yuditi anamushuza, erhi: «Nêci nanywa la, bulya oku lusiku lw’ene nâni namâbona iragi ly’okulama oku ntasâg’ilama bundi omu kalamo kâni kosh». 19 Anaciyanka kuli ebi omwambalikazi amurheganyizagya, ananywera embere zâge. 20 Holoferno yêshi ashagaluka, anywa idivayi linene bwenêne kurhalusa oku arhalisag’inywa kurhenga okuburhwa kwâge.