1 Erhi Sanbalati, Tobiya, Abaharâbu, Abanya-Moniti n’Abashibiditi bayumva oku rhusêzize okushashula ebyôgo bya Yeruzalemu n’oku emirhule yoshi ekola hôfi efukâle, bakunira bwenêne. 2 Balâlira boshi okurhabâlira Yeruzalemu mpu batulemwo itumbà, n’okumubonêsa za mèmè.

3 Rhwashenga Nyamuzinda wîrhu, rhwanajira abalanzi b’obudufu na mûshi lyo rhuhash’icilanga kuli bo. 4 Ci Yûda*4, 4 Yûda, ntyo kwo bakâg’iderha Abayahudi bal’isigîre omu cihugo câbo erhi abandi babà bamalulizibwa e Babeli. Barhal’igwêrhe obulonza bw’okuyûbaka ecôgo cihyâhya ca Yeruzalemu. anaciderha, erhi: «Obushiru bw’abûbasi bukola bwajà bwanyiha n’enundo y’ebijonjolekeza yamaluga, hali amango rhurhankacihasha okuyûbaka olu lugurhu». 5 Nabo abashombanyi bîrhu bakâderha oku lwâbo, mpu: «Barhamanye, barhanabone kuhika rhubarhinde kwo; rhwabayîrha boshi na ntyo rhucike ogwo mukolo gurhag’ijirwa». 6 Amango Abayahudi bayûbakaga emwâbo bayishaga, barhurhonda kali ikumi ahantu abo banzi bayishe bakola bal’irhurhêra. 7 Okubundi obwo nanacihira olubaga mw’aho hantu enyuma ly’olukûta, halya harhankaboneka, najà nabahira ngasi mulala hâgo, n’engôrho zâbo, n’amatumu gâbo, n’emiherho yâbo. 8 Erhi mbà namalola bwinjà, nagend’ibwîra abarhambo, abatwî b’emmanja, abasigalaga omu lubaga, nti: «Murhayôbohaga! Kengêri Nyamubâho, ye mu kulu ye na w’okurhînywa, munalwîre bene winyu, mulwîre bagala na bali binyu, mulwîre bakinywi n’enyumpa zinyu». 9 Erhi abashombanyi bîrhu bayumva oku rhukola rhumanyire omulâli gwâbo n’oku Nyamuzinda anatwîre omu muhigo gwâbo, bagaluka enyuma, rhweshi rhwacîshubirira oku mikolo yîrhu, ngasi muguma aha anakazâg’ikola.

10 Ci kurhenga ago mango, bantu bâni, ecihimbi c’abantu bâni cakayûbaka erhi n’ecindi cihimbi cifumbasire amatumu, empenzi. emiherho n’emishâbîro. Abarhambo banabêra enyuma ly’olubaga lwa bene Yûda. 11 Muli balya bakâg’iyûbaka olugurhu, abakazâg’ishonera enyanya, oku babarhwîre emizigo, oku badwîrhe bayûbaka na kuboko kuguma, n’okundi kufumbasire itumu. 12 Abandi bakazâg’iyûbaka erhi na ngasi muguma ankenyîre engôrho yâge ecibunu. Owakazâg’ibûha omushekera erhi anali aha burhambi bwâni. 13 Nanacibwîra abarhambo, abatwî b’emmanja n’abâli basigîre omu lubaga, nti: «Omukolo gwaluga gwamanagaliha; rhweshi rhwashandabanyire oku lugurhu, rhuli kulî ngasi baguma n’abâbo. 14 “Aha mwankanayumva babûhira omushekera, munayishe mweshi aha burhambi bwîrhu, Nyamuzinda wîrhu arhulwîra”. 15 “Oku rhwakazâg’iyûbaka, ecihimbi canarhôla amatumu kurhenga bucânûla kuhika enyenyêzi”. 16 “Ago mango nashub’ibwîra olubaga, nti: Ngasi muguma na mwambali wâge ageze obudufu aha Yeruzalemu, akârhulanga budufu na mûshi okukola”. 17 “Cikwône, oli nie, oli bene wîrhu, oli olubaga; n’abantu bali nâni, ntà mango rhwarhenzire omu myambalo yîrhu. Ngasi muguma ali agwêrhe ecôji ekulyo kwâge”».