3
Ogwêrhe oburhirnanya erhi anagwêrhe ec’agwêrhe
1 Mwâna wâni, ebinwa nkubwîzire obibîkire emurhima, N’amarhegeko nkuhîre, ogasêze, ogahire emurhima
2 Bulyâla nsiku byakuyûshûlira, n’emyâka y’akalamo n’omurhûla.
3 Obukûnda-Lulema n’obudahemuka birhakujâga kulî! obiyambalire omu igosi, obiyandikire oku lwâsi lw’omurhima gwâwe.
4 Wâbona oku warhona onabè n’obuhashe omu masù ga Nyamuzinda n’ag’abantu.
5 Oyêgemere Nyamuzinda n’omurhima gwâwe gwoshi, orhanahîraga okayêgemera obwenge bwâwe wênene.
6 Omu mirimo yâwe yoshi orhahîraga okamuhaba, Wâbona oku ayumanyanya enjira zâwe.
7 Orhacîkebagwa mpu okola oli murhimanya: okazirhînya Nyakasane onayâke amabî;
8 Okwôla kwaciza omubiri gwâwe, kunabombêze orhuvuha rhwâwe.
9 Okazikenga Nyakasane omu kumurhûla ebi ogwêrhe, haguma n’ebirhanzi-rhanzi by’omu misî yâwe*3, 9 Omwâka muhyâhya, omwâna wa burhanzi, enterekwa y’omuntu, lyàli irhegeko okurhûla Nyakasane omwâka muhyâhya omu kushénga omushigo n’okuvuga omûnkwa (sinza Mib 18, 12-13; Lush 14, 28-29).;
10 Ago mango enguli zâwe zanayunjula ngano, n’emikenzi yâwe yanayunjulirana irivayi lihyâhya.
11 Mwâna wâni, orhakengulaga obuhane bwa Nyakasane, Orhanayumvagya kubî okakalihirwa
12 Bulya Nyakasane kwo akalihira oyu asîma, nka kula omulume akalihira omugala arhonya. Iragi ly’omurhimanya
13 Ali muntu muny’iragi obona âhika oku burhimanya, omuntu obona ahika oku makengu.
14 Bulya aha omuntu ankabona amagerha, ankabona oburhimanya: Obugwêrhe ye yunguka kulusha ogwêrhe amasholo.
15 Bulushire amagerha citwìro; mw’ebi omuntu acîfinja byoshi ntà kantu kabuhisirekwo.
16 Bufumbasire omu kulyo, omwandu gw’ensiku, n’omu kulembe obuhirhi bw’irenge!
17 Enjira bugera mwo ziri njira za masîma, n’emikâba bugeza mw’omuntu, ebwa murhûla†3, 17 Omurhûla cirhali cidêkêrera kwônene c’okubà ntà mbaka zihali ci kuli kuhashirya bwinjà ehyâwe buzira bihamba bici, go mango baderha eno mwîrhu, mpu: arhaganya buligo arhanabulânga (sinza Mig 8, 18) n’omu Ndagâno Mpyâhya, omurhûla bubà. bwinjà buli endalâla omu murhima gw’omuntu, ngalo ya Mûka Mwimâna. ehêka.
18 Bubà murhi gwa kalamo oku muntu obufumbasire; n’obugwêrhe anashube muntu obêrîrwe.
19 Nyakasane bushinganyanya àlemagamwo igulu, àyimânika amalunga n’obukengêre.
20 Emisima bumanye bwâge bwayihûmbaga, n’olumè bitù bikazilurhoza.
21 Mwâna wâni, ebi byombi obisêzekwo amasù: obîke ihano, olange n’obwîrhonzi;
22 Byo byabâ buzîne bw’omurhima gwâwe, bunabè bulimbi bw’igosi lyâwe.
23 Ago mango wanashûrha enjira yâwe buzira bwôba n’okugulu kwâwe kurhasârhalè.
24 Aha kugwîshira orhâyumve côbà, n’amango okola ogwîshîre, irô lyâwe lyâbà linunu.
25 Orhàyôbohe cikango, orhâyôbohè kurherwa n’abaminya.
26 Bulya Nyakasane abâ burhwâli bwâwe, acinga okugulu kwâwe oku mirhego.
27 Orhalahiraga ecijiro cinjà oku muntu ocikwânîne, nk’ogwêrhe obuhashe bw’okucîjira.
28 Orhahîraga okabwîra omulungu, mpu: «genda, ogere lundi lusiku», erhi, mpu: «irhondo nâkuhâ», n’obwo kalya kântu kali omu nfune zâwe.
29 Orhahîraga okasîngira omulungu obulyâlya, n’obwo yêhe acîkwîkubagîre.
30 Orhagwârhiraga omuntu oku lûnu wamulôngôza, na ntà kubî akujirîre,
31 Orhayâgalagwa n’omuntu w’embaka, orhanahîraga okacîshoga enjira zâge.
32 Bulyâla abahalanjisi Nyakasane arhababâkwo, abantu nkana bwo arhonya.
33 Enyumpa y’omumînya ebà ehehêrîrwe na Nyakasane, enyumpa y’abashinganyanya yôhe ebà ngishe.
34 Ayishishekera ba-cinya-masheka, ci abagûnda kurhona bârhona emwâge.
35 Irenge gwo mwanya gw’abarhimanya, ebingolo-ngolo byôhe okukobwa ko kâbo kashambala.
*3:9 3, 9 Omwâka muhyâhya, omwâna wa burhanzi, enterekwa y’omuntu, lyàli irhegeko okurhûla Nyakasane omwâka muhyâhya omu kushénga omushigo n’okuvuga omûnkwa (sinza Mib 18, 12-13; Lush 14, 28-29).
†3:17 3, 17 Omurhûla cirhali cidêkêrera kwônene c’okubà ntà mbaka zihali ci kuli kuhashirya bwinjà ehyâwe buzira bihamba bici, go mango baderha eno mwîrhu, mpu: arhaganya buligo arhanabulânga (sinza Mig 8, 18) n’omu Ndagâno Mpyâhya, omurhûla bubà. bwinjà buli endalâla omu murhima gw’omuntu, ngalo ya Mûka Mwimâna.