1 Holoferno anacimubwîra: «erhi ohire omurhima omu nda, wâni mukazi. Ntajirira ndi kubî nka anacîshozire okukolera Nabukondonozori mwâmi w’igulu lyoshi. 2 N’oku biyêrekîre olubaga lwâwe luyûbaka omu ntondo, nka lurhangayaguzagya, ciru ntankalengezize itumu lyâni kuli bo. Ci bônene bacîdwîrhîre okwo. 3 Ci mbwîraga buno carhumire obayâka oyisha oyâkîre eno munda. Bulya mbwîne oku kucîcungula kukudwîrhe. 4 Olangâlîre, walama muli obu budufu bw’ene n’omu zindi nsiku zayisha. Bulya ntâye wakuhumakwo, ci bakujirira bwinjà nk’oku banajirira abarhumisi ba nnawîrhu Nabukondonozori.»

5 Yuditi anacimubwîra, erhi: «Yâgirwa, oyankirire ebinwa bya mwambalikazi wâwe, oyêmêre omujà-kazi wâwe abumbulire akanwa embere zâwe, ntanaderhe ebinwa by’obubêshi embere za Nnawîrhu. 6 “N’erhi wankayumva ebinwa by’omujà-kazi wâwe, Nyamuzinda akola bwinjà haguma nâwe, na Nnâhamwîrhu arhankabona ahimwa ciru n’eriguma omu buzîne bwâge omu mirimo yâge yoshi”. 7 “Nêci alame Nabukondonozori, mwâmi w’igulu lyoshi, gulame omurhwe gwâwe, ye wakurhumaga mpu oyinamule ebizîne byoshi, bulya arhali bantu bône bamukolera erhi we orhuma, ci n’ensimba z’omu lubala, ebintu n’orhunyunyi rhw’omu malunga, bilamira oku misî ya Nabukondonozori n’enyumpa yâge yoshi”. 8 “Rhwamanyire oburhondekezi bwâwe, n’obulenga bw’omurhima gwâwe, banamanyisize igulu lyoshi oku wêne mwinjà omu bwâmi boshi, muntu wa buzibu omu kubà n’obukengêre bunene, na muntu wakurhangâza omu biyêrekîre okulwa”. 9 “N’oku binwa Akioro aderheraga omu ndêko yâwe rhwabimanyire, bulya abantu b’e Betuli bamucizize, anababwîzire ebi akubwîraga byoshi”. 10 “Ci, yâgirwa Nnâhamwîrhu, orhagayaguzagya ebinwa byâge, ci obilange omu murhima gwâwe, bulya biri by’okunali, ebi anakubwîzire byoshi. Bulya olubaga lwîrhu lurhahanwa n’engôrho erhajira buhashe buci kuli lwo nka lurhagomiri Nnâmahanga”. 11 “Na buno, lyo Nnâhamwîrhu arhag’ihimwa, olufù lwabashangula amarhwe. Bulya ecâha cabagazire; eci câha cirhuma bazusa obukunizi bwa Nyamuzinda wâbo ngasi mango bali omu mabî”. 12 “Ebwa kubà barhacigwêrhi mîshi na biryo, barhôzire omuhigo gw’okuyanka ebirhungwa byâbo, ciru banagwêrhe enkengêro z’okulya ebi Nyamuzinda abahanzagya okulya”. 13 “Ebisârûlwa birhangiriza by’engano, entûlo y’idivayi, n’ey’amavurha, ebi bagishaga mpu bibîkirwe abadâhwa*11, 13 Abadâhwa bône bal’iyêmêrîrwe okulya ebi bàgishaga (Rhulole omu Lev 22, 10)., e Yeruzalemu, bakola embere za Nyamuzinda wîrhu, balalîre okubirya. N’obwo biri bintu ciru omuntu w’omu lubaga kône arhankahumakwo n’amaboko gâge”. 14 “Barhumire ciru n’entumwa e Yeruzalemu y’okugend’iderha oku abantu b’eyo munda bajizire ntyo lyo banayisha babagalulire obuhashe bwarhenga omu ihano likulu”. 15 “N’oku byayish’ibà, hano banamanya oku bayêmêrîrwe, bakanarhangira okukolêsa obwo buhashe, boshi banahanwe n’okugukumuka olwo lusiku lônene”. 16 “Niono mwambalikazi wâwe, ebwa kubà mmanyire ebyo byoshi, co cirhumire nyisha ndibirhîre emunda oli ntenga emwâbo. Na Nyamuzinda anantumire mpu nyîsh’ijira hano mwâwe ebijiro byajugumya omw’igulu lyoshi ngasi boshi bankanabiyumva”. 17 “Bulya mwambalikazi wâwe ali mukazi okenga Nnâmahanga w’empingu mûshi na budufu. Na buno, nka nakahash’ibêra hôfi nâwe Yâgirwa, na ngasi budufu mwambalikazi wâwe anazûka ajè ebwa lubanda, agend’ishenga Nyamuzinda w’empingu, anayîsh’imbwîra amango bamâjira eco câha câbo”. 18 “Nanayîsh’ikubwîrakwo, na kandi ago mango wânagenda n’engabo yâwe na ntâye wankahash’ikuhagalika”. 19 “Nayîsh’ikugeza omu Yudeya moshi kuhika embere za Yeruzalemu; n’entebe yâwe nayidêkereza aha kâgarhî. Nâwe wanabahêka nka bibuzi birhagwêrhi mungere, ciru ntà kabwa kankaderha mpu kakumokera. Bulya okwo kwambwîzirwe omu bugeremwa bwâni, kwanamanyîsibwa mpu nyîsh’ikubwîrakwo.”»

20 Ebyo binwa byasîmîsa bwenêne Holoferno n’abàli naye; barhangâla n’obukengêre bw’oyo mukazi, banakâderha, mpu: 21 «Kurhenga aha igulu limerera kuhika aha lihekera, kurhasâg’ibonekana mukazi wa bene oyu oku bwinjà bw’iranga n’oku bukengêre bw’ebinwa byâge. 22 Holoferno anacimubwîra erhi: Nyamuzinda anajizire kwinjà ene akulêrha embere z’olubaga mpu lyo rhubona emisî omu maboko gîrhu na oku abarhugayaguzize babone obuhanya. 23 Ci we oyinjihire okurhalusire n’ebinwa byâwe biri nka buci. Okajira nk’oku wanaderhaga, Nyamuzinda wâwe abà ye Nyamuzinda wâni; nâwe wabona ahantu wakabêra omu bwâmi bwa Nabukondonozori, n’izîno lyâwe lyamanyibwa omw’igulu lyoshi».