1 Hamagazagya kwône! Ndi wakushuza?

Ndi warhûla emirenge omu bimâna?

2 We mbwîzire, omungo gunayîrhe ecihwinja,

n’oburhè buzihôkane omusirhe.

3 Yumvagya: niono nabwîne idâga lyayûbaka lyanagandâza,

ci kano kânya, erya nyumpa erhimangag’ihehêrerwa.

4 Abâna bâge barhajira cifungira,

banabayagîrize aha kagombe barhakanabona calîkûza.

5 Bakola bahingira abashalye bagera,

bulya ehi bankalîre, Nyamuzinda anabakûlehyo ekanwa,

n’enkonola-masù zirhaciziga bahunga.

6 Nanga nkulahirîre, obuhanya burhapamuka omu idaho,

n’omungo gurhamera omu ishwa.

7 Omuntu yêne olêrha obubî n’omutula,

kula nyakadekere alongereza ecirêre c’emalunga.

8 Ci niehe Nyamuzinda ye nayâkira ho,

mmurhûle olubanja lwâni.

9 Kuhuma ahuma na gombi,

ajira omwandu gw’ebirhankamanywa,

ebirhangâzo by’obulenga bwâge birhankaganjwa.

10 Ye dubulira enkuba oku idaho,

arhume amîshi gahulula omu ishwa.

11 Akalonza okuzûsa omunyi,

okuhisa abarhindibuzibwe oku bucire.

12 Anayeshûle abengûza,

n’emilâli yâbo y’okulyâlyanya ayitamalekwo.

13 Abarhimanya anabagwârhe omu murhego gw’amenge gâbo,

atulutûmbye n’abahanûzi bw’okuhanika.

14 Mûshi kalengerêre; babone ekola ndunduli,

izûba liyimanga batûnduze nk’omu budufu.

15 Anayokole omuzamba walenganyire omu kanwa kâbo,

n’omukenyi amukûle omu nfune za ciri-misî.

16 Ntyo, owahanyagire anashubiyumva alangâlîre,

n’obulya-nsoro buhumbârhale.

17 Nêci, iragi lyâge omuntu Nyamuzinda ahanûla!

Nâwe orhagayaguzagya obuhanûzi bw’Ogala-byoshi.

18 Ye oyagaza omuntu abul’imubuka ecibànde,

ye obabaza anabul’ifumya n’okuboko kwâge.

19 Kali ndarhu akulikûza omu mababale,

n’obwa kali nda, amabî garhacikuhikekwo.

20 Omu cizombo anakufumye olufù,

n’omu ntambala akulîkûze oku bwôji bw’engôrho.

21 N’obwôji bw’olulimi burhakujire kurhi,

wabà muzira-bôba amango omuhaguzi amâyisha.

22 Ecânda n’olubula wabihà ebinioko,

orhanayôbohe ebiryanyi by’en’igulu.

23 Wanywâna n’amabuye g’omu ishwa,

oyinjibane n’eby’erubala biyôna.

24 Wabugâna ecihando câwe cidekerîre,

n’obusò bwâwe, washânga burhahazirimwo

amango wayîsh’iburhandûla,

25 Wabona oku obôloloke bwâwe bwajakwo obundi,

n’abâna bâwe bajinirîre nka byâsi by’omu ishwa.

26 Wânâje omu nshinda erhi okola mukulu,

nka kula bagumânya olurhyâzo embere ly’akasanzi.

27 Ebyo byoshi wabibwîne! Ko binali ntyo!

Nâwe obiyumvagye bwinjà onabikûlemwo obwâwe bunguke.