1 Ayubu acîhira eluhya aderha, erhi: 2 Acibâga amababale gâni gankagerwa, owalerhaga olugero bankahirakwo amalumwa gâni goshi haguma! 3 Go gankazidoha kulusha omushenyi gw’omu nyanja: co cinarhumire ebinwa byâni bidwîrhe byâhahabuka. 4 Emyampi y’Ogala-byoshi yantulungwîre, yanshâyiremwo, omûka gwâni gudwîrhe gwayubûla obôge bwâyo, n’ebishûgi bya Nyamuzinda nie birhèzire. 5 K’endogomi yakera enamologere ahâli akahasi, erhi enkâfu eyanânge enadwîrhe yakera? 6 K’ebiryo birhabaya izù, byankanalîbwa buzira munyu, k’olwêru lw’iji lurhayôrha nka bidaka ekanwa? 7 Omu bulwâla bwâni, ebiryo by’omulwâla ciru birhandigi oku murhima. 8 Owabonaga oku mpûnyire kubà, na Nyamuzinda anjirire oku ndangâlîre! 9 Yênene ayêmêrage ampinage, azâbûle okuboko kwâge ankuleho! 10 Ciru obwo bwanacibà burhulirize bwâni, nsigalane bishingo bitya muli aga malibuko gâni goshi, mbone ntalabiraga ebinwa by’Omwimâna. 11 Ka ncigwêrhage emisî y’okulinda? Nie muntu nyandikirwe olufù bene olu, bici nacilinga? 12 K’obuzibu bwâni buligi bw’ibâle, n’omubiri gwâni ka ko guligi nka cûma? 13 Ntacigwêrhi burhabâle buci, Ka mîra oburhabâle burhanyâkaga? 14 Okurhabêra omwîra obwonjo, kuli kulahira bwarhînya Ogala-byoshi. 15 Ninyu bene wîrhu ko mwabîre bakarhema-njingo nka mugezi, nka kula omugezi gwanyamûka gugera. 16 Gunayishe gwashalagaza erhi na byâsi biguluzize. 17 Ci erhi omwikalà guyisha, ezâli nyîshi zinagane, zihirigirhe erhi izûba lirhuma 18 Emizinzi y’ababalama erhengâge omu njira mpu yashimba amîshi, ezimêre omu irungu, elinde ehereramwo. 19 Emizinzi y’e Tema ekazizikonolera amasù, n’emirhwe y’e Saba ezilangâlire. 20 Obwikubagire bwâbo kuyishibà kurhebwa; erhi bazihika-ho balole omu ndalo za bene. 21 Kuli nie, ko muli nk’ezo nyîshi mwa kano kasanzi, ene mumbona mwafuduka mwayumva enshonyi. 22 Ka namubwîzire, nti: «Mpî nâni kantu kalebe? Nti mukûle kalugu kalebe oku binyu mukâmpereze? 23 Nti mundikûze omu maboko gw’omubisha, nti ntênzi omu nfune z’omwanzi?» 24 Nyigîrizagyi, nâni nahulika, Nyêrekagi ngahi nahabire. 25 Okuyumvîrhiza enshambâlo eshingânîne kurhagwêrhi mbaka, Ci eyo mirôngwè yinyu kuli kuderha kurhi? 26 Ka binwa byâni mwagayaguza? Ebi bya nyakubula-bulangâlire biyehûkanwe n’empûsi? 27 Murhakashuka bwayêsha enfûzi cigole, Murhakashuka mwaguza omwîra winyu! 28 Ci mâshi yâga ndoliko! Mundole ebusù, ntabesha. 29 Shubîriri, mucij’emurhima buzira bulyâlya, mushube emirhima murhandenganye. 30 Ka hali bulyâlya bundi oku lulimi? Ka ntankayumviza ekanwa ehiri higalu-galu?