7
Omukazi mugenzi arhankacîshingikwa
1 Mwâna wâni olange bwinjà ebinwa nkubwîzire obîkirire amarhegeko nkuhîre.
2 Olange amarhegeko gâni gakuciza, amahano gâni gabè nka mbonyi y’amasù gâwe.
3 Amahano ogashwêkere oku minwe yâwe, ogayandike oku lwâsi lw’omurhima gwâwe.
4 Obwîre oburhimanya erhi: we mwâli wîrhu n’obwenge obubwîre, erhi: we mwîra wâni
5 Lyo bakucînga oku mukazi mugenzi, oku mukazi w’ebinwa by’olubohôlolo.
6 Aha idirisha ly’enyumpa yâge ayêgemera, akazilola omu ngo y’emuhanda.
7 mpu ahâli ankabona omu bâna bahunyi omurhabana (mwinjà) muhwinja.
8 Lêro muguma anacigera omu muhanda, aha irhwêrhwè lyâgo, hôfi n’enjira y’enyumpa ya nyamukazi
9 bwamânajinga omwizimya gûkola guli, obudufu bwacîbulwîre n’ehizimya erhi ho ndi aho.
10 Nyamukazi kwo kujà emunda nyamwâna ali, nyamukazi ayambîrhâge nka mbaraga, anacibwikîre obusù n’omushângi.
11 Oku arhahusa buderha, kwo arhânadêkerera haguma; amagulo gâge garhabêra omu nyumpa.
12 Nk’arhali omu mihanda erhi mwo ali omu ngo z’emuhânda, erhi arhegîre ah’irhwêrhwè ly’omuhanda.
13 Nyamukazi kwo kugwârha olya mwâna, amuhôbera, àmubwîra buzira nshonyi:
14 Erhi «nali wa kurherekêra enterekêro ya nyabuholwe
*, ene lyo nanashalaga ecihango.
15 Bwo bulà nyishire emunda oli, nti nyishikulônza namânakushingâna!
16 Ecibwârhalo câni nacibûmbire bibwîkwa, nalambûlirakwo amalikâni g’e Mîsiri
17 Encingo yâni nayishahulîzekwo amavurha g’akisûnunu, amavurha ga alowesi
† na cinamomu.
18 Yishaga, amasîma rhugalaluke bulinde buca, oleke rhuyumve ebinuna.
19 Omulume nn’emwâni arhali aha kâ; àgenzire, àbalamire ekulî.
20 Ahêsire enshoho yâge y’amagerha, okugaluka aha mwâge erhi omwêzi gukola mukulu!»
21 Nyamukazi àmuhima n’orhwanzi rhunji-rhunji, amushîsha-shîsha n’obulimîrhizi, àmuhêka.
22 Nyamwâna omu buhunyi bwâge àmukulikira, kula enkâfu enakulikira odwîrhe akêre; kula akashafu kagwârhwa omu murhego,
23 empiru erinde ekarhula obudiku. Kula akanyunyi kanahenekera obulembo, karhanamanyiri oku kufà kâjifà!
24 Yumvagya nkubwîre mwâna wâni, yumvîrhiza ebinwa nâkubwîra:
25 Omanye omurhima gwâwe gwankanahabukira emunda ow’ecishungu ali. Orhanahabukiraga omu njira zâge,
26 bulyâla enkumba àjizire zirhali nyi, ciru nabali bazibu-zibu abalambika.
27 Enyumpa yâge njira y’ekuzimu
‡, mwandagalo gujà omu lugò lw’abafîre.