1 K’akalamo k’omuntu hano igulu garhabà matabâro bulà? K’ensiku zâge arhali kwo ziyôrha nka murhabâzi mulimya? 2 Kulîra omujà acîfinja ahâli ecîhôho kulîra omulimyà alingùza oluhembo lwâge, 3 Kwo nâni nahîrwe emyêzi erhali mwo bunguke buci, n’amadufu g’amalibuko. 4 Erhi najigwîshira, oli: «Owabonaga buca!» Oku nanazûka ntya, oli: «Owabonaga buyira!» n’omurhima gurhandêkerera kuhika buyîre. 5 Omubiri gunyunjwire mivunyu n’ebishisha, guyunjwîre migâku, gwanarhonya masira. 6 Ensiku zâni zo mbidu kulusha entôzo, zànahirigisire buzira kucinnangaliza kantu. 7 Kengèra oku obuzîne bwâni guncili mûka gwône, oku, amasù gâni garhankacigaluka mpu gabone ebinja. 8 Cazînda ntâye wacinshîsha omu libona, amasù gâwe gànanyerekere ntanacihali. 9 Kulîra ecitù cinyamûka cinahirigirhe, ko n’owajîre ekuzimu arhayirhenga. 10 Arhagaluka mpu ashubire omu mwâge, n’aha mwâge harhacimuyishi. 11 Co cirhumire ntakabula bwaderha, naganîra omu mungo gw’omûka gwâni, nnanshambâle omu burhè bw’omurhima gwâni. 12 Ka ndigi nyânja nieki, erhi nîsi ciryanyi c’omu nyânja, mpu bampirekwo abalanzi? 13 Erhi najiderha nti nahûmûkira aha ncingo, nti encingo yâni yabà nka yanyîhiza eminiho, 14 Onanfuduse n’ehilôrho, onkânge n’ebi odwîrhe wanyêreka. 15 Owangolola akampubya, ko kukulu: olufù lwo lukulu kuli aga malibuko! 16 Nashangusire, ntayôrhe mpabà ensiku zoshi; ocinyîrekerage ensiku zâni guli mûka gwonene! 17 Omuntu aligi cici mpu wamushîbirira ntyo, mpu wamuyibuka onamuhirekwo omurhima, 18 Aligi cici mpu wamurhandûla ngasi sêzi mpu wamuhengûza ngasi kasanzi 19 K’orhankalesirage okundolêreza, ciru nâni ntwîre amarhî. 20 Akabâga câha najizire kurhi nakujizire w’oyo, w’ejà abantu bulâbi? Càrhumire wantindibuza ntyâla n’empìmbo zâwe, ciru mbone nkola nkuzidohîre? 21 K’orhankalembera okwo nakugayisize, k’orhankabwikira obwo bubî bwâni? Bulya kandi kasanzi kasungunu erhi nkola ngwîshîre omu katulo, wacinnonza obugane ntacihabà!