4
Okucîshoga oburhimanya
1 Bâna bâni, yumvi enyigîrizo za sho, murhege okurhwiri lyo mumanya obwenge.
2 bulya nyigîrizo nyinjà namuhà: murharhibaga akanwa kâni.
3 Nali muburhe: mugala wa lârhâ! nali mwinjà na murhonyi omu masù ga nyâmâ.
4 Nabwîne Lârha akazimbwîra, erhi: Omurhima gwâwe gusêze ebinwa byâni, osêze amarhegeko gâni wâlama.
5 Oyanke oburhimanya, oyanke obwenge, orhayîbagiraga, orhacîhambûlaga oku mahano gâni.
6 Orhabusigaga nyuma, bwâkulanga, oburhonye bwakubîka.
7 Omurhondêro gw’oburhimanya; kuyanka oburhimanya kuguza ebi ogwêrhe byoshi obone amakengu*4, 7 Nka kulîra omurhondêro gw’okuyôga kuli kujà omu mîshi ly’omuntu amanyiyôga, n’okwo kujà omu mîshi kuligi kurhenga eburhambi bwâgo..
8 Obushamâmbire, bwakuhira enyanya, bwâshuba irenge lyâwe okubuhôbera,
9 Oku irhwe lwâwe bwâdêkerezakwo ecimanè cikukwânîne bwâkuhêreza ecimanè c’irenge†4, 9 Binwa îshe àkazagimubwîriza..
Okucîlanga oku bantu babî
10 Yumva mwâna wâni, yumva ebinwa nâkubwîra; wâbona oku emyâka y’akalamo kâwe yâluga
11 Njira ya burhimanya nkuyeresire, omu njira nnungêdu nkugezize.
12 Omu kulambagira amagulu gâwe ntâco câgahanza, ciru wankakûla omulindi, orhâsarhalè.
13 Ogwârhe enyigîrizo orhazirhibaga, ozilange, ko kalamo kâwe.
14 Orhageraga omu njira z’abaminya, orhayishaga omu njira z’abantu babî.
15 Okaziziyâka orhazigeragamwo, onagere kuli orhaluke.
16 Bulya barhajà irô barhanajikola amaligo, barhabona irô nka barhacijira enkumba;
17 na bulya mugati gwa bumînya balya, n’irivayi banywa lya buhagwè.
18 Enjira y’abashinganyanya kw’eri nka bucè bwa lubûngu-bûngu, bwo buyisha bwakula kalinde kabà kasirahinga.
19 Enjira y’abaminya kwo eyôrha nka mwizimya, Abarhamanya bici bibasârhazize.
Okucîrhega-rhega
20 Mwâna wâni yùmva bwinjà ebinwa byâni, emyanzi nâkubwîra oyirhege okurhwiri.
21 Erhafulumukaga isù lyâwe, oyibikire oku nyômvu y’omurhima.
22 Kulya kubà kali kalamo oku muntu wamâyihikakwo, ganali magala oku mubiri gwoshi.
23 Olange omurhima gwâwe, kulusha ebindi byoshi, gwo gubà nshôko y’obuzîne.
24 Akanwa kaderha ehigalu-galu okacîke karhakulirânaga, n’omunwa gubêsha, gurhakugeragaho.
25 Amasù gâwe gakazilola embere, n’obusù bwâwe bukaziyêrekera embere zâwe.
26 Okaziyumanyanya emikâba wagera-mwo, n’enjira zâwe zoshi zikazibà zikomîre.
27 Orhadungiraga ekumosho erhi ekulyo, okugulu kwaze okuyâse obubî.