1 Eliyashibu, mudâhwa mukulu, na bene wâbo banacirhondêra okuyûbaka omuhango gw’Ebibuzi, bagugishîsa banahirakwo enyumvi; bashakâla ecôgo, banacirherekêra kuhika aha munâra gwa Meya, na kuhika aha munâra gwa Hananeli, 2 Aha burhambi bwâbo abakazâg’iyûbakaho bali bene Yeriko, n’aha burhambi bwâbo ali Zakuru, mugala wa Imri. 3 Bene Senaya bayûbaka omuhango gw’Enfî, bahirakwo emitungo n’enyumvi, orhukomyo n’emirhamba. 4 Aha burhambi bwâbo abayûbakaga ho bali bene Meremoti mugala wa Uriya ya Hakosi; n’owakazâg’ilungûla aha burhambi ali Meshulami mugala wa Berekiya ya Meshezabeli; n’aha burhambi bwâbo hashakûlulwa na Sadoki mugala wa Bânâ. 5 Aha burhambi hashakûlulwa n’abantu b’e Tekowa, cikwône abarhambo*3, 5 Abarhambo bâbo bo baligi: Nehemiya n’abâbo. bâbo balahira okujà kuli ogwo mukolo gwa Nnawâbo. 6 Yoyada mugala wa Paseya, na Meshulami mugala wa Besodiya bashakûlula omuhango gwa Mîra, bahirakwo emitungo, bagwîkakwo enyumvi, orhukomyo n’emirhamba. 7 Aha burhambi hashakûlulwa na Melatiya w’Omugabaoniti, Yadoni, munya-Meremoti, n’abantu b’e Gabaoni n’ab’e Mispa, hôfi n’ak’emmanja k’omurhambo, ishiriza ly’olwîshi. 8 Aha burhambi bwâbo, Uziyeli ahashakûlula, ye mugala wa Haraya, mutuzi wa rhulugu; n’aha burhambi bwâge, ashakûlula ho Hananiya, w’omu murhwe gw’abajà abayenga obukù. Baleka Yeruzalemu kuhika aha lukûta lunene. 9 Aha burhambi bwâbo, ashakûlula ho Rafaya, mugala wa Huri, murhambo w’ecigabi ca kabiri ca Yeruzalemu. 10 Aha burhambi, hôfi n’enyumpa yâge, atungûla ho Yedaya, mugala wa Harumafu; aha burhambi, ashakûlula ho Hatushi, mugala wa Hashabanya. 11 Malkiya, mugala wa Harimi; Hashubu, mugala wa Pahati-Mowabu, bashakûlula ecihimbi ca kabiri n’omunâra gw’Amatanûru. 12 Aha burhambi, ashakûlula ho Shalumu, mugala wa Haloheshi, bo n’abâna bâge; àli murhambo w’ecindi cigabi ca kabiri c’ecihugo ca Yeruzalemu. 13 Hanuni n’abayûbakaga e Zonowa, bashakûlula omuhango gw’e Kabanda, baguyûbaka banahirakwo enyumvi, orhukomyo n’emirhamba; bashub’iyûbaka makoro cihumbi kw’olwo lukûta kuhika aha muhango gw’aha Camvu. 14 Malkiya, mugala wa Rekabu, murhambo w’ecihugo ca Bet-Hakaremi, ashakûlula omuhango gw’aha Camvu; aguyûbaka anahirakwo enyumvi, orhukomyo n’emirhamba.

