1 K’arhali kuyâkûza okwo oburhimanya budwîrhe bwayâkûza? K’arhali kuhamagala okwo obumva bwahamagala

2 Oku busongerwe bw’entondo, omu mulimbwa, aha mashanganjira ho butwîrîre ecirâlo;

3 aha mihango y’olugo, aha bagerera bajà omu lugo ho bayâkûlîze.

4 Mpu: «mwe mbwîzire mwe balume, mwe nyâkûzize mwe muburhwa n’abantu ».

5 Mwe bagûnda muyige obulenga, ninyu mwe bahwinja mujâge mwayengeha.

6 Muyumve, bulya mwanzi-nyalyanzè nâderha, na bulya binwa bya bushinganyanya byârhenga omu kanwa kâni

7 Binwa by’oku akanwa kâni kâderha, obulyâlya burhambâ ekanwa.

8 Ebinwa by’ekanwa kâni byoshi bibà bya bushinganyanya, birhabâmwo burhebanyi birhabâmwo nzonza.

9 Byoshi bibà bishingânîne oku muntu oyûmva bibà bishongêze oku muntu ogwêrhe obumanye.

10 Murhonye ihano ahâli ha amagerha, Obumanye erhi bwo ahâli h’amasholo.

11 Bulyâla oburhimanya bwo bukulu, aha magerha, ntà kantu wankabugerera kwo. Yûmva oku oburhimanya bwacîvuga

12 Niene Burhimanya, nie Nn’obulenga, nie nâsingaga obulenga, nasînga n’amakengu.

13 Okurhînya Nyakasane kwo kushomba obubî; oku nshômba okucîbona kwo nshômba n’okugayana, obwôrhere bubî n’akanwa kanywesi.

14 Nie njira ihano, nie njira okukoza omu binwa nie nn’obukengêre, nie nn’obuhashe.

15 Nie mbwîriza abâmi oburhegesi, n’abagula nie mbabwiriza okujira amarhegeko.

16 Nie mbwîriza abarhambo kurhi bârhambula olubaga, n’abazuzi kurhi bâtwa emmanja.

17 Nsîma abânsîma, abannôngereza banambone.

18 Obugale n’irenge emwâni bishûndwa, ebinja-binjà n’obushinganyanya kwo na kwo.

19 Amalehe nyàna, go makulu aha masholo gacîre obushanja bwâni bwo bukulu oku marhale mîshogwa.

20 Mwo nyisha omu njira z’obushinganyanya, omu njira z’amarhegeko,

21 nka nalônza ngaze balya bansîma, nka nalônza mbûmbe enshoho zâbo.

22 Nyakasane àli angwêrhe emurhondêro gw’emikolo yâge, embere ajire emikolo yâge mirhanzi-rhanzi.

23 Kurhenga ensiku n’amango erhi ndi mulume, kurhondêrera emurhondêro, embere igulu lirhangire.

24 Amango enyênga erhàli ecihaba naburhwa, erhi enshôko zahulula zirhacihabà.

25 Embere entondo zigwîkwe naburhwa, erhi n’orhushozi rhurhacishongêra amango rhwahabà.

26 Arhâli acijira igulu n’amashwa, nîsi erhi orhujuma rhurhanzi-rhanzi rhw’akatulo k’igulu?

27 Amango àyimânikaga amalunga erhi ho ndi; amango àtwaga eciriba oku nyanya z’omuhengere,

28 amango àsezagya ebitù by’emalunga, amango àyumanyanyagya enshôko z’enyênga,

29 amango àtwîraga enyanja olubibi, n’amîshi garhatwe olwo lubibi.

30 Ho nali aha burhambi bwâge erhi ndwîrhe nabirhondekeza byoshi, nakazimushasa ngasi lusiku, nakazisharhira ngasi mango omu masù gâge.

31 Nkola n’àrhabira oku igulu, nakazisîma okukômerana n’abâna b’abantu. Oyûmva ye lyà n’entânda

32 Muyumvagye bâna bâni: bali bany’iragi abalanga enjira zâni.

33 Muyumvîrhize enyigîrizo lyo mubà barhimanya, murhazigayaguzagya.

34 Ali muny’iragi omuntu wanyumva, omuntu oyîza ngasi lusiku aha nyumvi zâni.

35 Bulyâla ombwîne erhi abwîne akalamo, kurhona àrhona omu masù ga Nyamubâho;

36 Ci ongayisize erhi iroho lyâge akolîre buligo: ngasi yêshi onshômba erhi lufù arhonyize.