15 Shalunu, mugala wa Kalohoze, murhambo w’ecihugo ca Mispa, ashakûlula omuhango gw’Iriba, agubwîkira, ahirakwo enyumvi, orhukomyo n’emirirango. Ashub’iyûbaka olukûta lw’iriba lya Silowè, hôfi n’obusâni bwa mwâmi, kuhika oku mashonezo gayandagalire ebwa lugo lwa Daudi. 16 E nyuma lyâge, Nehemiya mugala wa Azibuku, murhambo wa luhande luguma lw’ecihugo ca Bet-Shuri, ashakûlula kuhika ah’ishiriza ly’enshinda ya Daudi, kuhika oku iriba bayûbakaga, na kuhika oku nyumpa y’Entwâli. 17 Aha burhambi bwâge bashakûlulaho Abaleviti erhi bayimangîrwe na Rehumu mugala wa Bâni. 18 Aha burhambi bwâge, ashakûlulaho, ahâli h’ecihugo câge, Hashabya, murhambo w’oluhande lw’ecihugo ca Keyila. 19 Aha burhambi bwâge, Ezeri, mugala wa Yeshuwa, murhambo w’e Mispa, ashakûlula ecindi cihimbi c’olukûta càli aha ishiriza ly’enyumpa y’okubikira eby’okulwa aha mongobana. 20 Enyuma zâge, naye Baruki, mugala wa Zabayi, ashakûlula ecindi cihimbi n’obushiru bunene kurhenga oku mongobana kuhika oku muhango gw’enyumpa ya Eliashibi, mudâhwa mukulu. 21 Aha burhambi bwâge, ashakûlulaho Meremoti, mugala wa Uriya, mugala wa Hakosi, kurhenga oku nyumpa ya Eliashibi kuhika oku buzinda bw’eyo nyumpa ya Elyashibi. 22 Aha burhambi bwâge bashakûlulaho abadâhwa, bantu b’omu kabanda ka Yordani. 23 Aha burhambi bwâbo, Benyamini na Hashubu bashakûlula ah’ishiriza ly’enyumpa yâbo. Aha burhambi bwâbo Azariya, mugala wa Maseya mugala wa Ananiya, ashakûlula aha nyumpa yâge. 24 Enyuma zâge, Binuyi, mugala wa Henadadi, a shakûlula olundi luhande kurhenga oku nyumpa ya Azariya, kujà ebwa mongobana kuhika oku kafende. 25 Pelala mugala wa Uzayi, ashakûlula aha i shiriza ly’omongobana n’omunâra gushoshosire embere ly’enyumpa ya mwâmi eri enyanya ly’engo y’empamikwa. Aha burhambi bwâge, ashakûlulaho Pedaya, mugala wa Pareyashi. 26 Abanya-Tineni basigala kulî kuhika aha ishiriza ly’omuhango gw’Amîshi olunda lw’ebushoshôkero bw’izûba n’ebwa gulya munâra gwàli guyômosire. 27 Abanya-Tekowa nabo bashakûlula olundi lunda lw’ogwo munâra gwàli guyômosire na kuhika oku lukûta lwa Ofeli. 28 Enyuma ly’olumvi lw’Ebiterusi, abadâhwa bayish’ishakûlula, ngasi mu guma embere ly’enyumpa yâge. 29 Aha burhambi bwâbo, Sadoki, mugala wa lmeri, ashakûlula aha mbêre ly’enyumpa yâge. Aha burhambi bwâge, a shakûlulaho Shemaya, mugala wa Shekanya, mulanzi w’omuhango gw’ebuzûka-zûba bw’aka-Nyamuzinda. 30 Aha burhambi bwâge ashakûlulaho, Hananya, mugala wa Shelemya bona Hanuni, ye wali mwâna wa kali-ndarhu muli bene Salafu, banacishakûlula ecihimbi c’olukûta. Aha burhambi bwâbo, ashakûlulaho Meshulamu, mugala wa Berekya, aha mbêre z’enyumpa yâge. 31 Aha burhambi bwâge ashakûlulaho Malkiya, muguma omu batuzi b’o rhulugu, kuhika aha mwa bene Natineni n’abarhunzi, embere z’okuhika aha muhango gwa Mifkadi na kuhika oku nyumpa y’enyanya yali aha kafende. 32 N’ekarhî k’enyumpa y’enyanya n’ebwa muhango gw’Ebibuzi, bashakûlulayo abatuzi b’orhulugu n’abarhimbûzi.

33 Erhi Sanbalati amanya oku rhukola rhudwîrhe rhwayûbaka olugurhu, abà burhè, omutula gwamugwârha bwenêne. Agayaguza bene Israheli. 34 Anaciderha embere za bene wâbo, embere z’engabo yâge y’e Samâriya, erhi: «Bici ebyo ezo ntindi z’Abayahudi zidwîrhe zajira? Ka mwanabalekaga bayûbaka obwo? Ka banayishig’ihâna enterekêro obwo? Ka banayishig’iyunjuza lusiku luguma? Ka banahash’ibishûla amabuye g’omutulo omu nsinga y’obwîhirà?» 35 Tobiya wamuli aha burhambi, ali muntu w’e Amoni anaciderha, erhi: «Cikwône mâshi ebyo bayûbaka, nyambwe asôke, ahongole olwo lugurhu lw’amabuye». 36 Oyumve mâshi Nyamuzinda wîrhu, bulya rhukola masheka ga bandi, obahonyezekwo ebyo bijâci byâbo oku irhwe lyâbo, obajire munyago omu cihugo balulizibwe. 37 Orhababaliraga, orhanakûlaga obubî bwâbo embere zâwe, bulya bagayaguzize Nyamuzinda embere z’abadwîrhe bayûbaka. 38 Rhwanaciyûshûla okuyûbaka olugurhu lwîrhu, na olugurhu lwîrhu lwanacihumana lwoshi kuhika omu karhî kâlwo, bulya olubaga lwàli lujizire ogwo mukolo n’omurhima gwoshi.